သျှမ်းပြည်တောင်ပိုင်း ရပ်စောက်မြို့နယ် ကျောက်ဂူတိုက်နယ် ထမင်းပေါင်းကျေးရွာတွင် စစ်ကောင်စီတပ်သား တစ်ဦးကို ဓားဖြင့်ခုတ်သတ်ခဲ့သည့် လူငယ်ကို ယနေ့ထိ မဖမ်းဆီးနိုင်သေးကြောင်း စုံစမ်းသိရသည်။

ပြီးခဲ့သည့် သြဂုတ်လ ၃၁ ရက် ညနေပိုင်းတွင် ကျောက်ဂူတိုက်နယ်၊ ထမင်းပေါင်းကျေးရွာကို စစ်ကောင်စီ တပ်သားများက ရောက်လာပြီး ကျွဲရောင်းသူ အသက် ၅၀ ဝန်းကျင် ဦးအောင် (နာမည်လွဲ) ဖမ်းချုပ်ပြီး ကားပေါ်တင်သည့်အတွက် အနီးရှိနေသည့် သားဖြစ်သူမှ ဓားဖြင့်ခုတ်လိုက်ရာ စစ်ကောင်စီ ဆေးမှူးတစ်ဦး သေဆုံးခဲ့သည်။

ထို့ကြောင့် စစ်ကောင်စီတပ်သားကို ဓားဖြင့် ခုတ်သတ်ခဲ့သည့် လူငယ်ကို မဖမ်းဆီးနိုင်သေးသဖြင့် စစ်ကောင်စီ အုပ်စုမှ ၎င်း၏ မိသားစုဝင်များကို နည်းမျိုးစုံဖြင့် လာရောက်ခြိမ်းခြောက်နေကြောင်းလည်း သိရသည်။

“စကစတွေက ကားတစ်စီးနဲ့ ငါးယောက်၊ ဆိုင်ကယ်တစ်စီးနဲ့ နှစ်ယောက်လာတယ်၊ ကျွဲကြည့်ချင်တယ် ဆိုပြီး အဲ့မှာ သူ့ ဖခင်ကိုဖမ်းသွားတာ။ ကောင်လေးက ရွာလူကြီးကိုလည်း ခေါ်သင့်တယ်လို့ပြောတာ၊ အဲ့ချိန်မှာသူ့ကိုပါ ဖမ်းဖို့ လုပ်လို့ ဓားနဲ့ပိုင်းခုတ်လိုက်တာ စကစ ဆေးမှူး တစ်ယောက် က အဲ့နေရာမှာတင်ပွဲချင်းပြီးသေသွားတယ်၊ ကောင်လေးက ထွက်ပြေး လွှတ်သွားတယ်” ဟု ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါစစ်ကောင်စီ တပ်သားများသည် ရပ်စောက်မြို့နယ်အတွင်း လှုပ်ရှားနေသည့် အရှေ့အလယ်ပိုင်းတိုင်းစစ်ဌာနချုပ် လက်အောက်ခံ အမှတ် ၂၉၂ ခြေလျင်တပ်ရင်းမှ စစ်သားများဖြစ်ကြပြီး ဓားချက်ကြောင့် သေဆုံးရသည့် စစ်ကောင်စီ ဆေးမှူး ၏ ရုပ်အလောင်းကို ရွာသားများက တပ်အတွင်းသို့ ပို့ဆောင်ပေးခဲ့သည်။

လက်ရှိတွင် ဖခင်ဖြစ်သူ ဦးအောင်က စစ်ကောင်စီတပ်ဖွဲ့တို့၏ ဖမ်းဆီးခြင်းကို ခံထားရပြီး ထွက်ပြေးလွှတ်မြောက်နေသည့် သားဖြစ်သူကိုဖမ်းဆီးနိုင်ခြင်းမရှိပါက မိသားစုဝင်တွေ အသတ်ခံရမည်ဟု ကျန်ရစ်သူ မိသားစုဝင်များကို ထပ်မံလာရောက် ခြိမ်းခြောက်ပြောဆို ခဲ့ကြောင်း ဒေသခံများက ပြောသည်။

“ဖခင်ဖြစ်သူကိုတော့ သူတို့ဖမ်းထားတယ်၊ ကောင်လေးကိုလည်း အသည်းအသန်လိုက်ရှာနေတယ်၊ မိသားစုဝင် တွေလည်း သူ့ကို (လွတ်မြောက်နေသောသူ) ရှာမတွေ့ရင် အသတ်ခံရမယ်လို့ ခြိမ်းခြောက်ခံထားရတယ်၊ လက်ရှိသူ့အမေဖုန်းကို စကစ က သိမ်းသွားပြီး အဲ့ဖုန်းနဲ့ ကောင်လေးကို အချိတ်အဆက်လုပ်နေတယ် လို့ ကြားတယ်” ဟု ဒေသခံအမျိုးသား တစ်ဦးက ပြောသည်။

ထို့အပြင် ယခုလ (စက်တင်ဘာ ၁) ရက် နံနက် ၁၀ နာရီတွင်လည်း အင်အား ၁၀ယောက်ရှိသည့် စစ်ကောင်စီ တပ်သားတို့သည် စစ်ကားတစ်စီးဖြင့် ရောက်လာပြီး ဖုန်းများနှင့် အိမ်တွင်းပစ္စည်းတချို့ကို မွေနှောက်ရှာဖွေကာ အမေဖြစ် သူ၏ ဖုန်းကို သိမ်းယူသွားပြီး TVတစ်လုံးနှင့် မှန်ဗီဒိုကို ရိုက်ခွဲသွားကြောင်း သိရသည်။

လက်ရှိအချိန်တွင် ထမင်းပေါင်းရွာ ဒေသခံများသည် စစ်ကောင်စီတပ်ဖွဲ့မှ ကျေးရွာအတွင်း လာရောက်သောင်းကျန်းခြင်း အကြမ်းဖက်လုပ်ရပ်များ ပြုလုပ်ခြင်း ရှိမည်ကို ကြောက်လန့်နေကြကြောင်းလည်း သိရသည်။

ကျောက်ဂူဒေသည် စစ်ကောင်စီတပ်ဖွဲ့အပြင် သျှမ်းလက်နက်ကိုင် တပ်ဖွဲ့ နှစ်ဖွဲ့ဖြစ်သည့် SSPP နှင့် RCSS များလည်း သွားလာလှုပ်ရှား သည့် နယ်မြေဖြစ်သည်။

ထိုဒေသတွင် ပြီးခဲ့သည့် ဖေဖော်ဝါရီလတွင် မြောက်ပိုင်း မဟာမိတ်တပ်ဖွဲ့နှင့် သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) တို့ တိုက်ပွဲပြင်းထန်ခဲ့သည့် နယ်မြေဖြစ်ပြီး ဒေသခံနေအိမ်များ၊ ဂိုဒေါင်၊ ဆောက်လက်စ ဘုန်းကြီးကျောင်းတို့ လက်နက်ထိမှန် ပျက်စီးမှုများလည်း ရှိခဲ့သည်။