သျှမ်းပြည်မြောက်ပိုင်း မူဆယ်မြို့ တောင်ရပ်ကွက်ရှိ မြန်မာ – တရုတ်ငွေလဲလှယ်သည့် အိမ်ကို ယနေ့ (စက်တင်ဘာ ၇)ရက် နံနက် (၆)နာရီဝန်းကျင်တွင် အမည်မသိလက်နက်ကိုင် (၃)ဦးက ဝင်ရောက်ဓားပြတိုက်ခဲ့ကြောင်း သတင်းရရှိသည်။
အဆိုပါ အမည်မသိ လက်နက်ကိုင် (၃)ဦးသည် ယနေ့ နံနက် (၆)နာရီဝန်းကျင်တွင် ကားတစ်စီးဖြင့် မြန်မာ–တရုတ်ငွေလဲလှယ်သည့်နေအိမ်ကိုရောက်လာပြီး သေနတ်တို၊ ရှည် နှင့် ဓားတို့ကိုင်ဆောင်လာပြီး သေနတ်တစ်ချက်ပစ်ဖောက်ကာ ဓားပြတိုက်သွားကြောင်း မူဆယ်မြို့ ဒေသခံ အမျိုးသားတစ်ဦး သျှမ်းသံတော်ဆင့်ကို ပြောသည်။
“ ကားတစ်စီးနဲ့ လူ(၃) ယောက်ကလာတာ။ သေနတ်တွေလည်း အရှည်၊ အတိုတွေပါတယ်။ ဓားလည်းပါတယ်။ သေနတ်ကို တစ်ချက်ဖောက်ပြီးတော့ ဓားပြလာတိုက်သွားတာ။ အဲအိမ်က တရုတ်ငွေလဲပေးတဲ့အိမ်ဖြစ်တယ်။ ဗီရိုတွေ၊ မီးခံသေတ္တာတွေ အိပ်ခန်းတွေ အားလုံးမွှေသွားတယ်” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
ထိုဓားပြတိုက်မှုကြောင့် လူထိခိုက်မှုမရှိသော်လည်း ငွေ သိန်း (၅၀၀) ဝန်းကျင် ဆုံးရှုံးသွားသည့်အပြင် အိမ်တွင်းတပ်ဆင်ထားသည့် CCTV များကိုလည်း ဖြုတ်ယူသွားကြောင်း သိရသည်။
“ လူထိခိုက်တာတော့ မရှိဘူး။ ဒါပေ့မဲ ပိုက်ဆံ သိန်း (၅၀၀) လောက်တော့ ပါသွားတယ်။ သူတို့တွေက CCTV တွေကိုလည်း ဖြုတ်သွားတယ်” ဟု မူဆယ်မြို့ ဒေသခံတစ်ဦးက ပြောသည်။
မူဆယ်ခရိုင်သည် ကချင်လွတ်မြောက်ရေးတပ်မတော် (KIA)၊ တအာင်း(ပလောင်) အမျိုးသား လွတ်မြောက်ရေးတပ်မတော် (TNLA)၊ ရှမ်းပြည်တိုးတက်ရေးပါတီ၊ရှမ်းပြည်တပ်မတော် (SSPP/SSA)၊ ကိုးကန့်တပ်မတော် (MNDAA) နှင့် ပြည်သူ့စစ် အများအပြား လှုပ်ရှားရာ နယ်မြေဖြစ်သည်။
ထို့အပြင် မူဆယ်မြို့တွင် စစ်အာဏာသိမ်းပြီးနောက်ပိုင်း ခိုးမှု၊ လုယက်မှု၊ ဓားပြတိုက်မှုများနေ့စဉ်နဲ့အမျှရှိနေသော်လည်း သက်ဆိုင်ရာ အာဏာပိုင်များက အရေးယူမှု မရှိကြောင်းသိရသည်။
Leave a Comments