သျှမ်းပြည်မြောက်ပိုင်း မူဆယ်မြို့နယ် စက်မှုနယ်မြေ (၁၀) အိမ်မှူး ဖမ်းဆီးခံထားရပြီး လက်ရှိအချိန်ထိ အဆက်အသွယ် မရသေးကြောင်း စုံစမ်းသိရှိရသည်။

အဆိုပါ (၁၀) အိမ်မှူးသည် ပြီးခဲ့သည့် စက်တင်ဘာ ၁၄ ရက်တွင် အမည်မသိ အဖွဲ့အစည်းတစ်ခုက လာရောက် ဖမ်းဆီးသွားခဲ့ကြောင်း သိရသည်။

“ဘယ်သူ လာဖမ်းသွားလဲမသိရဘူး။ အခုချိန်ထိ ဘယ်နားရှိနေလဲ၊ သေလား၊ ရှင်လား မသိရသေးဘူး။ သူတို့ လာဖမ်းသွားတာ ၁၄ ရက်နေ့က လာဖမ်းသွားတာ။ ဘာအဆက်သွယ်မှ မရဘူး” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။

ထိုဖမ်းဆီးခံရသည့် အသက်(၅၀) အရွယ် မောင်တာတူးသည် စက်တင်ဘာ (၁၄) ရက်နေ့က ၄င်း၏ နေအိမ်မှာ လာရောက်ဖမ်းဆီးချိန်တွင် မရှိသောကြောင့် လမ်းမှာ ဖမ်းဆီးခြင်း ခံလိုက်ရကြောင်း သိရသည်။

မောင်တာတူးသည် စစ်ကောင်စီ နှင့် ရင်းနှီးသူဖြစ်ပြီး ရဲစခန်း လုံခြုံရေးအဖွဲ့များနှင့် အဆက်အသွယ် ရှိနေသည့် သူဖြစ်သည်ဟု မူဆယ်မြို့ ဒေသခံများ ပြောပြချက်အရ သိရသည်။

“သူ့ကို နေအိမ်မှာ သွားဖမ်းတာတဲ့။ ဘယ်အဖွဲ့လဲတော့မသိဘူး။ အိမ်မှာ မတွေ့လို့ ပြန်သွားလိုက်တာ။ လမ်းမှာတွေ့တော့ လမ်းမှာဖမ်းခံလိုက်ရတာ။ သူက စစ်ကောင်စီ နဲ့ အမြဲအဆက်သွယ်ရှိတဲ့သူဖြစ်တယ်။ စစ်ကောင်စီတွေနဲ့ အမြဲလိုက်သွားတဲ့သူလည်း ဖြစ်တယ်” ဟု မူဆယ်မြို့ ဒေသခံ တစ်ဦးက ပြောသည်။

အလားတူ ပြီးခဲ့သည့် ဩဂုတ်လ ၂၂ ရက်နေ့တွင်လည်း အမည်မသိ လက်နက်ကိုင်အဖွဲ့တစ်ခုက မူဆယ်မြို့ တောင်ရပ်ကွက်က အထည်ဆိုင်ဖွင့်ထားသည့် လင်မယားကို လာရောက်ဖမ်းဆီးသွားကြောင်း သိရသည်။

မူဆယ်မြို့သည် စစ်ကောင်စီတပ် အပါအဝင် SSPP/SSA ၊ KIA ၊ TNLA ၊ MNDAA နှင့် ပြည်သူ့စစ် အများအပြား သွားလာလှုပ်ရှားသည့် ဒေသဖြစ်သည်။