သျှမ်းပြည်တောင်ပိုင်း မိုးဗြဲမြို့ တိုက်ပွဲကြားပိတ်မိခဲ့သည့် အသက် (၈)နှစ်အရွယ်ကလေးသေဆုံးခဲ့ပြီး၊ ပြည်သူ (၂) ဦး ထိခိုက်ဒဏ်ရာရကြောင်း စုံစမ်းသိရှိရသည်။
စက်တင်ဘာ ၈ ရက်တွင် မိုးဗြဲမြို့ အတွင်း စစ်ကောင်စီ နှင့် မိုးဗြဲ PDF တို့ တိုက်ပွဲဖြစ်ပွားခဲ့ပြီး၊ မိုးဗြဲမြို့ ပွဲကုန်း ၃ ရပ်ကွက်ထဲ တွင် ပိတ်မိခဲ့သည့် ကလေးငယ်တစ်ဦး သေဆုံးခဲ့ပြီး၊ ပြည်သူ (၂)ဦး ထိခိုက်ဒဏ်ရာရရှိကြောင်း မိုးဗြဲဒေသခံ အမျိုးသမီးတစ်ဦးကသျှမ်းသံတော်ဆင့်ကိုပြောသည်။
“ သူတို့က တိုက်ပွဲထဲမှာ တစ်ရက်ပိတ်မိနေတာ။ မနေ့ကမှ ပဲ သွားထုတ်လာနိုင်ခဲ့တာ။ (၂) ဦး ဒဏ်ရာရပြီး ကလေး ငယ်တစ်ဦးသေဆုံးသွားတယ်။ လက်နက်ကြီးထိမှန်ပြီးသေဆုံးသွားလို့ ခန့်မှန်းလို့ရတယ်။ ကလေးအဖေလည်းဒဏ်ရာရခဲ့တယ်” ဟု မိုးဗြဲမြို့ ဒေသခံ အမျိုးသမီးတစ်ဦးက ပြောသည်။
အဆိုပါ တိုက်ပွဲတွင် စစ်ကောင်စီဘက်မှ လေယာဉ် ဖြင့် လက်နက်ကြီးများလာရောက် ပစ်ခတ်ခဲ့သောကြောင့် မိုးဗြဲPDF တပ်ဖွဲ့ဘက်မှ (၅) ဦး ထိခိုက်ဒဏ်ရာရရှိခဲ့ကြောင်း သိရသည်။
အလားတူ ယနေ့အထိ စစ်ရေးတင်းမာနေပြီး ပြည်သူများအနေဖြင့် အသွားအလာကို သတိထားရန် PDF ဘက်မှ ထုတ်ပြန်ထားသည်။
ထိုအပြင် တိုက်ပွဲကြောင့် ပြည်သူ နေအိမ်အများပြားပျက်စီးခဲ့ရကြောင်း သိရသည်။
“ တပ်ရင်းဘက်တော့ ၅ ယောက်လောက်ကတော့ ဒဏ်ရာ အနည်းငယ်စီရကြတယ်။ သိပ်တော့မစိုးရိမ်ရဘူး။ စစ်ကောင်စီဘက်တော့ ၁၅ ယောက်လောက်တော့ သေဆုံးတယ်။ ပြီးတော့ ပြည်သူ နေအိမ်တွေ တစ်ချို့လည်း လက်နက်ကြီးကြောင့် ပျက်စီးသွားတယ်” ဟု မိုးဗြဲ PDF တပ်ဖွဲ့မှ တပ်သားတစ်ဦးက ပြောသည်။
မိုးဗြဲမြို့တွင် စက်တင်ဘာ ၈ ရက်မှစကာ ယနေ့ အထိ တိုက်ပွဲဖြစ်ပွားနေပြီး စစ်ရေးတင်းမာနေဆဲဖြစ်ကြောင်း သိရသည်။
ယမန့်နေတွင် တိုက်ပွဲကြား ပိတ်မိနေသည့် ပြည်သူ ၁၂ ဦးကိုလည်း PDF တပ်ဖွဲ့ဘက်မှ သွားရောက်ကယ် ထုတ်လာနိုင်ခဲ့ကြောင်းသိရသည်။
