သျှမ်းပြည်တောင်ပိုင်း တောင်ကြီးခရိုင် ကက္ကူကျေးရွာအုပ်စု ဆောင်ဖိုးကျေးရွာနေ အမျိုးသားတစ်ဦးကို ပအိုဝ်းပြည်သူ့စစ် PNO တပ်ဖွဲ့က ဖမ်းဆီးခေါ်ဆောင်ပြီး ရိုက်နှက်လိုက်သဖြင့် သေဆုံးသွားကြောင်း စုံစမ်းသိရှိရသည်။
စက်တင်ဘာ တတိယ အပတ်ထဲတွင် ပအိုဝ်းပြည်သူ့စစ် PNO တပ်ဖွဲ့က ဆောင်ဖိုးကျေးရွာနေ အသက် (၅၀) ကျော် အရွယ်ရှိ အမျိုးသားတစ်ဦးကို မူးယစ်ဆေးဝါး သုံးစွဲခြင်းဖြင့် ဖမ်းဆီးခေါ်ဆောင်ခဲ့ပြီး စစ်ဆေးမေးမြန်းရာ ရိုက်နှက်ခဲ့သဖြင့် အိမ်ပြန်ရောက်သည့်အခါတွင် သေဆုံးသွားခဲ့ကြောင်း အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။
“သူ မူးယစ်ဆေးဝါး ရောင်းတယ်၊ သုံးလည်းသုံးစွဲတယ်လို့ သတင်းရပြီးတော့ လာဖမ်းသွားတာ၊ ဖမ်းသွားတာက ဆီဆိုင်မြို့နယ်ထဲက PNO က လာဖမ်းသွားတာ၊ သူလည်း ကျန်းမာရေးမကောင်းတော့၊ စစ်ဆေးမေးမြန်းပြီး အရိုက်ခံရတယ်။ အိမ်ကိုပြန်ပို့တဲ့အချိန်တွင်းမှာ ဆုံးသွားတယ်“ ဟု ၎င်း အမည်မဖော်လိုသူ ဒေသခံတစ်ဦးက ပြောသည်။
အဆိုပါ ရိုက်နှက်ခံရပြီး သေဆုံးသွားသည့် အသက် (၅၀) ကျော်အရွယ်ရှိ အမျိုးသားကို ဆီဆိုင်မြို့နယ် တောင်ပါတန်းကျေးရွာသို့ ဖမ်းဆီးခေါ်ဆောင်သွားခဲ့ပြီး မူးယစ်ဆေးဝါး နှင့် ပတ်သက်ပြီး စစ်ဆေးမေးမြန်းသည့်အပြင် ပိုက်ဆံများလည်း တောင်းယူကြောင်း သိရသည်။
အဆိုပါ ဆီဆိုင်မြို့နယ် ပအိုဝ်းပြည်သူ့စစ် PNO တပ်ဖွဲ့ထဲမှ ကျော်နီဆိုသူက ဦးဆောင်ကာ အဖွဲ့ဝင် အုပ်ချုပ်ရေးမှူး ဦးမောင်းခွန် နှင့် ဦးတကီး တို့က ပါဝင်ဦးဆောင်ဖမ်းဆီးခဲ့ကြောင်း သိရသည်။
Leave a Comments