သျှမ်းပြည်တောင်ပိုင်း ကျိုင်းတောင်းမြို့အတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA က တပ်သားစုဆောင်းဖို့ ရပ်တန့်ရန်ထုတ်ပြန်ပြီးနောက် မဟာဂျာ (SSS) ပြည်သူ့စစ်က တပ်သားသစ် ကောက်နေကြောင်း စုံစမ်းသိရှိရသည်။

လီဆူးတိုင်းရင်းသား အများဆုံး နေထိုင်သည့် ကျိုင်းတောင်းမြို့ ရပ်ကွက် (၄) ထဲတွင် ယခုလအတွင်း မဟာဂျာဦးဆောင်သည့် SSS ပြည်သူ့စစ် ရာအိမ်မှူးသည် ဒေသခံများကို ပြည်သူ့စစ်ထဲ တပ်သားဝင်လုပ်ရန် ခြိမ်းခြောက်နေကြောင်း သိရသည်။

“ရာအိမ်မှူးက အရင်က ပြည်သူ့စစ်ထဲသွားလုပ်တာ။ သွားလုပ်ပြီးပြန်လာတော့ အခုက တပ်သားတွေ လာကောက်နေတာ။ ပြီးတော့ မလုပ်နိုင်ရင် တစ်လတစ်လ ပိုက်ဆံထောက်ပံ့ပေးရမယ်တဲ့။ ကျေးရွာကနေ ထွက်ပြေးရင်လည်း မြေယာ၊ ခြံ၊ အိမ်၊ လယ်တွေ သိမ်းပစ်မယ်လို့ ပြောတယ်” ဟု အမည် မဖော်လိုသည့် အမျိုးသား တစ်ဦး ကပြောသည်။

SSS ပြည်သူ့စစ်ထံ တပ်သားမလုပ်လိုပါက နေအိမ်၊ ခြံ၊ လယ်ယာများကို သိမ်းဆည်းမည်ဖြစ်ကြောင်းလည်း ပြည်သူများကို ခြိမ်းခြောက်ထားကြောင်း သိရသည်။

ထို့အပြင် ရာအိမ်မှူးက လာရောက်ခြိမ်းခြောက်ပြီးနောက်ပိုင်း ရပ်ကွက် (၄) ဥက္ကဌက ထွက်ပြေး တိမ်းရှောင် သွားပြီး လက်ရှိမှာ ပြည်သူ့စစ်က ၎င်း၏ နေအိမ်ကို သိမ်းလိုက်ပြီဖြစ်ကြောင်း ဒေသခံများ ပြောပြချက်အရ သိရသည်။

“အခုက ရပ်ကွက်ဥက္ကဌက ထွက်ပြေးသွားပြီး။ သူ့အိမ်လည်း ပြည်သူ့စစ်တွေ သိမ်းသွားပြီ။ သူတို့ (SSS) သွားနေ နေပြီ။ သူ့ကို အရင်လာခြိမ်းခြောက်ထားလို့ထင်တယ်” ဟု ဒေသခံ အမျိုးသားတစ်ဦးက ပြောသည်။

အလားတူ ပြီးခဲ့သည့် ဇူလိုင်လပိုင်းတွင် SSS ပြည်သူ့စစ်ကို ပြည်သူ (၃၀) ဦး ပေးခဲ့ရပြီး၊ လက်ရှိမှာ ထပ်မံလာတောင်းနေသောကြောင့် ပြည်သူများက ထပ်မံပေးဆောင်ရန် ခက်ခဲနေကြောင်း သိရသည်။

လက်ရှိမှာလည်း ရပ်ကွက် (၄) အတွင်းတွင် လူငယ်များက ထွက်ပြေးတိမ်းရှောင်နေကြောင်း သိရသည်။

“အခုဆိုရင် ကျနော်တို့ ရပ်ကွက် (၄) မှာ လူငယ်တွေ သိပ်မရှိတော့ဘူး။ လူကြီးတွေပဲ ကျန်တော့တယ်။ အများစုက ထွက်ပြေးနေကြပြီ။ မြို့ထဲက လူငယ်များများ ထွက်ပြေးနေကြတာပါ” ဟု ရပ်ကွက် (၄) က အမျိုးသားတစ်ဦး ပြောသည်။

ကျိုင်းတောင်းမြို့တွင် ယခင်က RCSS/SSA က တပ်သားကောက်ခဲ့သည့် ဒေသတခုဖြစ်သည်။

သို့သော် စက်တင်ဘာ ၄ ရက်နေ့မှစပြီး RCSS/SSA နယ်မြေ စိုးမိုးသည့်ဒေသများတွင် တပ်သားမကောက်ရန် ထုတ်ပြန်ကြေညာခဲ့သည်။

ကျိုင်းတောင်းမြို့သည် စစ်ကောင်စီ၊ RCSS/SSA နှင့် SSS ပြည်သူ့စစ်တို့ သွားလာလှုပ်ရှားနေသည့် ဒေသဖြစ်သည်။