PNLO တပ်ဖွဲ့ (၅) ဦး သတ်ဖြတ်ခံရသည့်ကိစ္စ နှင့်ပတ်သတ်ပြီး ပအိုဝ်းပြည်သူ့စစ် (PNO/PNA) နှင့်) ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO) တို့ တောင်ကြီးမြို့ ပအိုဝ်းစာပေ နှင့် ယဉ်ကျေးမှုရုံးတွင် တွေ့ဆုံဆွေးနွေးခဲ့ကြောင်း သိရသည်။

ပြီးခဲ့သည့် စက်တင်ဘာ ၁၉ မွန်းလွဲ ၁ နာရီခွဲဝန်းကျင်တွင် PNLO တပ်ဖွဲ့ (၅) ဦးသတ်ဖြတ်ခံရသည့် ကိစ္စနှင့် ပတ်သတ်ပြီး နောက်နောင် ထပ်မံမဖြစ်ပွားအောင် နယ်မြေကျူးကျော်မပြုလုပ်ဘဲ၊ နယ်မြေ ကျူးကျော်မည် ဆိုပါက နယ်မြေတာဝန်ခံကို အသိပေးရန်အတွက် ဆွေးနွေခဲ့ကြောင်း PNO/PNA ပြောရေဆိုခွင့်ရှိသူ ဗိုလ်မှူးသန်းကြွယ် က သျှမ်းသံတော်ဆင့်ကို ပြောသည်။

“ ကျနော်တို့က နဂိုးကတည်းက တစ်ဖွဲ့နဲ့တစ်ဖွဲ့ ရန်သူလည်းမဟုတ်ဘူး။ မိတ်ဖက်တွေပဲဖြစ်တယ်။ နောက်နောင်မဖြစ်အောင် တစ်ဖွဲ့နဲ့တစ်ဖွဲ့ တာဝန်ခံ ပြောလိုက်တာပါ။ နောက်ဆိုရင် နယ်မြေကျူးကျော်လာတာပဲ ဖြစ်ဖြစ် တစ်ယောက်နဲ့ တစ်ယောက် သတင်းအရင်းပို့ပြီးမှ သွားသွားလာလာ လုပ်ခိုင်းတဲ့အနေထားပါ” ဟု ဗိုလ်မှူး သန်းကြွယ် ကဆိုသည်.

အဆိုပါ PNO မှ PNLO တပ်သား (၅) ကို သတ်ဖြတ်ခဲ့သည့် ကိစ္စနှင့် ပတ်သက်ပြီး ဗိုလ်မှူးသန်းကြွယ်က ဖြစ်ရပ်မှန်ကို မသိရှိရကြောင်း၊ အောက်ခြေတပ်သားများ လုပ်ရပ်ကိုလည်း အသေးစိတ်မသိရဟု ထပ်လောင်းပြောသည်။

“ ကျနော်တို့လည်း အဲဒါကို သေချာမသိဘူး။ အခုထိအလောင်းကိစ္စလည်း ကျနော်တို့ မတွေ့ဘူးဖြစ်နေတယ်။ ဖြစ်စဉ်က ပင်လောင်းမှာ။ ဘာကြောင့်သတ်လဲဆိုတာ မသိရဘူး” ဟု ဗိုလ်မှူးသန်းကြွယ် က ပြောသည်။

PNLO တပ်သား (၅) ဦးကို PNO တပ်ဖွဲ့က ပင်လောင်းမြို့နယ်၊ ပင်မွန်းကျေးရွာအုပ်စု၊ ဝါးပြုံကျေးရွာထဲတွင် ပြီးခဲ့သည့် စက်တင်ဘာလ (၁၄) ရက်က အကြောင်းမဲ့ဖမ်းဆီးသွားပြီး သတ်ဖြတ်ခဲ့ကြောင်း PNLO က ထုတ်ပြန်ထားသည်။

အဆိုပါသတ်ဖြတ်ခံရသူများသည် ခွန်ထွန်းဦး၊ ခွန်ရှိန်၊ ခွန်သန်းဖေ၊ ခွန်ကြယ်စင် နှင့် ခွန်ရဲနောင် တို့ဖြစ်ကြောင်း သိရသည်။