မိုးမိတ်မြို့နယ် အတွင်း စစ်ကောင်စီ လက်အောက်ခံ နေရာများ ဗုံးပေါက်ကွဲ

0

သျှမ်းပြည်မြောက်ပိုင်း မိုးမိတ်မြို့နယ်အတွင်းရှိ အာဏာသိမ်း စစ်ကောင်စီ လက်အောက်ခံဌာန ဖြစ်ကြသည့် ခရိုင်ရုံးနှင့် မြို့နယ် ထွေအုပ်ရုံးတို့တွင် ဗုံးပေါက်ကွဲမှု ဖြစ်ပွားခဲ့ကြောင်း သတင်းသိရသည်။

ယမန်နေ့ (စက်တင်ဘာ ၁၉ ) ရက် ညနေ ၃ နာရီခွဲကျော်တွင် မိုးမိတ်မြို့ရှိ ခရိုင်ရုံးဝန်းအနီး ဗုံးနှစ်လုံး ပေါက်ကွဲခဲ့ပြီးနောက် ည ၈ နာရီဝန်းကျင် အချိန်တွင်လည်း မြို့နယ် အထွေထွေ အုပ်ချုပ်ရေးမှူးရုံး အနီး၌ ဗုံးတစ်လုံး ထပ်မံ ပေါက်ကွဲကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“မနေ့က ညနေပိုင်းမှာ ခရိုင်ရုံးမှာ ဗုံး ၂ လုံး ပေါက်ကွဲပြီးတဲ့နောက် လုံခြုံရေး အင်အားတွေက အဲ့နေရာကို ရောက်လာကြတယ်၊ ဒါမဲ့ ဘယ်သူလုပ်လိုက်မှန်းတော့ မသိလိုက်ဘူးလို့ပြောတယ်၊ အဲ့ကြောင့် သူတို့လည်း စစ်ဆေးပြီး ပြန်သွားတာ၊ ည ၈ နာရီရောက်တော့ မြို့နယ်ထွေအုပ်ရုံးမှာ နောက်တစ်လုံးထပ်ပေါက်တယ်” ဟု မိုးမိတ်မြို့မှ အမည်မဖော်လိုသူ ဒေသခံအမျိုးသားတစ်ဦးက ပြောသည်။

မိုးမိတ်မြို့

အဆိုပါ ဗုံးနှစ်ကြိမ် ပေါက်ကွဲမှုတွင် လူထိခိုက်မှု မရှိသော်လည်း ကားတစ်စီး ထိခိုက်ပျက်စီးရကြောင်းလည်း သတင်းသိရသည်။

လက်ရှိ မိုးမိတ်မြို့နယ်အတွင်းတွင် စစ်ကောင်စီ နှင့် SSPP တို့ စစ်ရေးတင်းမာမှုများ ရှိနေသည့်အပြင် စစ်ကောင်စီဘက်မှ စစ်အင်အားထပ်မံ ဖြည့်တင်းကာ ဖြန့်ကျက်နေရာယူထားမှုများအကြား ဗုံးပေါက်ကွဲခြင်း ဖြစ်ပေါ်ခဲ့ခြင်းဖြစ်ကြောင်း ဒေသခံများက ပြောသည်။

“အခု မိုးမိတ်မြို့တွင်းမှာ စစ်ကောင်စီ တပ်ရင်း ၃ ခုက ဖြန့်ကျက်ပြီး နေရာယူထားတယ်၊ ဒီကြားထဲ ဗုံးပေါက်ကွဲမှု ထပ်ဖြစ်တော့ ပြည်သူတွေကို စစ်ဆေးမှုက ပိုတင်းကြပ်လာတယ်၊ ပြည်သူအတွက် လုံခြုံရေးယူပေးတာလည်း မရှိဘူး” ဟု မိုးမိတ်မြို့ ဒေသခံအမျိုးသားက ပြောသည်။

စက်တင်ဘာ ၁၆ ရက်တွင် စစ်ကောင်စီဘက်မှ မိုးမိတ်မြို့နယ်အတွင်း အခြေချ လှုပ်ရှားနေသည့် SSPP/ SSA တပ်ဖွဲ့များ နုတ်ထွက်ရန် ရပ်ကွက်အုပ်ချုပ်ရေးမှူး မှ တစ်ဆင့် SSPP/SSA တာဝန်ခံများထံ အကြောင်း ကြားသော်လည်း SSPP/SSA ဘက်မှ နုတ်ထွက်ခြင်းမပြုသည့်အတွက် လက်ရှိတွင် စစ်ရေးတင်းမာမှု များရှိနေကြောင်း သိရသည်။

ယင်းကဲ့သို့ စစ်ရေးတင်းမာမှုများကြောင့် မိုးမိတ်မြို့နယ် အတွင်းရှိ အခြေခံပညာ စာသင်ကျောင်းများ အချို့ကို အာဏာသိမ်း စစ်ကောင်စီ တပ်ဖွဲ့မှ ပိတ်ရန် ညွှန်ကြားကြောင်းလည်း သိရသည်။

Leave a Comments