သျှမ်းပြည်တောင်ပိုင်း ရွာငံမြို့နယ် သစ်စေးကျေးရွာအတွင်းသို့ စစ်ကောင်စီ က ပြည်သူနေအိမ်ဝန်းအတွင်း ဝင်ရောက် စစ်ဆေးပြီးနောက် ကြက်များကို ယူဆောင်စားသောက်ခဲ့ကြောင်း သတင်း သိရသည်။
ယမန်နေ့ (စက်တင်ဘာ ၁၃) ရက် ညနေ ၆ နာရီ ဝန်းကျင်တွင် ရွာငံမြို့နယ် သစ်ဆေးကျေးရွာရှိ ပြည်သူနေအိမ်ဝန်းထဲသို့ စစ်ကောင်စီက ဝင်ရောက် မွှေနှောက်ရှာဖွေမှု ပြုလုပ်ခဲ့ပြီးနောက် အိမ်အတွင်းမှ ကြက်များကို ယူဆောင် စားသောက်ခဲ့ ကြောင်း အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“အိမ်ရှင်ကို စစ်မေးစရာရှိတယ်ဆိုပြီးတော့ အိမ်ကို လာမွှေသွားတယ် အဲ့နောက်မှာတော့ ကြက်သုံးကောင်ကို ဖမ်းပြီးယူသွားတယ်၊ ဟင်းစားဖို့အတွက် သတ်ပြီးစားသောက်ကြမှာ၊ ကြက်တစ်ကောင်ကို ၁ သောင်းနှုန်းနဲ့ပဲထား သုံးသောင်းကျော်တန်ဖိုးကို စစ်ကောင်စီတွေက အလကားယူဆောင်သွားတာ၊ မတရားဘူးလို့မြင်တယ်” ဟု ၎င်းက ပြောသည်။
ထို့အပြင် စက်တင်ဘာ ၁၂ ရက် ညတွင်လည်း ရွာငံမြို့ရှိ အလည်ချောင်းကျေးရွာမှ ပြည်သူအိမ်ဝန်း အတွင်းရှိ အိမ်ကြက်များကို စစ်ကောင်စီတပ်သားတို့ ယူဆောင်သတ်ဖြတ်သွားကြောင်းလည်း ဒေသခံများထံမှ သိရသည်။
ပြည်သူ့အိမ်ဝန်းအတွင်းမှ ကြက်များကို အခမဲ့ယူဆောင်စားသောက်ခြင်း၊ အကြမ်းဖက်လုပ်ရပ်များပြုမူခြင်း တို့ရှိနေသော်လည်း ပြည်သူများအနေဖြင့် အားကိုးရာမဲ့ နေကြောင်း အမည်မဖော်လိုသူ ရွာငံဒေသခံအမျိုးသား က တစ်ဦးက ပြောသည်။
“ကျနော်တို့ ပြည်သူတွေကို အမြင်ကတ်ပုဒ်မတပ်ပြီး စစ်ဆေးနေတာ၊ ရိုက်နက်နေတဲ့ အပြင် ကြက်တွေ ဝက်တွေ အလကားယူဆောင်စားသောက်နေကြတာတွေကို မတရားတာတွေက သိနေပေမဲ့ ဘာမှလုပ်လို့မရဘူး၊ ကျနော် တို့က သူတို့ကို ယှဥ်နိုင်ဖို့ မရှိပါဘူးဗျာ”ဟု ၎င်းက ပြောသည်။
စစ်တပ်အာဏာသိမ်းပြီးနောက်ပိုင်း စစ်ကောင်စီတပ်ဖွဲ့တို့သည် ရွာငံမြို့နယ်အတွင်း စစ်အင်အားဖြန့်ကျက် နေရာယူမှု ရှိနေပြီး စစ်တပ်သတင်းပေး စစ်အာဏာရှင်ဆန့်ကျင် တော်လှန်သူများကို ဖမ်းဆီးရိုက်နှက်ခြင်း၊ နေအိမ်မီးရှို့ခြင်း နှင့် လူ့အခွင့်အရေး ချိုးဖောက်မှုများ နေ့စဉ်ပြုလုပ်နေကြောင်း သိရသည်။
