သျှမ်းပြည်တောင်ပိုင်း ပင်းတယမြို့နယ်အတွင်းရှိ စစ်ကောင်စီလက်အောက်ခံ ပျူစောထီးအဖွဲ့ဝင်များကို စစ်ကောင်စီတပ်ဖွဲ့မှ လက်နက်ကိုင်ဆောင်ခွင့် ပေးကြောင်း သတင်းသိရသည်။
ပြီးခဲ့သည့် သြဂုတ်လအတွင်း ဖွဲ့စည်းခဲ့သည့် ပြည်သူ့လုံခြုံရေးတပ်ဖွဲ့ အမည်ခံ ပျူစောထီး တပ်ဖွဲ့ဝင် ၅၀ နီးပါးခန့်ကို စစ်ကောင်စီတပ်ဖွဲ့မှ သေနတ်တစ်လက်နှင့် ကျည်ဆန်တစ်ကဒ်ပေးအပ်ကြောင်း ဒေသခံများထံမှ သတင်းသိရသည်။
“ဖွဲ့စည်းတာ တစ်လကျော်လောက်ရှိပြီပေါ့၊ သြဂုတ်လက ဖွဲ့စည်းခဲ့တာ၊ ၂၀ ရက်နေ့မှာ အဖွဲ့ဝင်တစ်ယောက်ကို သေနတ်တစ်လက်နဲ့ ကျည်တစ်ကဒ် လာပေးတယ်၊ ကလောက ဗျူဟာမှူးကိုယ်တိုင်လာပေးတယ်လို့ သိရတယ်” ဟု ပင်းတယမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ပျူစောထီး အဖွဲ့ဝင်များသည် ပင်းတယမြို့ပေါ်ရှိ ရပ်ကွက်များမှ ဒေသခံများနှင့် ကျေးရွာမှ ပြည်သူများ ပါဝင်ကြောင်း သိရသည်။
ယင်းကဲ့သို့ ပျူစောထီးအဖွဲ့ဝင်များကို လက်နက်ကိုင်ဆောင်ခွင့်ပေးဆောင်ခြင်းနှင့် ပတ်သက်ပြီး ဒေသခံပြည်သူများ အနေဖြင့် ဒေသအတွင်း လက်နက်ပြခြိမ်းခြောက် အကြမ်းဖက်လုပ်ရပ်များ ဖြစ်ပေါ်လာမည်ကို စိုးရိမ်ကြောင်းလည်း ဒေသခံများက ပြောသည်။
“လက်နက်ကိုင် ဗိုလ်ကျအနိုင်ကျင့်ပြီး အကြမ်းဖက် အလွယ်တကူ ရှာဖွေစားသောက်ချင်တဲ့ သူတွေအတွက်တော့ ကွက်ကောင်းကျသွားတာပေါ့၊ အမှန်တော့ စစ်ကောင်စီတွေက ပြည်သူတွေ နဲ့ PDF တွေရဲ့ ဆက်သွယ်မှုကို ဖြတ်ချင်တာရယ်၊ ပြီးတော့ ပြည်သူတွေကိုလည်း ထိန်းချုပ်ချင်တာလည်းပါတာပေါ့” ဟု ပင်းတယမြို့ခံ အမျိုးသားက ပြောသည်။
ပင်းတယမြို့တွင် စစ်တပ်အခြေစိုက် လှုပ်ရှားမှုများမရှိခဲ့သော်လည်း စစ်တပ်မှ နိုင်ငံတော် အာဏာသိမ်းပြီး နောက်ပိုင်း အာဏာရှင် ဆန့်ကျင်တော်လှန်သူများကို စစ်တပ်သတင်းပေးနှင့် ဒလန်များ၏ သတင်းပေးမှုကြောင့် ဖမ်းဆီးခံရသူ များပြားပြီး ပြည်သူ့ကာကွယ်ရေးတပ်ဖွဲ့များလည်း ပေါ်ထွက်လာကြောင်း သိရသည်။
ပြီးခဲ့သည့် ဖေဖော်ဝါရီလ ၁၀ ရက်တွင် ပင်းတယမြို့မှ မြို့ပြပျောက်ကြားအဖွဲ့ ဖွဲ့စည်းလိုက်ပြီ ဖြစ်ကြောင်း ထုတ်ပြန်ကြေညာထားသည်။
Leave a Comments