သျှမ်းပြည်မြောက်ပိုင်း နောင်ချိုမြို့နယ် စစ်ကောင်စီ လက်အောက်ခံ အုပ်ချုပ်ရေးမှူးများ ခြိမ်းခြောက်မှုကြောင့် စစ်ဘေးရှောင်များ နေရပ်ပြန်သွားရကြောင်း စုံစမ်းသိရှိရသည်။
စက်တင်ဘာလ ဒုတိယပတ်အတွင်း နောင်ချိုမြို့နယ် စစ်ကောင်စီ လက်အောက်ခံ အုပ်ချုပ်ရေးမှူးများ လာရောက် ခြိမ်းခြောက်မှုပြုလုပ်သဖြင့် စစ်ဘေးရှောင်များ နေရပ်ပြန်သွားရကြောင်း စစ်ရှောင်ကူညီပေးနေသည့် သူများက သျှမ်းသံတော်ဆင့်ကို ပြောသည်။
“သူတို့ ခြိမ်းခြောက်လို့ပဲ ပြန်သွားတဲ့ သဘောပါပဲ။ သူတို့က စစ်ရှောင်တွေရဲ့ အဆောက်အအုံတွေကို ဖျက်ပြီးတော့ ပြန်ခိုင်းတာ။ အခုက တစ်ချို့ ပြန်သွားကုန်ပြီ။ စစ်ရှောင်တွေ သိပ်မကျန်တော့ဘူး။ အကုန်နီးပါး ပြန်သွားပြီ” ဟု ၎င်းက ပြောသည်။
ထိုအပြင် နေရပ်ရောက်နေသည့် စစ်ဘေးရှောင်များ အနေဖြင့် လာရောက်လှူပေးသော အလှူကိုလည်း လက်မခံရန် အုပ်ချုပ်ရေးမှူးတွေက ညွှန်ကြားထားကြောင်း သိရသည်။
လက်ရှိမှာ စစ်ဘေးရှောင်များ နေရပ်ပြန်သွားသော်လည်း ခြံမသွားရဲသေးကြောင်း၊ ညဘက်တွင်လည်း ဒေသခံများက ကျေးရွာထဲ မနေရဲသဖြင့် စစ်ရှောင်စခန်းသို့ ပြန်လာအိပ်သည့်သူများလည်းရှိနေကြောင်း ဒိုးပင်ကျေးရွာမှ ဒေသခံ တစ်ဦးက သျှမ်းသံတော်ဆင့်ကို ပြောသည်။
“တစ်ချို့က ညဆိုရင် ကျေးရွာထဲ မနေရဲလို့ ညဆို ပြန်လာအိပ်တာရှိတယ်။ သူတို့တွေက ခြံတွေလည်း သိပ်မသွားရဲကြဘူး။ ပြီးတော့ သူများတွေ လာလှူတဲ့ အလှူတွေလည်း လက်မခံနဲ့လို့လည်း သူတို့က ခြိမ်းခြောက်ပြီး ပြောထားတယ်။ ပြည်သူတွေ တော်တော် ဒုက္ခရောက်နေတယ်” ဟု ၎င်းက ဆိုသည်။
ယခုရက်ပိုင်းအတွင်း တိုက်ပွဲဖြစ်ပွားမှုမရှိဘဲ စစ်ကောင်စီသည် လက်ရှိမှာ နောင်ချိုမြို့နယ် တိုက်ပွဲဖြစ်ပွားသည့်နေရာ ဒိုးပင်ကျေးရွာတို့ဘက်တွင် စစ်အင်အား အများအပြား ဖြည့်နေကြောင်း သိရသည်။
“အခုရက်ပိုင်း စစ်တပ်က အင်အားတွေ အများကြီး ဖြည့်နေတယ်။ ဒိုးပင်ကျေးရွာက ရဲစခန်းမှာလည်း ရဲတွေမရှိဘဲ စစ်တပ်တွေပဲနေနေတာ။ အရင်ကထပ် အင်အား ၄ ၊ ၅ ဆ လောက်ဖြည့်လာတယ်” ဟု စစ်ဘေးရှောင် ကူညီပေးသည့် အမျိုးသားက ပြောသည်။
နောင်ချိုမြို့နယ်တွင် စစ်ကောင်စီ နှင့် မန္တလေး PDF တို့ ဩဂုတ် ၂၄ ရက်မှစပြီး တိုက်ပွဲဖြစ်ပွားမှုကြောင့် ဒိုးပင်ကျေးရွာ၊ ဟိုခိုကျေးရွာ၊ ကုလားကွဲကျေးရွာမှ ပြည်သူများ စစ်ဘေးတိမ်းရှောင် လာခဲ့ရကြောင်း သိရသည်။
Leave a Comments