သျှမ်းပြည်အရှေ့ပိုင်း မိုင်းဆတ်မြို့တွင် မူးယစ်ဆေးဝါးသုံးစွဲသူများ သောင်းကျန်းနေကြောင်း စုံစမ်းသိရသည်။

လက်ရှိ မိုင်းဆတ်မြို့လယ်ခေါင်တွင် မူးယစ်ဆေးများကို ပေါ်တင်သုံးစွဲလာပြီး နေ့လည်ပိုင်းအချိန်၌ အုတ်တံတိုင်းကျော်ကာ ပစ္စည်းများ ပေါ်တင်ဝင်ရောက်ခိုးယူနေကြောင်း မိုင်းဆတ်မြို့ ဒေသခံ အမျိုးသားတစ်ဦးက ပြောသည်။

“မြို့လယ်ခေါင်မှာလည်း မူးယစ်ဆေးဝါးတွေ သုံးနေတာ။ မြို့ထဲမှာ ပေါ်တင်သုံးနေတာ။ ပြီးတော့ နေ့လည်အချိန်မှာတောင် အုတ်တံတိုင်း ကျော်ပြီးတော့ ပစ္စည်းတွေ ပေါ်တင်ဝင်ခိုးနေတာ။ ခြံထဲရှိတဲ့ အသီးအရွက်တွေ၊ အိမ်ထဲက ရှိတဲ့ ပစ္စည်းတွေကိုဝင် ခိုးနေတာ” ဟု ၎င်းက ပြောသည်။

မိုင်းဆတ် မြို့ပေါ်တွင် မူးယစ်သုံးစွဲမှု အခြေနေဆိုးရွားလာပြီး တာဝန်ရှိသူ ရဲများကလည်း ဝင်ရောက်ဖမ်းဆီးမှုမရှိကြောင်း သိရသည်။

ထိုကြောင့် ပြည်သူများသည် မိမိလုံခြုံရေးအတွက် မူးယစ်ဆေးဝါးသုံးစွဲသူများကို ကိုယ်တိုင်ဖမ်းဆီးနေရပြီး ရဲစခန်းကို ပို့ပေးနေရကြောင်း ဩဂုတ် ၂၆ ရက်တွင် မူးယစ်ဆေးဝါးသုံးစွဲသူ (၁၃) ဦးကို ပြည်သူများ ကိုယ်တိုင်ဖမ်းဆီးပြီး ရဲစခန်းသို့ ပို့ဆောင်ပေးခဲ့ရကြောင်း သိရသည်။

“ပြည်သူတွေကပဲ ကိုယ်တိုင်ဝင်ဖမ်းပြီးတော့ ရဲစခန်းကို ပို့ပေးနေတယ်လို့ကြားရတယ်။ မြို့ထဲမှာ မူးယစ်ဆေးဝါးသုံးတဲ့သူပေါ်တင်ရှိနေတာတောင် သက်ဆိုင်ရာက လာဖမ်းတာတွေ မရှိဘူးတဲ့။ ရောင်းနေတဲ့သူတွေကိုလည်း သူတို့က မဖမ်းဘူး” ဟု မိုင်းဆတ်ဒေသခံ အိမ်ထောင်ရှင် အမျိုးသမီး တစ်ဦး က သျှမ်းသံတော်ဆင့် ကိုပြောသည်။

ထိုအပြင် မိုင်းဆတ်မြို့နယ် ကျေးရွာဘက်တွင်လည်း အုပ်ချုပ်ရေးမှူးများ၊ ဆယ်အိမ်မှူးများကိုယ်တိုင်က မူးယစ်ဆေးဝါးသုံးစွဲနေပြီး အသက် ၁၅ နှစ် အရွယ်ကလေးတွေလည်း ပါဝင်နေကြောင်း သိရသည်။

ထိုသို့ မူးယစ်ဆေးဝါးသုံးစွဲမှုများလာသည့်အတွက် ရှေ့ဆက်လူငယ်အရင်းမြစ်များ ဆုံးရှုံးနိုင်သောကြောင့် ပြည်သူများ ဝိုင်းဝန်းပြီး တားမြစ်ရန် နှင့် မူးယစ်ဆေးဝါးရောင်းချသူများကို ဖမ်းဆီးရန်လိုအပ်ကြောင်း မိုင်းဆတ်မြို့ ဒေသခံ လူငယ်အမျိုးသား တစ်ဦးက ပြောသည်။

“အခုမိုင်းဆတ်မှာ မူးယစ်ဆေးဝါးသုံးသူက အသက် ၁၅ နှစ်အရွယ်တွေလည်းရှိတယ်။ လူငယ်တွေအများဆုံးဖြစ်တယ်။ ဒီလိုဖြစ်နေရင် ကျနော်တို့ လူငယ်အရင်းမြစ်တွေ ပျောက်ဆုံးသွားနိုင်တယ်။ ပိုဆိုးတာက ကျေးရွာဘက်က အုပ်ချုပ်ရေးမှူးတွေ၊ ဆယ်အိမ်မှူးတွေလည်း ဆေးတွေသုံးနေတယ်လို့ကြားတယ်။ ဒီလိုမရှိအောင် ရောင်းတဲ့သူတွေ၊ သုံးတဲ့သူတွေကို ဖမ်းဖို့ လိုတယ်” ဟု ၎င်း လူငယ် အမျိုးသား က ထပ်လောင်းပြောသည်။

မိုင်းဆတ်မြို့သည် ဇွန်လ မှ စပြီး မူးယစ်ဆေးဝါးသုံးစွဲမှု များလာကြောင်းသိရသည်။
စစ်တပ်က အာဏာသိမ်းပြီးနောက်ပိုင်းမှာ သျှမ်းပြည်အတွင်း မူးယစ်ဆေးဝါး သုံးစွဲမှု တစ်ဖန်ပြန်ကြီးထွားလာနေသည်။