သျှမ်းပြည်အရှေ့ပိုင်း မိုင်းဖြတ်မြို့နယ်တွင် မိုးသည်းထန်စွာသွန်းမှုကြောင့် တောင်ကျချောင်းရေများလာ ကာ နမ့်ဖက်ချောင်းပေါ်ရှိ ဝမ်လုံးရေလွှဲဆည်၏ မြေသားဘောင်များ ကျိုးကျသွားကြောင်း စုံစမ်းသိရသည်။
ယမန်နေ့ (စက်တင်ဘာ ၁၂) ရက် နံနက်ပိုင်းတွင် မိုင်းဖြတ်မြို့နယ်၌ တောင်ကျချောင်းရေကြောင့် နမ့်ဖက်ချောင်းပေါ် ရှိ ဝမ်လုံးကျေးရွာမှ ရေလွှဲမြောင်းတစ်ခု၏ မြေသားဘောင် ရေတိုက်စားပြီး ပေ (၅၀) ခန့် ကျိုးကျသွားကြောင်း ဆည်မြောင်းဦးစီးမှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
“တောင်ကျချောင်းရေထဲက အမှိုက်တွေ၊ သစ်ကိုင်းတွေကြောင့် ဆည်မြောင်း အပေါက်ကို ပိတ်ဆို့တယ်။ ရေလွှဲဆည် အတိုင်းမသွားပဲ ရေလွှဲဆည်ကို ပတ်ပြီး စီးဆင်းသွားတာ။ ဆည်ရဲ့ လက်ဝဲဘက်က မြေသားဘောင်က ပေ (၅၀) လောက်တော့ ကျိုးကျသွားတယ်။ ပျက်စီးဆုံးရှုံးမှုတော့ မရှိပါဘူး” ၎င်း တာဝန်ရှိသူက ပြောသည်။
အဆိုပါ နမ့်ဖက်ချောင်းရေမှ တစ်ဆင့် တာလေမြို့သို့ ဖြတ်ကျော်ပြီး မဲခေါင်မြစ်ထဲသို့ စီးဆင်းသွားသည့် ချောင်းဖြစ်သည်။
ထို့အပြင် ယခုလက်ရှိ ရေလွှဲဆည်၏ မြေသားဘောင်များ ကျိုးကျသွားမှုကြောင့် မည့်သည့် နေရာတွင် ထိခိုက်ပျက်စီးမှု မရှိသေးကြောင်း၊ သက်ဆိုင်ရာ ဆည်မြောင်းဦးစီးဌာနမှ ၎င်းရေလွှဲဆည်များကို ယာယီပြန်လည် ပြုပြင်ထားမည် ဖြစ်ကြောင်းလည်း သိရသည်။
Leave a Comments