သျှမ်းပြည်မြောက်ပိုင်း နမ္မတူမြို့နယ် ပုဗ္ဗာရုံ ဘုန်းကြီးကျောင်းရှိ ယခုလ အတွင်း စစ်ရှောင် ၃၀၀ ကျော်ကို မဖြစ်မနေ နေရပ်သို့ ပြန်လည်ပို့ခံရမည်ဖြစ်ကြောင်း စုံစမ်းသိရှိရသည်။
ယခုလက်ရှိ နမ္မတူမြို့ကို ပြောင်းရွှေ့လာသော မြို့နယ်ထွေအုပ်အသစ်တစ်ဦးက ဦးဆောင်ပြီး လာမည့် အောက်တိုဘာ ၁၅ ရက်တွင် စစ်ရှောင်များအားလုံးကို နေရပ်သို့ပြန်လည်ပို့ဆောင်မည်ဖြစ်ကြောင်း စစ်ရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“အခု ပြောင်းရွှေ့ လာတဲ့ ထွေအုပ်သစ်က ညွှန်ကြားလာတာ။ စစ်ရှောင် အားလုံးကို နေရပ်ပြန်ပို့မယ်၊ အောက်တိုဘာ ၁၅ ရက် ကြရင် မဖြစ်မနေ အကုန်လုံး ပြောင်းရွှေ့ရမယ်။ ဘယ်နေရာကို နေရပ်ပို့မယ်၊ ပြောင်းရွှေ့ ခိုင်းမယ်ဆိုတာလည်း မသိရသေးဘူး။ အခု စစ်ရှောင်ကို ထောက်ပံ့ပေးတဲ့ အဖွဲ့တွေလည်း ပိတ်ပင်ထားတယ် “ ဟု ၎င်း စစ်ရှောင် တစ်ဦးကပြောသည်။
အဆိုပါ စစ်ရှောင်များက နေရပ်သို့ ပြန်လည် ပို့ဆောင်ခံရမည်ဆိုသဖြင့် နေရပ်ပြန်ရန်အတွက် အခက်အခဲရှိ နေကြောင်း ၎င်းက ဆက်ပြောသည်။
အာဏာသိမ်း စစ်ကောင်စီ နှင့် ကချင်အမျိုးသား လွတ်မြောက်ရေး တပ်မတော် KIA ပူးပေါင်း PDF တပ်ဖွဲ့တို့၏ ပစ်ခတ်မှုကြောင့် စစ်ရှောင်အသစ် (၃၀၀) နီးပါး သည် နမ္မတူမြို့နယ်မှ ကုန်းကယားကျေးရွာ နှင့် ဆင်လီကျေးရွာတို့မှ ပုဗ္ဗာရုံ ဘုန်းကြီးကျောင်းသို့ ထွက်ပြေးလာကြောင်း သတင်းသိရသည်။
