သျှမ်းပြည်မြောက်ပိုင်း မူဆယ် – ၁၀၅ မိုင် ကားလမ်းပေါ်တွင် အမည်မသိ အဖွဲ့အစည်းတစ်ခုမှ ရဲတပ်ဖွဲ့ ဝတ်စုံဝတ်ပြီး ပြည်သူများကို ဓားပြတိုက်မှု ပြုလုပ်နေကြောင်း စုံစမ်းသိရသည်။
ပြီးခဲ့သည့် ရက်ပိုင်းမှာ မူဆယ်မြို့မှ ၁၀၅ မိုင်သို့ သွားသည့် ကားလမ်း နမ့်ခွမ်ကျေးရွာအနီးတွင် စစ်ကောင်စီ ၏ ရဲဝတ်စုံဖြင့် ဝတ်ဆင်ထားသော ဓားပြတိုက်အဖွဲ့ (၂) ဦးသည် ခရီးသည်လင်မယားကိုတားဆီး စစ်ဆေးမှု ပြုလုပ်ပြီး ဆိုင်ကယ်အသစ် တစ်စီး ပိုက်ဆံ (၃)သောင်းနှင့် ဖုန်း ၂ လုံးကို ဓားပြတိုက်လုယူသွားကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ လွန်ခဲ့တဲ့ (၆) ရက်က နမ့်ခုံကျေးရွာမှာရှိတဲ့ အမှိုက်စွန့်ပစ်တဲ့ နေရာတစ်ခုမှာ အလုခံရတာ။ ရဲဝတ်စုံဝတ်တဲ့ လူနှစ်ယောက်က ဆိုင်ကယ်လာတား ပြီးတော့ မှတ်ပုံတင်ပါလားမေးတယ်။ အဲ့လိုမေးရင်း နောက်တစ် ယောက်က အနောက်ကိုလာပြီး ဆိုင်ကယ်ကိုလုသွားတာ။ ပြီးတော့ နောက်တစ်ယောက်က ပိုက်ဆံကိုလုတယ်” ဟု ၎င်းအမျိုးသားက ဆိုသည်။
အဆိုပါ ရဲဝတ်ပုံစံဖြင့် ဝတ်ထားသော ဓားပြတိုက်လူနှစ်ဦးအပြင် ဘေးပတ်ဝန်းကျင်တွင်လည်း ဆိုင်ကယ်ဖြင့် ရပ်စောင့်နေသည့် သူများလည်းရှိကြောင်း သိရသည်။
“ အဲ့ဒီနေရာမှာက ပြည်သူခဏခဏ အလုခံရတယ်။ သူတို့မှာ လူအင်အားများတယ်။ နှစ်ယောက်ထဲ မဟုတ်ဘူးဗျ။ သူတို့လုပြီးရင် ထွက်ပြေးဖို့အတွက် ဆိုင်ကယ် နဲ့ စောင့်ထားတဲ့လူတွေ အသင့်ရှိတယ်။ ပြီးတော့ ဆိုင်ကယ်အဟောင်းဆို သူတို့က မလုဘူး။ ဆိုင်ကယ်အကောင်းတွေကို ရွေးပြီးလုတာ” ဟု အသက် (၃၀)ကျော် အရွယ်ရှိလူငယ်တစ်ဦးက သျှမ်းသံတော်ဆင့် ကိုပြောသည်။
စစ်အာဏာသိမ်းပြီးနောက် မူဆယ်မြို့နယ်အတွင်း သူခိုး၊ ဓားပြတိုက်မှု၊လုယက်မှုများ နေ့စဥ်နှင့်အမျှ ရှိနေသော်လည်း သက်ဆိုင်ရာမှ တာဝန်ယူဖမ်းဆီးခြင်း တကြိမ်တခါမျှမရှိခဲ့ပေ။
“ မူဆယ်က အခြေအနေတော်တော်ဆိုးတယ်။ နေ့တိုင်း ဓားပြတိုက်တယ်၊ သူခိုးရှိတယ်၊ ဒါပေမယ့် ဘယ်သူမှ အရေးယူတာမရှိဘူး။ ရဲဝတ်စုံနဲ့ ဓားပြတိုက်၊ လုယက်မှုရှိတော့ ပိုဆိုးတာပေါ့။ အခုဆိုရင် ဆိုင်ကယ်နဲ့ အပြင်မထွက်ရဲတဲ့ဘဝပဲ” ဟု အသက် (၃၀)ကျော်အရွယ်ရှိ လူငယ်က ဆိုသည်။
ပြီးခဲ့သည့် စက်တင်ဘာ ၇ ရက် နံနက် ၆ နာရီတွင် မူဆယ်မြို့ရှိ ငွေလဲလှယ်သူ၏ နေအိမ်မှာ အမည်မသိ လူလတ်ပိုင်း (၃) ဦးက လာရောက်ပြီး သေနတ်ဖြင့် ခြိမ်းခြောက်မှု ပြုလုပ်ကာ မြန်မာကျပ်ငွေ သိန်း (၅၀၀) ဓားပြတိုက် ယူသွားကြောင်း သိရသည်။
Leave a Comments