သျှမ်းပြည်မြောက်ပိုင်း သီပေါမြို့ စစ်ဘက်ရေးရာလုံခြုံရေးအဖွဲ့ရုံး (စရဖ ရုံး) ထဲတွင် လောင်းကစားဝိုင်းများ ဖွင့်လှစ်ခွင့်ပေး နေကြောင်း သတင်းရရှိသည်။
လက်ရှိ သီပေါမြို့ တွင်လည်း သီပေါထောင်အနီးရှိ ပန်ဒါဘုန်းကြီးကျောင်းတွင် လောင်းကစားဝိုင်းကို ပြန်ဖွင့်လှစ်ပေး နေပြီး အောက်တိုဘာ ၅ ရက်တွင် လူကြီးခရီးစဉ်အရ ဘုန်းကြီးကျောင်းက လောင်းကစားဝိုင်းကို ပိတ်ထားပြီး စရဖ ရုံးထဲ ဖဲရိုက်နေကြောင်း မျက်မြင်တွေ့ခဲ့သူ တစ်ဦးက သျှမ်းသံတော်ဆင့် ကို ပြောသည်။
“ ပန်ဒါကျောင်းမှာ အခုပြန်ဖွင့်ပေးနေတယ်။ သီပေါထောင်နဲ့ နီးတယ်။ ပြီးခဲ့တဲ့ တစ်ရက် နှစ်ရက်လောက်က လူကြီး ခရီးစဉ်ဆိုပြီး ခဏပိတ်ထားတယ်။ ဒါမဲ့ သူတို့ စရဖ ရုံးထဲမှာ သွားဖွင့်ပေးတယ်။ အဲနားမှာ ဖဲတွေရိုက်နေကြတယ်။ ည ၈ နာရီထိ ဖွင့်တယ်” ဟု ၎င်းက ပြောသည်။
အဆိုပါ သီပေါမြို့က လောင်းကစားဝိုင်းများသည် ကျောက်မဲမြို့က ပြည်သူတွေ လာရောက်လောင်းစားကြပြီး ကျောက်မဲက လောင်းကစားတွင်လည်း သီပေါပြည်သူများက သွားရောက်ကစားကြောင်း သိရသည်။
အလားတူ လက်ရှိကျောက်မဲမြို့နယ် ပိန္နဲကုန်းကျေးရွာအုပ်စု ကုန်သာကျေးရွာထဲတွင် လောင်းကစားဝိုင်းကို ၂ လ ဆက်တိုက်ဖွင့် ပေးနေကြောင်း သိရသည်။
“ သီပေါမှာ ဖွင့်ရင်လည်း ကျောက်မဲကလူတွေ လာဆော့တယ်။ ကျောက်မဲမှာဖွင့်ရင်လည်း သီပေါက လူသွားဆော့ကြတယ်။ အခုက ကုန်သာကျေးရွာမှာဆို လောင်းကစားဖွင့်ထားတာ ၂ လလောက်တောင်ရှိနေပြီး ဘယ်သူမှ လာစစ်ဆေးပြီး ပိတ်ခိုင်းတာမရှိဘူး။ လောင်းကစားကြောင့် ပြည်သူတွေလည်း အရမ်းထိခိုက်တယ်” ဟု ကျောက်မဲမြို့ ဒေသခံ တစ်ဦးက ပြောသည်။
လောင်းကစားဝိုင်းကြောင့် သူခိုးများပြားလာပြီး နေ့ခင်းအချိန်လည်း ဝင်ရောက်ခိုးယူနေကြောင်း၊ လက်ရှိ ပြောင်းဖူးဈေးကောင်းရရှိချိန်တွင် သူခိုးများ ခြံထဲတွင် ပြောင်းဖူးဝင်ခိုးမှုများလည်းရှိနေကြောင်း သိရသည်။
“ ဟိုညက ကျနော်ပြောင်းဖူးခြံမှာ လာခိုးသွားတာ။ သူတို့ည အချိန်မှာလာခိုးတာ။ ခြံရဲ့ အတွင်းထဲမှာရှိတဲ့ ပြောင်းဖူးတွေကို လာချိုးပြီးခိုးသွားတာ။ အခုက ပြောင်းဖူးဈေးကောင်းနေတယ်လေ” ဟု ခိုးခံရသည့် ပြောင်းဖူးပိုင်ရှင်တစ်ဦးက ပြောသည်။
အာဏာသိမ်းပြီး လောင်းကစားဝိုင်းများပြားလာသော်လည်း စစ်ကောင်စီဘက်မှ ဖမ်းဆီး အရေးယူမှုလည်း မရှိပေ။
