Thursday, May 30, 2024

တာချီလိတ်မြို့ ရေကြီးရေလျှံမှု ထပ်မံကြုံတွေ့ရ

Must read

သျှမ်းပြည်အရှေ့ပိုင်း တာချီလိတ်မြို့တွင် ယမန်နေ့ (စက်တင်ဘာ ၁၀)ရက် မှ စပြီး မိုးရွာသွန်းမှုကြောင့် မယ်ဆိုင်ချောင်းရေများ ပြန်လည် မြင့်တက်ကာ အနိမ့်ပိုင်းရပ်ကွက်၌ ရေကြီးရေလျှံမှု ထပ်မံကြုံတွေ့နေရကြောင်း သတင်းရရှိသည်။

တာချီလိတ် ရေကြီးရေလျှံမှု ထပ်မံကြုံရ

ယမန်နေ့ (စက်တင်ဘာ ၁၀) ရက် ည ၁၀ နာရီခန့် က မိုးရွာသွန်းမှုကြောင့် တာလော့ဈေး၊ ဆန်ဆိုင်းရပ်ကွက်၊ ပုန်းထွန်လမ်းမ၊ မကာဟိုခမ်းရပ်ကွက်၊ မေဖလားဝါးကွင်း နှင့် အမှတ် (၁) တံတား အနီးတဝိုက် ရေကြီးရေလျှံမှု ထပ်မံကြုံတွေ့နေရကြောင်း တာချီလိတ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ မနေ့ည (၁၀) နာရီလောက် မိုးစရွာပြီး (၂) နာရီလောက်မှ မိုးကသိပ်တာ။ ဒီမနက်ရောက်တော့ ရေတွေပြန်တက် နေတာပေါ့။ မယ်ဆိုင်ချောင်းရေက နည်းနည်းပြန်ကျသွားပြီ။ တချို့ရပ်ကွက်တွေမှာတော့ ရေရှိနေတုန်းပဲ။ အရင်တစ်ခေါက် ရေကြီးခဲ့လို့ ရေနုတ်ချောင်း တွေမှာ ရွှံ့၊ နှုန်း တွေ ပြည့်နေတယ်။ အဲ့ဒါကို မရှင်းတော့ အခုမိုးလေးနည်းနည်းရွာရင် ရေကြီးနေတယ် “ ဟု ၎င်းအမျိုးသားတစ်ဦးက ပြောသည်။

တာချီလိတ်ရေကြီးရေလျှံမှု ထပ်မံကြုံရ

သျှမ်းရှေ့ တာချီလိတ်မြို့နယ်အတွင်း သယံဇာတ ဓာတ်သတ္တုတူးဖော်မှုများကို တွင်တွင်ကျယ်ကျယ်ပြုလုပ်နေကြသဖြင့် သဘာဝပတ်ဝန်းကျင်များသည် ယခင်ကထက် ပျက်စီးကာ မိုးရာသီတွင်ရေကြီးရေလျှံမှုဖြစ်ပြီး၊ နွေရာသီတွင် ရေခန်းခြောက်မှုကို ပြည်သူများ ကြုံတွေ့လာရသည်။

တာချီလိတ်မြို့တွင် သြဂုတ် လလယ်ပိုင်းတွင် တောင်ကျချောင်းရေများကြောင့် တမြို့လုံးနီးပါး ရေကြီးရေလျှံမှုဖြစ်ပွားကာ ပျက်စီးဆုံးရှုံးမှုဖြစ်ပွားခဲ့ကြောင်း သိရသည်။

Leave a Comments

- Advertisement -spot_img

Latest article