သျှမ်းပြည်မြောက်ပိုင်း ကွတ်ခိုင်မြို့နယ် နှင့် သိန္နီမြို့နယ်ကြားတွင် အာဏာသိမ်း စစ်ကောင်စီတပ်ဖွဲ့ နှင့် တိုင်းရင်းသားလက်နက်ကိုင် တပ်ဖွဲ့တို့ ထိတွေ့တိုက်ပွဲ ၅ ရက် ဆက်တိုက်ဖြစ်ပွားခဲ့ကြောင်း သတင်းသိရသည်။
ယနေ့ စက်တင်ဘာလ ၉ ရက်နေ့ နံနက် ၁၀ နာရီ ၁၅ မိနစ်မှ ၁၁ နာရီဝန်းကျင်အထိ ကွတ်ခိုင်မြို့နယ် လွိုင်ဆမ်ဆစ် တောင်ခြေ အနီးတွင် စစ်ကောင်စီတပ်ဖွဲ့ နှင့် ကချင်လွတ်မြောက်ရေးတပ်မတော် (KIA) တို့ ထိတွေ့တိုက်ပွဲ ပြင်းထန်ခဲ့ကြောင်း ဒေသခံများထံမှ သိရသည်။
“ဒီနေ့ တိုက်ပွဲလည်း တော်တော်ကို ပြင်းထန်ခဲ့ပါတယ်၊ လွိုင်ဆမ်ဆစ်တောင်ခြေအနီးက နမ့်ပါခီးကျေးရွာလမ်းခွဲ နားမှာ ထိတွေ့ တိုက်ပွဲဖြစ်တာ၊ အဲ့နေရာနားတစ်ဝိုက်မှာ KIA က လှုပ်ရှားနေတယ်၊ ဒီတိုက်ပွဲကြောင့် ထိခိုက် ဒဏ်ရာရမှုတော့ မသိရဘူး” ဟု အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် အဆိုပါ လွိုင်ဆမ်ဆစ်တောင်ခြေ တောအုပ်၌ KIA တပ်ဖွဲ့မှ နေရာယူထားနေလျက်ရှိပြီး စစ်ကောင်စီ တပ်ဖွဲ့မှ တိုးချဲ့လှုပ်ရှားပါက တိုက်ပွဲထပ်မံဖြစ်ပွား နိုင်ကြောင်းလည်း ဒေသခံများက ပြောသည်။
ထို့အပြင် ယမန်နေ့ (စက်တင်ဘာ ၈) ရက် တွင်လည်း ကွတ်ခိုင်မြို့နယ် မန်ပိန်းကျေးရွာအတွင်းရှိ KIA တပ်ဖွဲ့အနီးသို့ အင်အားဖြည့်တင်းမှုများ ပြုလုပ်ခဲ့ပြီးနောက် ညနေ ၅ နာရီတွင် ထိတွေ့တိုက်ပွဲဖြစ်ပွားခဲ့ကြောင်းလည်း သိရသည်။
“ပြီးခဲ့တဲ့ ၅ ရက်ကတည်းက တိုက်ပွဲတွေ ဖြစ်ခဲ့တာပါ၊ မနေ့ကလည်း မန်ပိန်းနား ရှိနေတဲ့ KIA တပ်ဖွဲ့နားကို စစ်ကောင်စီက အင်အားဖြည့်ပြီး အနီးကပ်လို့ ထိတွေ့တိုက်ပွဲဖြစ်ခဲ့သေးတယ်၊ အခုချိန်ထိ နှစ်ဦးနှစ်ဖက် စစ်ရေးတင်းမာနေတုန်းပဲ” ဟု မန်ပိန်းကျေးရွာအုပ်စုမှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာလ ၆ ရက် ည ၇ နာရီခွဲဝန်းကျင်တွင် သိန္နီတိုးဂိတ်အနီး စစ်ကောင်စီ နှင့် KIA တို့ ပြင်းထန်စွာ တိုက်ပွဲဖြစ်ပွားခဲ့ပြီး မော်ဟစ်ကျေးရွာမှ ကလေးငယ် နှစ်ဦး အပါအဝင် ဒေသခံ ၃ ဦး လက်နက်ကြီးကျည်ထိမှန်ပြီး ဆေးကုသမှု ခံယူနေကြောင်း သတင်းသိရသည်။
လက်ရှိ ကွတ်ခိုင်မြို့နယ်အတွင်းတွင် အာဏာသိမ်း စစ်ကောင်စီတပ်ဖွဲ့ နှင့် KIA တို့က စစ်အင်အားဖြည့်တင်းမှုများ အပြိုင်လုပ်နေပြီး စစ်ရေးတင်းမာနေလျက်ရှိကြောင်း ဒေသခံများထံမှ သိရသည်။
Leave a Comments