သျှမ်းပြည်မြောက်ပိုင်း နောင်ချိုမြို့နယ် ပိန်းအွေကျေးရွာ ဒေသခံ အမျိုးသားတစ်ဦး မြေမြှုပ်မိုင်းနင်းမိသေဆုံးပြီး (၁၀) ရက်ကျော်ကြာသော်လည်း ရုပ်အလောင်း ပြန်မတွေ့ရသေးကြောင်း စုံစမ်းသိရှိရသည်။
စက်တင်ဘာ (၁၃) ရက် မနက်ပိုင်း ၁၀ နာရီဝန်းကျင်တွင် သားအဖ နှစ်ဦး ချိပ်ဆေးသွားရှာရင်း အဖေဖြစ်သူက မြေမြှုပ်မိုင်းနင်းမိကာ ပွဲချင်းပြီး သေဆုံးသွားခဲ့ပြီး လက်ရှိအချိန်ထိ ရုပ်အလောင်းကို ပြန်မတွေ့သောကြောင့် ကျန်ရှိနေသည့် မိသားစုဝင်များက စိတ်ပူနေကြောင်း သိရသည်။
“အခုက သူ့ရုပ်အလောင်းပျောက်သွားနေတာ။ ပြန်မတွေ့သေးဘူး။ PDF တပ်ဖွဲ့က ယူသွားတာလားမသိဘူး။ သူ့မိန်းမ နဲ့ သူ့သားကတော့ သူ့အဖေ ရုပ်အလောင်းကို ပြန်တွေ့ချင်နေတာ။ သူ့သားပြောတာတော့ သူ့အဖေက ဒဏ်ရာပြင်းထန်လို့ ချက်ချင်းသေသွားတာတဲ့။ သူများသွားခေါ်ပြီး ရုပ်အလောင်းကို ပြန်သွားယူချိန်တော့ ရုပ်အလောင်းက ပျောက်သွားတာ” ဟု ဒေသခံ အမျိုးသားတစ်ဦးက ပြောသည်။
လက်ရှိမှာလည်း ကျန်ရှိနေသည့် မိသားစု စိုးရိမ်စိတ်ပူနေကြောင်း သိရသည်။
“ရုပ်အလောင်းပျောက်သွားတာလည်း (၁၀) ရက်ကျော်နေပြီလေ။ ပြန်မတွေ့သေးဘူး။ စိတ်ပူတယ်။ တကယ်သေသွားပြီးဆိုရင် ရုပ်အလောင်းကို ပြန်လိုချင်တယ်” ဟု ဒေသခံ က ပြောသည်။
နောင်ချိုမြို့နယ်တွင် စစ်ကောင်စီ နှင့် မန္တလေး PDF တို့က ဩဂုတ် နောက်ဆုံးပတ် နှင့် စက်တင်ဘာ ပထမပတ်ထိ တိုက်ပွဲဖြစ်ပွားခဲ့သည်။
အလားတူ နောင်ချိုမြို့သည် စစ်ကောင်စီတပ်၊ SSPP/SSA၊ RCSS/SSA ၊ TNLA ၊ KIA နှင့် PDF တပ်ဖွဲ့တို့က သွားလာလှုပ်ရှားနေသည့် ဒေသဖြစ်ကြောင်း သိရသည်။
Leave a Comments