သျှမ်းပြည်မြောက်ပိုင်း ကွတ်ခိုင်မြို့နယ် အတွင်းတွင် စစ်ကောင်စီတပ်ဖွဲ့တို့မှ လက်နက်ကြီး၊ လက်နက်ငယ် တို့ဖြင့် ရမ်းသမ်းပစ်ခတ်မှုကြောင့် ပြည်သူပိုင်ကျွဲ၊ နွားများ ထိမှန်သေဆုံးရကြောင်း သတင်းသိရသည်။

အောက်တိုဘာ ၁ ရက်နေ့တွင် ကွတ်ခိုင်မြို့ အထွက် တိုးဂိတ်အကျော်အနီး မောင်းနှင်လာသည့် စစ်ကောင်စီ စစ်ကား နှစ်စီးကို လက်နက်ကိုင်တပ်ဖွဲ့တစ်ခုမှ ဝင်ရောက်ပစ်ခတ်ပြီး စစ်သားတချို့ ထိမှန်ဒဏ်ရာရပြီးနောက် ကွတ်ခိုင်အခြေစိုက် ခမရ ၂၄၁ မှ လက်နက်ကြီး လက်နက်ငယ်များဖြင့် ရမ်းသမ်း ပစ်ခတ်ခဲ့ကြောင်း ဒေသခံများက ပြောသည်။

“အဲ့တိုးဂိတ် အကျော်နားလေးအရောက်မှာ မိနစ် ၂၀ ကျော် ပစ်ခတ်မှုဖြစ်တယ်၊ အဲ့ဒီမှာ စစ်ကောင်စီ တပ်သား တချို့က ကျည်ထိမှန်ဒဏ်ရာရတယ်တဲ့၊ အဲ့ဟာဖြစ်ပြီး နေ့ခင်းပိုင်း ၂ နာရီလောက်မှာ ခမရ ၂၇၁ က လက်နက်တွေ ရမ်းပစ်လို့ ရွာက ကျွဲ နွားတွေ ထိမှန်ပြီး သေဆုံးရတယ်” ဟု ကွတ်ခိုင်မြို့မှ အမည်မဖော်လိုသူ တစ်ဦးက သျှမ်းသံတော်ဆင့်ကို ပြောသည်။

အဆိုပါ လက်နက်ကျည်ထိမှန်သည့် ကျွဲ၊ နွားများသည် ကွတ်ခိုင်မြို့နယ် ဖတ်ယိုင်းကျေးရွာအုပ်စု၊ မန်ဘန်ကျေးရွာမှ ပြည်သူပိုင် ကျွဲ၊ နွားများဖြစ်ပြီး နွား ၅ ကောင်နှင့် ကျွဲ ၃ ကောင် ထိမှန်သေဆုံးခဲ့ကြောင်း ဒေသခံများက ပြောသည်။

“စစ်ကောင်စီတွေက လက်နက်ကြီးတွေနဲ့ ရမ်းပစ်တယ်လေ၊ ရွာထဲမကျလို့ ပြည်သူတွေကို မထိလို့ တော်သေးတယ်ပဲ ပြောရမလား စားကျက်ထဲ လွတ်ထားတဲ့ ကျွဲတွေ နွားတွေတော့ ထိမှန်သေကုန်ကြတယ်၊ မသေပဲ ဒဏ်ရာရတဲ့ ကျွဲ၊ နွားလည်းများတယ်” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ကွတ်ခိုင်မြို့နယ်အတွင်း၌ ပစ်ခတ်သံများ ငြိမ်သက်နေသော်လည်း ဖတ်ယိုင်းကျေးရွာအုပ်စုဘက်၌ စစ်ကောင်စီအုပ်စု လှုပ်ရှားမှု ရှိနေသေးကြောင်း ဒေသခံများက ပြောသည်။

ကွတ်ခိုင်မြို့နယ်အတွင်း တိုင်းရင်းသား လက်နက်ကိုင် တပ်ဖွဲ့များ နှင့် ပြည်သူ့စစ်တပ်ဖွဲ့များ လှုပ်ရှားမှု ရှိနေသည့် အပြင် စစ်ကောင်စီတပ်ဖွဲ့ နှင့် တိုင်းရင်းသား လက်နက်ကိုင် တပ်ဖွဲ့ကြား ပစ်ခတ်တိုက်ခတ်မှုလည်း မကြာခဏ ဖြစ်ပွားလေ့ရှိသည်။