ယခု ရက်ပိုင်းအတွင်း ပအိုဝ်းပြည်သူ့စစ် (PNO) နှင့် သျှမ်းပြည်ပြန်လည်ထူထောင်ရေးကောင်စီ (RCSS) တို့သည် နယ်မြေ ခွဲဝေရေးအတွက် ထိုင်းနိုင်ငံ ချင်းမိုင်မြို့ တွင် တွေ့ဆုံဆွေးနွေး ခဲ့သည်ဟု လူမှုကွန်ယက်ပေါ် သတင်းထွက်ပေါ်ခဲ့သည်။

အဆိုပါ တွေ့ဆုံဆွေးနွေးမှုသည် ယခင် (ရှမ်းပြည်နယ် လူမျိုးပေါင်းစုံ ပြည်သူ့လွတ်မြောက်ရေးအဖွဲ့ချုပ်) ရလလခ နေရာဟောင်းကို RCSS ကို ပြန်ပေးပြီး ထိုင်းနိုင်ငံ နယ်စပ် ကောင်းနန်းစခန်းကို (PNO/PNA) ပြည်သူ့စစ် အခြေချ နေထိုင်ရန် RCSS က သဘောတူညီခဲ့သည် ဟု ရေးသား ဖော်ပြထားသည်။

အဆိုပါ ကိစ္စ နှင့် ပတ်သက်ပြီး ပအိုဝ်းအမျိုးသားအဖွဲ့ချုပ် (PNO/PNA) ဗိုလ်မှူးသန်းကြွယ်က တွေ့ဆုံမှု မရှိကြောင်း လူမှုကွန်ယက်ပေါ်ပြန့်နေသည့် ဓာတ်ပုံသည် ၂၀၁၆ ခုနှစ်ကပုံ ဖြစ်ကြောင်း သျှမ်းသံတော်ဆင့် ကို ပြောသည်။

“ ကျနော်တို့ တွေ့ဆုံတာမရှိဘူး။ ဓာတ်ပုံကလည်း ၂၀၁၆ -၂၀၁၇ က ဆွေးနွေးခဲ့တဲ့ ဓာတ်ပုံတွေဖြစ်တယ်။ အခုနှစ် ၂၀၂၂ ခုနှစ်က တွေ့ဆုံဆွေးနွေးခဲ့တာမရှိဘူး။ ကောလဟာလ ဖြစ်တယ်” ဟု ဗိုလ်မှူးသန်းကြွယ်က ပြောသည်။

အလားတူ သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) ပြောရေးဆိုခွင့်ရ ဗိုလ်မှူး ခမ်းစံ နှင့် ဒု – ဗိုလ်မှူးကြီး အုမ်ခေး တို့ကို သျှမ်းသံတော်ဆင့် မှ အကြိမ်ကြိမ် ဆက်သွယ်ခဲ့သော်လည်း ဖုန်းလက်ခံ ဖြေကြားခြင်းမရှိပေ။

ရလလခ နေရာဟောင်းသည် လွိုင်လင်၊ မိုင်းကိုင်၊ ပင်လုံ၊ လဲချား၊ မောက်မယ်များအပြင် ဆီဆိုင်အရှေ့ဘက်ခြမ်း နှင့် တောင်ဘက်ခြမ်း ၊ ညောင်ရွှေတောင်ဘက်ခြမ်း၊ ပင်လောင်းတောင်ဘက်ခြမ်း၊ ဟိုပုံး မြောက်ဘက် နှင့် အရှေ့ဘက်ခြမ်း အထိပါဝင်ကြောင်း သိရသည်။

PNO ပြည်သူ့စစ်သည် စစ်ကောင်စီ လက်အောက်ခံ ပြည်သူ့စစ်တပ်ဖွဲ့တစ်ခုဖြစ်ပြီး လက်ရှိတွင် ဆီဆိုင်မြို့နယ်၊ ပင်လောင်းမြို့နယ်၊ တောင်ကြီးမြို့နယ်ထဲတွင် လှုပ်ရှားသွားလာနေသည်။