သျှမ်းပြည် အရှေ့ပိုင်း မိုင်းဆတ်မြို့တွင် အသက် ၆၀အရွယ်ရှိ အမျိုးသမီးတစ်ဦးသည် ယနေ့ (စက်တင်ဘာ ၃)ရက် မနက် ၄နာရီဝန်းကျင်၌ တုတ်ဖြင့်ရိုက်ခံရပြီး ပိုက်ဆံအိတ်ပါ လုယက်ခံရကြောင်း သတင်းသိရသည်။
ဖြစ်စဥ်မှာ ယနေ့ မနက် (၄)နာရီဝန်းကျင်တွင် အသက် (၆၀) အရွယ်ရှိ အမျိုးသမီးသည် မိုင်းဆတ်မြို့ရှိ စျေးသို့ စက်ဘီးဖြင့် သွားနေစဥ် အမျိုးသားတစ်ဦးမှ တုတ်ဖြင့်ရိုက်ကာ ပိုက်ဆံအိတ်ကို လုယူသွားကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“သူတို့အိမ်က ဆီချက်ခေါက်ဆွဲရောင်းတော့ မနက်အစောကြီးဈေးကို သွားပြီး လိုတာတွေ ဝယ်ဖို့ပေါ့၊ ဒါမဲ့ မြို့လယ်ခေါင်က လမ်းလေးခွရောက်တော့ အမျိုးသားတစ်ယောက်က သူ့ဦးခေါင်းကို တုတ်ချောင်း နဲ့ လွဲရိုက် ချပြီး ပိုက်ဆံအိတ်ကို လုသွားတာတဲ့၊ အဲ့ချိန်မှာသူလည်းသတိလစ်သလိုလိုဖြစ်သွားတယ်၊ သူ့ခေါင်းကို ငါးချက် ချုပ်လိုက်ရတယ်” ဟု အမည်မဖော်လိုသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ရိုက်နှက်ခံရသည့်အမျိုးသမီးသည် မိုင်းဆတ်မြို့ မယ်ဆွမ်မြောက်ရပ်ကွက်နေ ပါလုံ (ခ) ကြီးကြီးဖြစ်ပြီး ဦးခေါင်းငါးချက်ချုပ်ခံလိုက်ရသည့်အပြင် ပိုက်ဆံလေးသောင်းကျော် လည်း ဆုံးရှုံးလိုက်ရ ကြောင်း သိရသည်။
လက်ရှိတွင် ကျူးလွန်သူ တရားခံကို နယ်မြေခံရဲနှင့် သက်ဆိုင်ရာတာဝန်ရှိသူများက ဆက်လက်စုံစမ်းနေကြောင်း သိရသည်။
“မြို့လယ်ခေါင်မှာလည်း မူးယစ်ဆေးဝါးသမားတွေ အရမ်းများနေတယ်၊ အဲ့လိုမျိုး ရှိနေတာတောင် သက်ဆိုင်ရာက လာဖမ်းတာ မရှိဘူး။ ရောင်းနေတဲ့သူတွေကိုလည်းသိရက်နဲ့ မဖမ်းကြဘူး၊ အခုတရားခံကို လည်း လိုက်နေတယ်လို့တော့ ပြောတယ် မိနိုင်ကြမလားသိဘူး” ဟု မိုင်းဆတ်မြို့ ဒေသခံ အသက် ၅၀ ကျော် အမျိုးသားက ဆက်လက်ပြောသည်။
လက်ရှိ မိုင်းဆတ်မြို့လယ်ခေါင်တွင် မူးယစ်ဆေးများကို ပေါ်တင်သုံးစွဲလာပြီး နေ့လည်ပိုင်းအချိန်၌ အုတ်တံတိုင်းကျော်ကာ ပစ္စည်းများ ဝင်ရောက်ခိုးယူနေသော်လည်း နယ်မြေခံရဲများ သက်ဆိုင်ရာ တာဝန်ရှိသူများက နှိမ်နှင်းနိုင်ခြင်းမရှိကြောင်း ဒေသခံများက ပြောသည်။
စစ်တပ်က အာဏာသိမ်းပြီးနောက်ပိုင်းမှာ သျှမ်းပြည်အတွင်း မူးယစ်ဆေးဝါး သုံးစွဲမှု နှင့် ဒေသအတွင်း ဆူပူအကြမ်းဖက်မှုများ ခိုးယူလုယက်မှုများ တစ်ဖန်ပြန်ကြီးထွားလာနေသည်။
Leave a Comments