သျှမ်းပြည်မြောက်ပိုင်း မိုးမိတ်မြို့နယ်အတွင်း ဖြစ်ပွားသည့် အာဏာသိမ်း စစ်ကောင်စီ နှင့် ရှမ်းပြည်တိုးတက်ရေး ပါတီ၊ ရှမ်းပြည်တပ်မတော် (SSPP/SSA) တို့ တိုက်ပွဲကြား စစ်ကောင်စီမှ ၇ ဦး သေဆုံးပြီး လက်ရှိတွင် စစ်ဆေးရေး တင်းကြပ်နေကြောင်း သိရသည်။
ပြီးခဲ့သည့် စက်တင်ဘာလ ၂၀ ရက် မွန်းလွဲပိုင်းတွင် ဖြစ်ပွားသည့် တိုက်ပွဲကြောင့် စစ်ကောင်စီဘက်မှ ၄ ဦးသေဆုံးခဲ့ပြီး အများအပြား ထိခိုက်ဒဏ်ရာရခဲ့ကြောင်း SSPP/SSA တာဝန်ရှိသူ တစ်ဦးက သျှမ်းသံတော်ဆင့် ကို ပြောသည်။
“အဲ့ ၂၀ ရက်နေ့မှာ သူတို့ဘက် ၄ ဦးကျတယ်၊ ထိခိုက်ဒဏ်ရာ ရသူလည်း များတယ်၊ ကျနော်တို့ဘက်ကျတော့ တပ်သားတစ်ဦး ဒဏ်ရာရပါတယ်၊ ပြီးတဲ့ ၁၇ ရက်နေ့ကလည်း သူတို့ဘက်က ၃ ဦးသေ ၆ ဦး ဒဏ်ရာရခဲ့တော့ ပေါင်းလိုက်ရင် ကျဆုံးသူက ၇ ဦးရှိနေတာပေါ့” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
မိုးမိတ်မြို့နယ်အတွင်း SSPP နှင့် တိုက်ပွဲဖြစ်ပွားနေသည့် စစ်ကောင်စီတပ်ဖွဲ့တို့သည် ခလရ (၂၂၃)၊ (၂၇၆) နှင့် ခမရ (၃၄၈) တို့ဖြစ်ကြောင်း သိရသည်။
ထို့အပြင် လက်ရှိတွင် မိုးမိတ်မြို့နယ်အတွင်း ဝင်ထွက်သွားလာ လှုပ်ရှားသည့် မည်သည့်လက်နက်ကိုင် တပ်ဖွဲ့ အဖွဲ့အစည်းမဆို တွေ့ရှိပါက ဒေသခံများအနေဖြင့် စစ်ကောင်စီထံ အကြောင်းကြားရန်လည်း ညွှန်ကြားထားကြောင်း သိရသည်။
“မနေ့က ၂၂ ရက်မှာ စစ်ကောင်စီက ရွာသားတွေကို အမိန့်ပေးတာ ဘယ်လက်နက်ကိုင် တပ်ဖွဲ့ကိုပဲ မြင်မြင် သူတို့်ကို အကြောင်းကြားရမယ်တဲ့၊ အခုက မြို့ဝင်မြို့ထွက်နေရာတိုင်းမှာ သူတို့စစ်သားချထားတယ်၊ စစ်ဆေးမှုလည်း တင်းကြပ်ထားတယ်” ဟု မိုးမိတ်ဒေသခံ ရွာသားတစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်တွင် SSPP တပ်ဖွဲ့များက တောထဲတွင် နေရာယူထားပြီး စစ်ကောင်စီတပ်ဖွဲ့တို့က စစ်အင်အား ဖြည့်တင်းမှု ဆက်လက်ရှိနေသေးသည့်အတွက် တိုက်ပွဲဆက်ဖြစ်နိုင်ကြောင်း SSPP/SSA တာဝန်ရှိသူက သျှမ်းသံတော်ဆင့် ကို ဆက်ပြောသည်။
“ကျနော်တို့က တောထဲမှာပဲ နေတဲ့အတွက် သူတို့ဘက်က ထပ်တိုးလာမယ်ဆိုရင် တိုက်ပွဲက ဆက်ဖြစ်မှာပဲ သူတို့ ကလည်း စစ်အင်အားဖြည့်ပြီး ကျနော်တို့ကို ထိုးစစ်ဆင်ဖို့ ချောင်းနေတော့ သေနတ်သံက ကြားရအုံးမှာထင်တယ်” ဟု ၎င်းက ပြောသည်။
အာဏာသိမ်း စစ်ကောင်စီ နှင့် SSPP/SSA တို့သည် ပြီးခဲ့သည့် ဇူလိုင်လ ၁ ရက်ကတည်းက စတင်ကာ မိုးမိတ် မြို့နယ်အတွင်း စစ်ရေးတင်းမာမှုများရှိခဲ့ကြခြင်းဖြစ်ပြီး ယနေ့အချိန်ထိ နှစ်ဖက် စစ်အင်အားဖြည့်တင်းမှုများ ထိတွေ့ ပစ်ခတ်မှုများ ယနေ့အချိန်ထိ မကြာခဏ ဖြစ်ပွားလေ့ရှိသည်။
