သျှမ်းပြည်တောင်ပိုင်း ကျေးသီးမြို့နယ် မိုင်းနင်းကျေးရွာအုပ်စုမှ ရွာသား လုံးရွှေထွန်းကို ဓားဖြင့်ခုတ်သည့် စစ်သားကို အရေးယူ ဆောင်ရွက်ပေးရန် ပြည်သူများက တောင်းဆိုကြောင်း သတင်းသိရသည်။

ပြီးခဲ့သည့် သြဂုတ်လ ၃၁ ရက် မွန်းလွဲပိုင်း ၁ နာရီကျော်တွင် မိုင်းနင်းကျေးရွာအုပ်စု နောင်ယုမ်းကျေးရွာနေ လုံးရွှေထွန်းသည် နွားကျောင်းနေစဥ် စစ်ကောင်စီတပ်သားမှ ၎င်း၏ နွားကို သေနတ်ဖြင့် ပစ်မည်ကို ဝင်တားရာမှ ခလရ ၁၃၁ တပ်သားဖြစ်သည့် စစ်သား ၃ ယောက်မှ ၎င်း၏ လည်ပင်းကို ဓားဖြင့် ခုတ်လိုက်သဖြင့် အချက် ၄၀ ကျော် ချုပ်လိုက်ရပြီး လက်ရှိတွင် ဆေးရုံ၌ ဆေးကုသမှုခံယူနေရကြောင်း သိရသည်။

လုံးရွှေထွန်းမှ ဆေးကုသမှုခံယူနေစဥ်တွင် စစ်ကောင်စီဘက်မှ ဆေးကုသစားရိတ်အတွက်ဟု ဆိုကာ ငွေကြေး ၁ သိန်းကျပ် လာပေးခဲ့ကြောင်း၊ ယင်းလုပ်ဆောင်ချက်သည် တရားမျှတမှုမရှိကြောင်း နီးစပ်သူ ဆွေမျိုးများက ပြောသည်။

“တရားမျှတမှု လုံးဝမရှိတဲ့လုပ်ရပ်ပေါ့။ သူများကို မသေရုံတမယ် ကိုယ်ထိလက်ရောက်ကျူးလွန်ခဲ့ပြီးမှ ခုမှ ဘာတာဝန်ယူမှု တာဝန်ခံမှု မရှိဘူး။ သူများပစ္စည်း ဥစ္စာကိုလည်း အလကားယူချင်သေးတယ်။ လူကိုလည်း ရန်ပြုသွားတယ်၊ သေရင်တောင် အလကားသေရမယ့်အဖြစ်မျိုးပဲ သူတို့လုပ်ရပ်က” ဟု အထက်ပါ ပုဂ္ဂိုလ်က ပြောသည်။

ဓားဖြင့်ခုတ်ခံရသည့် လုံးရွှေထွန်းသည် ဆေးရုံတွင် ၉ ရက်ကြာ ဆေးကုသမှု ခံယူခဲ့ပြီးနောက် ဆေးကုသမှု ခံယူစဥ်တွင် စစ်ကောင်စီမှ နှစ်ကြိမ်လာကြည့်ကြောင်း၊ တစ်ကြိမ်လာလျှင် ပိုက်ဆံ ၅ သောင်းပေးဆောင်ခဲ့ ကြောင်း ဒေသခံများက ပြောသည်။

“ဆေးကုသမှု စရိတ်တွေက ပိုက်ဆံသိန်းဆယ်ချီကုန်မှာ၊ ဒါပေမဲ့ ဆေးရုံက ဆရာဝန်တွေလည်း လုံးရွှေထွန်း ဖြစ်စဥ်ကို နားလည်သိရှိလို့ စေတနာရှိသလောက် ပေးပါဆိုလို့ တော်သေးတယ်၊ စကစ တွေက လုံးရွှေထွန်းကို ရန်လုပ်တဲ့ တပ်သားကို အရေးယူပေးမယ်လိုတော့ ပြောပေမဲ့ ကျနော်တို့က မသိရဘူး။ ကျနော်တို့ အနေနဲ့ သူတို့ကို ထိုက်တန်တဲ့ ပြစ်မှုပြစ်ဒဏ်ကျစေချင်တယ်။ ဒါကို အများပြည်သူလည်း သိစေချင်တယ်” ဟု အထက်ပါ ပုဂ္ဂိုလ်က ပြောသည်။

လက်ရှိတွင် လုံးရွှေထွန်းသည် ဒဏ်ရာသက်သာပြီး နေအိမ်သို့ ပြန်လည်ရောက်ရှိနေသော်လည်း တစ်ပတ် တစ်ကြိမ် ဆေးရုံသို့ ဆေးစစ်မှု သွားရောက်ခံယူနေရသေးသည့်အတွက် ကုသမှုစားရိတ်အတွက် အခက်အခဲ ရှိနေကြောင်း သိရသည်။

လုံးရွှေထွန်းကို ဓါးဖြင့်ခုတ်သည့် စစ်ကောင်စီတပ်သားတို့သည် ခလရ ၁၃၁ မှ တပ်သားများဖြစ်ကြပြီး၊ မိုင်းနောင်အခြေစိုက် ခစခ ၂ လက်အောက်ခံ ဖြစ်ကြောင်း သတင်းသိရသည်။

အဆိုပါ တပ်သားတို့ကို စစ်စည်းကမ်းအရသော်လည်းကောင်း တရားဥပဒေအရ သော်လည်းကောင်း အပြစ်ပေး အရေးယူရန် တောင်းဆိုလိုကြောင်း ဒေသခံပြည်သူများကပြောသည်။