သျှမ်းပြည်မြောက်ပိုင်း ကွတ်ခိုင်မြို့နယ် ဇွပ်အောင်စစ်ရှောင်စခန်း စာသင်ခန်းထဲ ကိုးကန့်တပ်မတော် (MNDAA) တပ်ဖွဲ့က ဝင်ရောက်လာပြီး တပ်သားအချင်းချင်း စကားများမှု ဖြစ်ပွားမှုကြောင့် ကလေးငယ်နှင့် ကျောင်းဆရာမများ စိုးရိမ်ကြောက်လန့်နေကြကြောင်း စုံစမ်းသိရသည်။

ပြီးခဲ့သည့် စက်တင်ဘာ ၆ ရက်တွင် MNDAA တပ်သားတစ်ဦး စစ်ရှောင်စခန်းထဲရှိ စာသင်ခန်းထဲသို့ ဝင်လာပြီး ရန်ဖြစ်ပွားခဲ့ကာ ကလေးငယ်များနှင့် ဆရာမများက စိုးရိမ်ထိတ်လန့်နေကြောင်း စစ်ရှောင် အမျိုးသမီးတစ်ဦးက သျှမ်းသံတော်ဆင့် သို့ပြောသည်။

“ ဒီ ဇွပ်အောင်မှာက စစ်ဘေးရှောင်စခန်းအနေနဲ့ ရှိနေတဲ့အချိန်မှာ ဒီလိုလက်နက်ကိုင်တွေက လာရှိနေတော့ ကျမတို့ပြည်သူတွေက စိုးရိမ်ရတာပေါ့။ စစ်ကိုဘယ်သူမဆိုကြောက်တာပေါ့နော်။ သေနတ်ကို ဘယ်သူမဆိုကြောက်တယ်။ သူတို့အချင်းချင်း ရန်ပဲ ဖြစ်ဖြစ် ကျမတို့ပြည်သူတွေက စိုးရိမ်တာပေါ့” ဟု စစ်ဘေးရှောင် အမျိုးသမီးတစ်ဦးက ပြောသည်။

ပြီးခဲ့သည့် စက်တင်ဘာ ၆ ရက်နေ့သည် MNDAA တပ်သားတစ်ဦး စာသင်ခန်းထဲဝင်လာပြီး ဆရာမ စာသင်နေတာကို လာရောက်ကြည့်ပြီး တပ်သား ၃ ဦးက ထို တပ်သားတစ်ဦးကို လာခေါ်ဆောင်ရာမှ ရန်ဖြစ်ပွားမှုဖြစ်ပွားခဲ့ကြောင်း သိရသည်။

“ အဲ့နေ့က ဆရာမ စာသင်နေတာကို တပ်သားတစ်ဦးက စာသင်နေတဲ့ အခန်းရှေ့ကနေ လာကြည့်တာ။ တစ်ခြားတပ်သားကသူ့ကိုလာခေါ်တယ်။ အဲ့ဒါ ကလေးတွေက ကြည့်တော့ သူလည်းရှက်သွားပြီး စကားများသွားကြတာပါ။ စကားများ ရန်ဖြစ်သွားတာပေါ့။ ပြီးတော့ သူက ဘောလုံးကွင်းမှာသွားနေတာလေ” ဟု အမည်မဖော်လိုသည့် ဆရာမတစ်ဦးက ပြောသည်။

ဇွပ်အောင်စစ်ရှောင်ထဲကို ကိုးကန့်တပ်မတော် MNDAA က ၂၀၂၂ နှစ်စပိုင်းမှ ဝင်ရောက်နေထိုင်ခဲ့ကြောင်း သိရသည်။

ပြီးခဲ့သည့် ဇွန် ၁၇ ရက် တွင် ကွတ်ခိုင်မြို့အနီးပတ်ဝန်းကျင်မှ ပစ်ခတ်သံ များ ထွက်ပေါ်လာပြီး ဇွပ်အောင်စစ်ရှောင်စခန်းအတွင်းသို့ လက်နက်ကြီးကျရောက်ခဲ့ကာ စစ်ရှောင် ၃ ဦးသေဆုံးခဲ့ပြီး တစ်ဦး ဒဏ်ရာရရှိခဲ့ကြောင်းသိရသည်။