သျှမ်းပြည်အရှေ့ပိုင်း တာချီလိတ်မြို့တွင် ယခုရက်ပိုင်း မိုးအဆက်မပြတ်ရွာသွန်းမှုကြောင့် ရေကြီးရေလျှံမှု ထပ်မံဖြစ်ပွားကာ နေအိမ်တချို့ အစားအသောက်ချက်ပြုတ်ရန် အခက်အခဲ ကြုံတွေ့နေရကြောင်း စုံစမ်းသိရသည်။
တာချီလိတ်မြို့ မယ်ဆိုင်ချောင်းရေထဲတွင် တောင်ကျချောင်းရေများ အဆမတန် စီးဝင်သောကြောင့် ချောင်းရေလျှံမှုဖြစ်သဖြင့် ရေဘေးသင့်သူများ ချက်ပြုတ်စားသောက်ရန် ခက်ခဲသည့်အတွက် အစားအသောက်များ လိုအပ်နေကြောင်း ကိုလှမိုးပရဟိတအသင်းထံမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“မယ်ဆိုင်ချောင်းနဲ့နီးတဲ့ နေအိမ်တွေ၊ ရေစီးဝင်တဲ့နေအိမ် မှာချက်ပြုတ်လို့ မရဘူး။ ကျနော်တို့ အဖွဲ့သား အနေနဲ့ ကိုယ်တိုင်ချက်ပြုတ်ပြီး သွားကူညီတယ်။ မနေ့ညက တာလော့ဘက်မှာ ထမင်းဘူး (၅၀၀) ကျော်လောက် သွားဝေရတယ်။ ဒီနေ့လည်း ထမင်းဘူး (၅၀၀) ကျော်လောက်တော့ ကျနော်တို့ ထပ်သွားဝေပေးဖို့ ရှိတယ် “ ဟု ၎င်း တာဝန်ရှိသူတစ်ဦးက ပြောသည်။
အဆိုပါ ရေကြီးရေလျှံမှု သည် တာချီလိတ်မြို့ ရှိ ပုန်းထွန်ရပ်ကွက်၊ မကာဟိုခမ်း၊ မယ်ခေါင်၊ ဆန်ဆိုင်း (ခ) နှင့် မယ်ခေါင် စသည့် အနိမ့်ပိုင်းများတွင် ထပ်မံကြုံတွေ့နေရခြင်းဖြစ်သည်။
အလားတူ ယနေ့ စက်တင်ဘာလ (၁၃) ရက်၊ နေ့လည်ပိုင်းအချိန်တွင် မိုးရွာသွန်းမှု ရပ်တန့်သွားပြီး မိုးရေများထပ်မံ တက်ရောက်မှုမရှိသေးကြောင်း၊ အဆိုပါ မိုးရေများထပ်တက်လျှင် စိုးရိမ်မှုရှိကြောင်း တာချီလိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ညကတော့ မယ်ဆိုင်ချောင်းက စိုးရိမ်အမှတ်ထိတော့ ရောက်နေတယ်။ ဒီနေ့ နေ့လည်ပိုင်းတော့ မိုးတိတ်သွားပြီ။ ရေကထက်တက်လာနိုင်လားတော့ မသိသေးဘူး။ ရေတွေဒီထက်တက်ရင်တော့ စိုးရိမ်ရတယ်။ အခုတချို့ရပ်ကွက်တောင်မှ ရေတွေဝင်ပြီး ဆွေမျိုးအိမ်ကို ပြောင်းရွေ့ရတယ် “ ဟု ၎င်းဒေသခံတစ်ဦးက ပြောသည်။
ထို့အပြင် တာချီလိတ်မြို့မှာ ယခုရေကြီးရေလျှံမှု (၃) ကြိမ်မြောက်အထိ ဖြစ်ပွားနေပြီ၊ ပြည်သူများ နေအိမ်သို့ ပြောင်းရွှေ့မှုများလည်း မကြာခဏ ကြုံတွေ့နေရသည်။
