သျှမ်းပြည်အရှေ့ပိုင်း တာချီလိတ်မြို့နယ် မိုင်းဖုန်း (ခ) ပါဆာ လွန်းလိန်းကျောင်းတိုက် ကို ယနေ့ သြဂုတ် (၂၂) ရက်မှာ မိုင်းဖုန်းဆရာတော် ကြွရောက် သီတင်းသုံးသွား မည်ဖြစ်ကြောင်း စုံစမ်းသိရှိရသည်။
မိုင်းဖုန်းဆရာတော်သည် ပြီးခဲ့သည့် သြဂုတ် (၁၀) ရက်တွင် ထိုင်းနိုင်ငံ ဘန်ကောက်ဆေးရုံသို့ ဆေးကုသမှု ခံယူခဲ့ပြီး ကျန်းမာရေး ပြန်လည် ကောင်းမွန်လာသဖြင့် ၎င်း၏ ကျောင်းတိုက်သို့ ပြန်လည် သတင်းသုံးသွားမည်ဖြစ်ကြောင်း သိရှိရသည်။
“ဒီနေ့ နေ့လည်မှာ မိုင်းဖုန်းဆရာတော် မိုင်းဖုန်းကို ရောက်မယ်။ ဆရာတော်က ဧကစာရီ တစ်ပါးတည်း တရားအားထုတ် သွားပါမယ်။ ဝါခေါင်လပြည့်နေ့မှာ ဝါဝင်ထားပြီးတော့တန်ဆောင်မုန်းလပြည့်နေ့မှ ဝါပြန်ထွက်သွားမယ်” ဟု သျှမ်းရှေ့ သံဃာနာယက ဥက္ကဌ ဆရာတော် ဉာဏသီရိ က သျှမ်းသံတော်ဆင့် ကိုပြောသည်။
ဆရာတော်သည် သြဂုတ် (၁၈) ရက်တွင် ဘန်ကောက်ဆေးရုံမှ ဆင်းခွင့်ရပြီး ယနေ့ သြဂုတ် (၂၂) ရက်၌ မိုင်းဖုန်းသို့ ကြွသွားမည်ဖြစ်ကြောင်း သိရသည်။
“ဆရာဝန်တွေ မိုင်းဖုန်းဆရာတော် ကို ဆေးရုံဆင်းခွင့်ပေးပြီဆိုတော့ ကျန်းမာရေး အတွက် မစိုးရိမ်ရတော့ဘူးထင်တယ်။ လူစုလူဝေး နဲ့ မတွေ့ရရင်တော့ ကျန်းမာရေး ပိုကောင်းလာမယ်ထင်တယ်”ဟု ၎င်း ဆရာတော် က ပြောသည်။
မိုင်းဖုန်းဆရာတော် အညတရဝါသီ အရှင် ညာဏသံဝရ (ခူးဝါးဝန်းစုမ့်) သည် သက်တော် (၅၇) ဝါတော် (၃၇) ဝါ ရှိကြောင်း သိရှိရသည်။
မိုင်းဖုန်းဆရာတော်သည် မိုင်းကျက်ဂူတွင် ဇူလိုင် (၃၁) ရက်၌ (၃) နှစ် (၃) လ (၃) ရက် အဓိဌာန်ဝင် ဂူအောင်း တရားဘာဝနာ ကျင့်ကြံမှု အောင်မြင်ပြီးနောက် ဂူမှ ထွက်လာပြီး သြဂုတ် (၁) ရက်မှ စတင်ပြီး (၆) ရက်ဆက်တိုက် တရားနာပရိသတ်များကို တရားဟောခဲ့သည်။
Leave a Comments