သျှမ်းပြည်တောင်ပိုင်း မိုးဗြဲလမ်းပိုင်းတစ်လျှောက်တွင် တိုက်ပွဲပြင်းထန်နေသဖြင့် ဖယ်ခုံ-မိုးဗြဲလမ်းအသုံးမပြုရန် ဖယ်ခုံ PDF မှ တောင်းဆိုထားကြောင်း သတင်းသိရသည်။
ယနေ့ စက်တင်ဘာလ ၁၁ ရက်နေ့တွင် သျှမ်း-ကယားနယ်စပ် မိုးဗြဲမြို့တွင် အာဏာသိမ်း စစ်ကောင်စီနှင့် ပြည်သူ့ကာကွယ်ရေးတပ်ဖွဲ့တို့ တိုက်ပွဲပြင်းထန်နေသည့်အတွက် ဖယ်ခုံ-မိုးဗြဲလမ်းကို အသုံးမပြုရန် Pekhon PDF တပ်ရင်း – ၂ မှ ထုတ်ပြန်ထားသည်။
မိုးဗြဲမြို့တွင်းတွင် စစ်ကောင်စီမှ တပ်စွဲ ရန် ကြိုးစားနေမှုကြောင့် တိုက်ပွဲပိုမိုပြင်းထန်လာနိုင်သည့်အတွက် တားမြစ်ခြင်း ဖြစ်ကြောင်း ဖယ်ခုံ PDF မှ တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
“စကစတွေက မိုးဗြဲမြို့ထဲမှာ တပ်စွဲဖို့ ကြိုးစားနေတယ်ဗျ၊ ပြီးခဲ့တဲ့ ၈ ရက်နေ့ကတည်က ကျနော်တို့ ဖယ်ခုံ PDF ၊ မိုးဗြဲ PDF၊ KNDF KA နဲ့ တခြားတော်လှန်ရေးအင်အားစုတွေ စုပေါင်းပြီးတော့ သူတို့ကို တိုက်နေတာပါ၊ တိုက်ပွဲ က ဒီထက်ပိုပြင်းလာ နိုင်တယ်၊ ဒါကြောင့် ဒီလမ်းတွေကို ပြည်သူတွေ အသုံးမပြုကြဖို့ တောင်းဆိုရတာပါ” ဟု
စက်တင်ဘာ ၈ ရက်ဖြစ်ပွားခဲ့သည် မိုးဗြဲတိုက်ပွဲတွင် ပွဲကုန်း ၃ ရပ်ကွက်ထဲ တွင် ပိတ်မိခဲ့သည့် ကလေးငယ်တစ်ဦး သေဆုံးခဲ့ပြီး၊ ပြည်သူ (၂)ဦး ထိခိုက်ဒဏ်ရာရရှိခဲ့ကြောင်းလည်း သတင်းသိရသည်။
ထို့အပြင် ယမန်နေ့ စက်တင်ဘာလ ၁၀ ရက်နေ့ ညတွင်လည်း တိုက်ပွဲဖြစ်ပွားသည့် မိုးဗြဲ-လွိုင်ကော်လမ်းပိုင်းတွင် ခရီးသည်တင်ကားနှင့် ပြည်သူကားများ ၂ နာရီကျော်ကြာ ပိတ်မိနေပြီး PDF တို့တပ်ဖွဲ့မှ သွားရောက်ကယ်ယူ ခဲ့ရကြောင်းလည်း သတင်းသိရသည်။
“မနေ့ညမှ အံစာတုန်းကား ၆ စီး၊ အိမ်စီးကား ၂ စီးက ညနေ ၆ နာရီဝန်းကျင်ကနေ ၈ နာရီကျော်အထိ တိုက်ပွဲကြားမှာ ပိတ်မိနေခဲ့တာ ကျနော်တို့ ကယ်ထုတ်နိုင်ခဲ့ပါတယ်၊ ဒီလိုမျိုးတွေ ထပ်မဖြစ်စေဖို့လည်း ပြည်သူတွေ အသွားအလာ ဂရုစိုက်ကြဖို့ သတိထားကြဖို့ ကျနော်တို့ ပြောချင်ပါတယ်” ဟု ၎င်းက ဆိုသည်။
ယနေ့ စက်တင်ဘာလ ၁၁ ရက်တွင်လည်း တိုက်ပွဲဆက်လက်ဖြစ်ပွားနေပြီး စစ်ကောင်စီဘက်မှ လေယာဥ် အကူဖြင့် PDF တပ်ဖွဲ့များကို တိုက်ခိုက်နေကြောင်း သိရသည်။
ယနေ့ တိုက်ပွဲဖြစ်စဥ်နှင့် ပက်သက်ပြီး ထိခိုက်ကျဆုံးမှု အခြေအနေကို သျှမ်းသံတော်ဆင့် အနေဖြင့် အတည်မပြုနိုင်သေးပေ။
Leave a Comments