သျှမ်းပြည်တောင်ပိုင်း မိုးဗြဲမြို့တွင် စစ်ကောင်စီ နှင့် မိုးဗြဲ PDF တို့ တိုက်ပွဲဖြစ်ပွားခဲ့ပြီး မြို့တွင်း တိုက်ပွဲအကြား ပြည်သူတစ်ချို့ ပိတ်ခံနေရကြောင်း စုံစမ်းသိရသည်။
ယမန်နေ့ စက်တင်ဘာ ၈ ရက်နေ့ စစ်ကောင်စီ နှင့် မိုးဗြဲ PDF တိုက်ပွဲကြောင့် ပြည်သူတစ်ချို့ မြို့ပြင်ကျေးရွာ သို့ထွက်ပြေးတိမ်းရှောင်ရပြီး ပြည်သူတစ်ချို့က ပိတ်နေကြောင်း သိရသည်။
“ တိုက်ပွဲဖြစ်တဲ့နေရာက လုံခြုံရေးအရတော့ ပြောလို့မရဘူးဗျ။ မနေ့က တိုက်ပွဲကြောင့် ပိတ်မိနေတဲ့ ပြည်သူတစ်ချို့ကလည်း ရှိတယ်။ တစ်ချို့ကလည်း မြို့ပြင်ကိုထွက်ပြေးတိမ်းရှောင်သွားတာရှိတယ်” ဟု မိုးဗြဲ PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
အလားတူ Mobye Recuse Team က “ အကူညီတောင်းလာတော့ မရှိသေးဘူး။ စစ်ဘေးတော့ တစ်ချို့ကရှောင်ရတယ် လို့ပြောတယ်။ တိုက်ပွဲက မြို့ထဲဖြစ်တာ။ တစ်ချို့က နီးစပ်တဲ့ ဘုန်းကြီးကျောင်းတွေမှာ ထွက်ပြေးတိမ်းရှောင်ကြတာ။ ကျမတို့အဖွဲ့ ကနေတော့ သွားကူပေးရတာတော့ မရှိသေးဘူး” ဟု တာဝန်ရှိသူတစ်ဦးက ပြောသည်။
အဆိုပါ ယမန်နေ့ တိုက်ပွဲတွင် စစ်ကောင်စီဘက်က အနည်းဆုံး ၁၀ ဦး သေဆုံးခဲ့ပြီး ၁၂ ဦး ထိခိုက်ဒဏ်ရာရခဲ့ကြောင်း ၊ မိုးဗြဲ PDF ဘက်မှ ၃ ဦး ဒဏ်ရာ အနည်းငယ်ရရှိခဲ့ကြောင်း မိုးဗြဲ PDF ဘက်မှ ထုတ်ပြန်ခဲ့သည်။
ထိုအပြင် စစ်ကောင်စီ၏ လက်နက်ခဲယမ်းများကို မိုးဗြဲ PDF အဖွဲ့ မှ သိမ်းဆည်းနိုင်ခဲ့ကြောင်း ထုတ်ပြန်ထားသည်။
အလားတူ ယနေ့ (စက်တင်ဘာ ၉ )ရက် နံနက်ပိုင်းအထိ တိုက်ပွဲဖြစ်ပွားနေကြောင်း သိရသည်။
“ ဒီနေ့ မနက်ထိတော့ တိုက်ပွဲအနည်းငယ်ဖြစ်သေးတယ်။ အခုတော့ ငြိမ်နေပါတယ်။ မနေ့က တစ်ရက်လုံးဖြစ်တာ။ ပြီးတော့ သူတို့မနေ့က ဖယ်ခုံဘက်ကနေ စစ်အင်အားဖြည့်တင်းနေတာလည်းရှိနေတယ်” ဟု မိုးဗြဲမြို့ PDF တပ်ရင်း ၂ မှ PDF တပ်သားတစ်ဦး က သျှမ်းသံတော်ဆင့်ကို ပြောသည်။
မိုးဗြဲမြို့သည် စစ်ကောင်စီ နှင့် မိုးဗြဲ PDF တို့ တိုက်ပွဲ ၁ လ ကြာရပ်နားထားပြီး ယမန်နေ့မှ တိုက်ပွဲပြန်လည် စတင်ဖြစ်ပွားခဲ့ကြောင်း သိရသည်။
