သျှမ်းပြည်မြောက်ပိုင်း ကွတ်ခိုင် – သိန္ဒီတိုးဂိတ် အနီး ယနေ့ (စက်တင်ဘာ ၆) ရက် ည ၈ နာရီဝန်းကျင်မှ စတင်ကာ တိုက်ပွဲဖြစ်ပွားခဲ့ပြီး ကလေးငယ်တစ်ဦး ကျည်ထိမှန်ခဲ့ကြောင်း စုံစမ်းသိရှိရသည်။
အဆိုပါ တိုက်ပွဲကြောင့် ကွတ်ခိုင်မြို့အထွက် မော်ဟစ်ကျေးရွာမှ ကလေးငယ်တစ်ဦး လက်နက်ကြီးထိမှန်ခဲ့ကြောင်း ကွတ်ခိုင်ဒေသခံတစ်ဦးက သျှမ်းသံတော်ဆင့်ကိုပြောသည်။
“သိန္ဒီဂိတ်မှာ ဗုံး ၅ လုံး ၆ လုံးလောက် ကျလာတယ်။ ကွတ်ခိုင်မှာတော့ နှစ်ဖက် ပစ်ခတ်သံ (၂) ဖက်ကြားရတယ်။ ကလေးတယောက်ထိတယ်လို့ကြားတယ်။ တခြားထိခိုက်မှုတော့မသိရသေးဘူး” ဟု ကွတ်ခိုင် ဒေသခံ တစ်ဦး ကပြောသည်။
လက်ရှိ သတင်းရေးသားအချိန်ထိ စစ်ကောင်စီဘက်က လက်နက်ကြီးဖြင့် ပြန်လည် ပစ်ခတ်သဖြင့် မော်ဟစ်ကျေးရွာ အတွင်း လက်နက်ကြီးကျ ရောက်ကြောင်း သိရသည်။
ထို့ပြင် ယနေ့ မွန်းလွဲ ၃နာရီခွဲဝန်းကျင်တွင်လည်း ကွတ်ခိုင်မြို့နယ် နမ့်ဖတ်ကာ ဟန်ကိုင်ကျေးရွာအနီး ကချင်လွတ်မြောက်ရေးတပ်မတော် (KIA) တပ်ဖွဲ့ရှိရာနေရာသို့ စစ်ကောင်စီမှ တိုက်လေယာဥ်ဖြင့် ထိုးစစ်ဆင်ခဲ့ကြောင်းသိရသည်။
Leave a Comments