သျှမ်းပြည်မြောက်ပိုင်း သီပေါမြို့အနီး တအာင်းအမျိုးသားလွတ်မြောက်ရေး တပ်မတော် (TNLA) မှ တပ်သားသစ် စုဆောင်း နေကြောင်း စုံစမ်းသိရှိရသည်။
ဩဂုတ် ၂၈ ရက်နေ့တွင် TNLA တပ်ဖွဲ့မှ သီပေါမြို့အနီး ရှိ ကျေးရွာများထဲကို တပ်သားသစ် လိုက်ကောက်ခဲ့ကြောင်း သိရသည်။
“သီပေါမြို့ထဲတော့ မရောက်လာဘူး။ မြို့အနီးနားရှိတဲ့ ရွာတွေမှာကောက်တာ။ TNLA က တပ်သားသစ်တွေ ကောက်တာပါ။ သူတို့လူမျိုးကိုပဲကောက်တာတဲ့။ သူတို့လာကောက်တဲ့ရွာတွေက မြို့နဲ့ အရမ်းနီးတဲ့ရွာတွေပဲလေ” ဟု သီပေါမြို့နယ် ဒေသခံ အမျိုးသမီးတစ်ဦးက ပြောသည်။
အဆိုပါ TNLA တပ်ဖွဲ့သည် ညောင်ကိုးပင်ကျေးရွာ၊ ဝမ်မိုင်၊ ကျောင်းစု၊ နားမုန်းတို့ကျေးရွာတွင် တပ်သား (၇၀) ကျော်ကို ဖမ်းဆီးခေါ်ဆောင်သွားခဲ့ကြောင်း မျက်မြင်အမျိုးသမီးတစ်ဦးက သျှမ်းသံတော်ဆင့် ကို ပြောသည်။
“သူတို့စာရင်းထဲကလူကိုလာခေါ်တာတဲ့။ ဖမ်းပြီးခေါ်သွားတာ။ လမ်းမှာတွေ့ရင်လည်း ခေါ်သွားတာ။ ကြိုးတုတ်ပြီးတော့ ခေါ်သွားတာလည်းရှိတယ်။ အဲ့ရွာတွေမှာ ပြည်သူ (၇၀) လောက်ခေါ်သွားတယ်တဲ့” ဟု ၎င်းက ပြောသည်။
ထိုသို့ မြို့ပတ်ဝန်းကျင်သို့ တပ်သားသစ်များ ကောက်လာသောကြောင့် ပြည်သူများက စိုးရိမ်စိတ်ဖြင့် နေထိုင်နေရ ကြောင်း သိရသည်။
“ကြောက်တယ်။ ည ၈ နာရီလောက်ဆိုရင် မီးပိတ်ပြီး အိမ်ထဲပဲနေတော့တယ်။ ဘယ်သူမှ အပြင်သိပ်မသွားဘူး။ ကျမတို့ ရပ်ကွက်ထဲဆိုရင် ညအပြင်ထွက် လမ်းသွားလမ်းလာတွေတောင် သိပ်မရှိတော့ဘူး” ဟု သီပေါမြို့ အတွင်းနေထိုင်သူ တစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်းမှာ တိုင်းရင်းသားလက်နက်ကိုင်များကလည်း တပ်သားသစ်များကို အပြိုင်ဆိုင် စုဆောင်းနေကြသည်။
အလားတူ SSPP/SSA တပ်ဖွဲ့သည် သျှမ်းတောင် လွိုင်လင်ခရိုင်အတွင်းကောက်ယူနေပြီး၊ RCSS/SSA သည်လည်း ကျိုင်းတောင်းဘက်ကောက်ယူနေကြောင်း သိရသည်။
