မိုးမိတ်မြို့နယ် စစ်ကောင်စီ နှင့် SSPP ပြင်းထန်စွာ တိုက်ပွဲထပ်မံဖြစ်ပွားနေ

0

သျှမ်းပြည်မြောက်ပိုင်း မိုးမိတ်မြို့နယ်အတွင်း အာဏာသိမ်း စစ်ကောင်စီ နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA )တို့ တိုက်ပွဲပြင်းထန်နေကြောင်း သတင်းသိရသည်။

ယနေ့ စက်တင်ဘာလ ၂၀ ရက်နေ့ နေ့လည် ၁၁ နာရီခွဲဝန်းကျင်မှ မွန်းလွဲပိုင်း ၁ နာရီကျော် အထိ အာဏာသိမ်း စစ်ကောင်စီ တပ်ဖွဲ့နှင့် SSPP တို့က ဟွေခမ်းတောင်ကြောတွင် တိုက်ပွဲဖြစ်ပွားကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ဝမ်အုမ်ကျေးရွာ နဲ့ ၁ မိုင်ကျော်လောက်ဝေးတယ်၊ ဟွေခမ်းတောင်ကြောမှာပဲ တိုက်ပွဲထပ်ဖြစ်တာပါ၊ ဗမာစစ်တပ်က SSPP ဆီကို ထိုးစစ်ဆင်တာ၊ လက်နက်ကြီး လက်နက်ငယ်ပစ်ခတ်မှုတွေ လည်းရှိတယ်၊ အရင်ကထက် တိုက်ပွဲပြင်းတယ်” ဟု ၎င်းက ပြောသည်။

စစ်ကောင်စီ နှင့် SSPP တို့ တိုက်ပွဲဖြစ်ပွား

လက်ရှိတွင် အာဏာသိမ်း စစ်ကောင်စီတပ်ဖွဲ့တို့သည် ဝမ်ဖိုင်မိုင်ရွာဘက်မှ စစ်အင်အားအကူဖြင့် ဟွေခမ်းတောင် ကြောရှိ SSPP တပ်စခန်းနေရာသို့ ထိုးစစ်ဆင် တိုက်ခိုက်နေဆဲဖြစ်ကြောင်း သတင်းသိရသည်။

အာဏာသိမ်းစစ်ကောင်စီတပ်ဖွဲ့တို့သည် ဝမ်ဖိုင်မိုင်ကျေးရွာ၊ ဝိန်းမိုင်ကျေးရွာနှင့် ဟွေခမ်းတောင်ကြာမှ စစ်ကြောင်း သုံးနေရာဖြင့် စစ်ဆင်ရေးလုပ်နေပြီး ယနေ့တိုက်ပွဲ၏ ထိခိုက်ကျဆုံးမှုကိုတော့ မသိရှိရသေးပေ။

ပြီးခဲ့သည့် စက်တင်ဘာ ၁၆ ရက်တွင် SSPP တပ်ဖွဲ့ ခေါင်းဆောင်များက ပြည်ထောင်စု နိုင်ငံရေး ဆွေးနွေး ညှိနှိုင်းရေး ကော်မတီ FPNCC အဖွဲ့ဝင်များ နှင့် ပန်ဆိုင်းမြို့၌ တွေ့ဆုံဆွေးနွေးမှုအပြီး စစ်ကောင်စီ နှင့် မိုးမိတ်မြို့မှာ တိုက်ပွဲဖြစ်ပွားခဲ့သည်။

အဆိုပါ တွေ့ဆုံဆွေးနွေးမှုမှာ SSPP/SSA အပြင် FPNCC အဖွဲ့ဝင်ဖြစ်သည့် “ဝ” ပြည်သွေးစည်းညီညွတ်ရေး တပ်မတော် (UWSA)၊ မိုင်းလား အထူးဒေသ (၄) NDAA၊ မြန်မာ အမျိုးသား ဒီမိုကရက်တစ် မဟာမိတ် တပ်မတော် (MNDAA)၊ ရက္ခိုင့်တပ်တော် (AA)၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) နှင့် ကချင်လွတ်မြောက်ရေးတပ်မတော်( KIA) တို့လည်း တက်ရောက်ခဲ့ကြသည်။

Leave a Comments