Saturday, December 3, 2022

မူဆယ်မြို့ စက်သုံးဆီ မှောင်ခိုစျေးကွက် ကြီးထွားနေ

Must read

သျှမ်းပြည်မြောက်ပိုင်း မူဆယ်မြို့ရှိ စက်သုံးဆီများ ဝယ်ယူပြီး လမ်းဘေးတွင် မှောင်ခိုဖြင့် ရောင်းချနေကြောင်း စုံစမ်းသိရသည်။

ယခုရက်ပိုင်း မြန်မာနိုင်ငံတဝှမ်း စက်သုံးဆီ ပြတ်လပ်မှုရှိလာသည့်အပြင် ဆီစျေးနှုန်းတွေကလည်း မြင့်တက်လာသည့် အတွက် မှောင်ခိုစျေးကွက်ကလည်း ကြီးထွားလာကြောင်း သိရသည်။

ထို့ကြောင့် လက်ရှိ မူဆယ်မြို့ပေါ်တွင် စက်သုံးဆီဆိုင်ကြီးများမှ ဗူးဖြင့်ဝယ်ယူသူများကို ကန့်သတ်လိုက်သော်လည်း မှောင်ခိုရောင်းနေသူများသည် ကားများဖြင့် စက်သုံးဆီကို သွားထုတ်ကာ ပြင်ပစျေးကွက်တွင် မှောင်ခိုပြန်ရောင်းနေကြောင်း မူဆယ်ဒေသခံများက ပြောပြသည်။

မူဆယ်မြို့ လမ်းဘေး ဆီသည်များ

“ဆီဆိုင်ကြီးက အခု ဗူး နဲ့တော့ မရောင်းပေးတော့ဘူး။ ဘယ်လိုလုပ်ကြလဲဆိုတော့ ကားနဲ့ သွားတန်းစီကြတယ်။ ပြီးရင် ဆီတွေပြန်ထုတ်ရောင်းကြတယ်။ ဆီဆိုင်မှာ ကားတန်းတွေက အရှည်ကြီးပဲ။ကိုယ့်အလှည့်ရောက်ရင် ဆီက ကုန်သွားတယ်လေ” ဟု မူဆယ်မြို့ အသက် ၃၅ နှစ်အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။

စက်သုံးဆီဆိုင်များတွင် 92 ဆီ တစ်လီတာလျှင် မြန်မာကျပ်ငွေ (၃,၀၀၀) ကျပ်ရှိပြီး ကားတစ်စီးလျှင် မြန်မာကျပ်ငွေ (၅၀,၀၀၀) ကျပ်ဖြင့်ရောင်းချနေပြီး၊ ဆိုင်ကယ်တစ်စီးလျှင် မြန်မာကျပ်ငွေ (၅,၀၀၀) သာရောင်းချပေးနေကြောင်းသိရသည်။

ထို့ပြင် အပြင်မှောင်ခိုစျေးကွက်တွင် 92 တစ်လီတာလျှင် မြန်မာကျပ်ငွေ (၈,၀၀၀) ကျပ်နှုန်းထိ စျေးပေါက်နေကြောင်း သတင်းရရှိသည်။

မူဆယ်မြို့ လမ်းဘေး ဆီသည်များ

“ပန့်ဆီဆိုင်မှာ ဆီဖြည့်ဖို့က တစ်နာရီလောက် စောင့်ရတယ်။ တစ်ခါတစ်လေ ဆီကုန်သွားတယ်လည်း ရှိတယ်။ မဖြစ်မနေတချို့တွေက လမ်းဘေးမှာ ဝယ်ပြီးဖြည့်ရတယ်။ လမ်းဘေးမှာက သူတို့ကားနဲ့ ဆီသွားဖြည့်ပြီး ကားထဲက ဆီကိုပြန်ရောင်းရတာ“ ဟု ၎င်းဒေသခံအမျိုးသား တစ်ဦးကပြောသည်။

စက်သုံးဆီမှောင်ခိုစျေးကွက်ရောင်းစားနေသည့် သူများလာသည့်အတွက် ဆီဆိုင်များတွင် စောင့်ဆိုင်းပြီး ဆီလာဖြည့်သူများလာကာ သာမာန် ဆီဖြည့်သူများအတွက် အခက်အခဲများစွာ ရင်ဆိုင်နေရကြောင်း မူဆယ်မြို့ ကားသမားတစ်ဦးက သျှမ်းသံတော်ဆင့်ကို ပြောသည်။

“မှောင်ခိုစျေးကွက်တွေကို မထိန်းချုပ်သရွေ့တော့ ကားသမားတွေအတွက် အခက်အခဲတွေ ဆက်ကြုံနေရမှာပဲ။ အရင်လို ဆီတွေလိုသလောက်လည်းဝယ်မရတော့ လုပ်စားတဲ့သူကလည်း လုပ်စားနေမှာပဲ။ လမ်းဘေးက မှောင်ခို ရောင်းတဲ့သူတွေကို ထိန်းချုပ်ဖို့ လိုအပ်တယ်” ဟု ကားသမားက ဆိုသည်။

ကမ္ဘာ့နိုင်ငံများ အပါအဝင် မြန်မာပြည်မှာလည်း စက်သုံးဆီ စျေးနှုန်းများ ရက်ဆက်ဆိုသလို ကျဆင်းလာသော်လည်း မြန်မာနိုင်ငံတွင် ဒေါ်လာစျေး ကမောက်ကမကြောင့် စက်သုံးဆီရောင်းသူများ စက်သုံးဆီ မဝယ်ယူရဲသဖြင့် ဆီပြတ်လပ်မှုနှင့် ကြုံတွေ့လာရကြောင်းသိရသည်။

Leave a Comments

- Advertisement -spot_img

Latest article