သျှမ်းပြည်တောင်ပိုင်း မိုးဗြဲမြို့ ပေါ်ဦး ၁ ရပ်ကွက်တွင်နေထိုင်သည့် အမျိုးသားတစ်ဦး မှိုသွားရှာရင် ပျောက်ဆုံးနေကြောင်း စုံစမ်းသိရှိရသည်။
ပြီးခဲ့သည့် အောက်တိုဘာ ၁ ရက်တွင် အသက် (၂၈)နှစ် အရွယ်ရှိ မောင်သိန်းစိုး အိမ်အနီးပတ်ဝန်းကျင်နား မှိုထွက်ရင် ပျောက်ဆုံးသွားပြီး ယနေ့အချိန်ထိ အဆက်သွယ်ပြန်မရရှိသေးကြောင်း သိရသည်။
“ ၁ ရက်နေ့ကတည်းကပျောက်သွားတာ။ အခုထိ အဆက်သွယ်ပြန်မရသေးဘူး။ သူအိမ်နားက အပေါ်ဖက်တက်သွားပြီး မှိုသွားရှာတာ။ အဲဒါနဲ့ ပျောက်သွားတာ” ဟု မောင်သိန်းစိုး၏ ရင်နှီးသူက ပြောသည်။
အဆိုပါ ပျောက်ဆုံးသွားသည့် နေရာသည် စစ်တပ်နဲ့ နီးကြောင်း သိရသည်။
ထိုအပြင် ကျန်ရှိနေသည့် မိသားစုဝင်များက ပျောက်ဆုံးနေသည့် မောင်သိန်းစိုးကို စိုးရိမ်နေကြောင်း သိရသည်။
“ အမျိုးမျိုးတွေးဖြစ်နေတယ်။ ဖမ်းသွားတာလား။ ဘယ်သူခေါ်သွားတာလဲမသိဘူးလေ။ သူဘာဖြစ်နေမလဲ စိတ်ပူတယ်။ ပြီးတော့ သူပျောက်သွားတဲ့နေရာက စစ်တပ်နဲ့ နီးတယ်။ စစ်တပ်ကလည်းသူကို ခေါ်သွား မလားစိုးရိမ်ရတယ်။ ကျနော်တို့ စစ်တပ်ကို သွားမေးကြည့်တော့ သူတို့လည်း မတွေ့မိဘူးလို့ ပြောတယ်” ဟု အထက်ပါသူက ပြောသည်။
မိုးဗြဲမြို့သည် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တို့ တိုက်ပွဲဖြစ်ပွားနေသည့် ဒေသဖြစ်ပြီး စစ်ကောင်စီမှ ပြည်သူများကို စစ်ဆေးဖမ်းဆီးမှုရှိနေကြောင်း သိရသည်။
Leave a Comments