အိန္ဒိယနိုင်ငံအရှေ့ပိုင်း အနောက်ဘင်္ဂလားပြည်နယ်တွင် ပြီးခဲ့သည့် ရက်သတ္တပတ်အတွင်း Nipah Virus (နီပါ ဗိုင်းရပ်စ်) ပြန်လည်ကူးစက်ခံရမှု ၅ ဦးအထိတွေ့ရှိပြီးနောက် လူနာများနှင့် ဆက်စပ်ခဲ့သည့် လူ ၁၀၀ ဦးခန့်အား နေအိမ်များတွင်သာ နေထိုင်ရန် ဒေသအာဏာပိုင်များမှညွှန်ကြားထားကြောင်း အိန္ဒိယ သတင်းဌာန New Delhi Television (NDTV) တွင်ဖော်ပြထားသည်။

အာဏာပိုင်များမှ ရောဂါထပ်မံပြန့်နှံ့မှုများမဖြစ်ပွားစေရန် ရောဂါထိတွေ့မှုများကို ခြေရာခံခြင်း၊ ဒေသတွင်း စစ်ဆေးမှုများ နှင့်် ပြည်သူလူထုများအား အသိပညာပေးလှုပ်ရှားမှုများကို စတင်လျက်ရှိသည်။

နီပါဗိုင်းရပ်စ် သည် ရောဂါတုံ့ပြန်မှုနှင့် ကျန်းမာရေးစောင့်ရှောက်မှု အပေါ်မူတည်၍ သေဆုံးမှုနှုန်း ၄၀ ရာခိုင်နှုန်းမှ ၇၀ ရာခိုင်နှုန်းကျော်အထိရှိကြောင်း ထုတ်ပြန်ထားသည်။
ရောဂါ လက္ခဏာများမှာ ဖျားနာခြင်း၊ ခေါင်းကိုက်ခြင်း၊ အသက်ရှူလမ်းကြောင်းဆိုင်ရာ အခက်အခဲဖြစ်ခြင်း၊ စိတ်ရှုပ်ထွေးခြင်း၊ တက်ခြင်းနှင့် ဦးနှောက်အမြှေးယောင်ခြင်းတို့ ပါဝင်သည်။

လက်ရှိတွင် သီးသန့်အတည်ပြုထားသော လက်ရှိတွင် ကာကွယ်ဆေး သို့မဟုတ် ဗိုင်းရပ်စ်ပိုးအား သီးခြားကုသနိုင်သည့် ဆေးမရှိသေးသည့်အတွက် ရောဂါပိုးအား စောစီးစွာရှာဖွေတွေ့ရှိနိုင်ရန် လိုအပ်လျက်ရှိပြီး လျင်မြန်စွာသီးခြားခွဲထားနိုင်ရန် အရေးကြီးကြောင်းသိရသည်။

ရောဂါရှာဖွေမှုနှောင့်နှေးခြင်းနှင့် သတင်းအချက်အလက်မှားယွင်းခြင်းများကြောင့် အခြေအနေပိုမိုဆိုးရွားသွားနိုင်ကြောင််း သတိပေးထားသည််။

ကီရာလာပြည်နယ်အတွင်း ၂၀၂၄ ခုနှစ်ကလည်း Nipah Virus ပြန့်နှံ့မှု ဖြစ်ပွားခဲ့ဖူးပြီး အစိုးရ၏လျင်မြန်သော လုပ်ဆောင်မှုများကြောင့် ထိန်းချုပ်နိုင်ခဲ့သော်လည်း ဆက်လက်စောင့်ကြည့်ရန် အရေးကြီးသော အခြေအနေအဖြစ် သတိပေးထားခဲ့သည်။

နိုင်ငံတကာ ကျန်းမာရေးအဖွဲ့အစည်းများနှင့် အိန္ဒိယကျန်းမာရေးဝန်ကြီးဌာနတို့ ပူးပေါင်းကာ ကပ်ရောဂါဖြစ်လာနိုင်ခြေကြောင့် အထူးအာရုံစိုက်စောင့်ကြည့်နေလျက်ရှိသည်။

Nipah ဗိုင်းရပ်စ် (NiV) သည် ၁၉၉၈ ခုနှစ်တွင် မလေးရှားနိုင်ငံ၌ စတင်ဖြစ်ပွားခဲ့ပြီး တိရစ္ဆာန်မှတစ်ဆင့် ကူးစက်တတ်သော ပြင်းထန်သည့်ရောဂါတစ်မျိုးဖြစ်ပြီး ဝက်မွေးမြူရေးသမားများတွင် ပထမဆုံးတွေ့ရှိခဲ့ရသည်။

ဗိုင်းရပ်စ်ကို သစ်သီးစားသည့် လင်းနို့များ (Pteropus မျိုးစိတ်) မှ သဘာဝအတိုင်း သယ်ဆောင်လာပြီး ညစ်ညမ်းသော အစားအစာ၊ ရောဂါပိုးကူးစက်ခံရသော တိရစ္ဆာန်များမှ သို့မဟုတ် လူမှလူသို့ တိုက်ရိုက်ထိတွေ့မှုမှတစ်ဆင့် ကူးစက်နိုင်သည်။ ဘင်္ဂလားဒေ့ရှ်နှင့် အိန္ဒိယနိုင်ငံတို့တွင် မကြာသေးမီနှစ်များအတွင်းက ရောဂါပြန့်နှံ့မှုများ ပြန်လည်ဖြစ်ပွားခဲ့သေးသည်။