သျှမ်းပြည်တောင်ပိုင်း ပင်လောင်းမြို့နယ် အတွင်းရောက်ရှိနေသည့် စစ်ဘေးရှောင်များသည် ဝမ်းပျက်ဝမ်းလျောဖြစ်ပြီး အသက်သေဆုံးမှုရှိနေသော်လည်း ငှက်ပျောအူ ဆန်ပြုတ်ဖြင့် ဖြေရှင်းနေရကြောင်း စုံစမ်းသိရသည်။
ဇူလိုင် လလယ်မှ စတင်ပြီး မိုးအဆက်မပြတ် ရွာသွန်းမှုကြောင့် ပင်လောင်းမြို့နယ် ဆောင်းပြောင်း စစ်ဘေးရှောင်စခန်းတွင် ဝမ်းပျက်ဝမ်းလျောရောဂါကို စတင်ကြုံလာရပြီး စစ်ဘေးရှောင် (၆)ဦး အသက်ဆုံးရှုံးသည့်အထိ ဖြစ်နေကြောင်း စစ်ရှောင်ကူညီနေသူ အမျိုးသမီး တစ်ဦးက သျှမ်းသံတော်ဆင့်ကိုပြောသည်။
လက်ရှိ ဝမ်းပျက်ဝမ်းလျောရောဂါဖြစ်ပွားမှုကြောင့် ဆေးဝါးအခက်အခဲများဖြစ်ပွားသကဲ့သို့ ကျန်းမာရေး စောင့်ရှောက်သည့် ဆရာဝန်များလည်း လက်လှမ်းမမီသည့်အတွက် ကိုယ်ထူကိုယ်ထ ငှက်ပျောအူ နှင့် ဆန်ပြုတ်သောက်ကာ ဖြေရှင်းနေရသည် ဟု ၎င်းအမျိုးသမီးက ဆိုသည်။
ထိုသို့ ရောဂါဖြစ်ပွားနေကာ သွားလာရေးနှင့် လမ်းပမ်းဆက်သွယ်ရေး ခက်ခဲမှုကြောင့် ဆေးကုသမှု ခံယူရန်အခက်ခဲဖြစ်ကာ ငှက်ပျောပင်အခွံနှင့် ဆန်ပြုတ်ရောပြုတ်ကာ ဖြေရှင်းနေရသည်။
“ အခု လမ်းပန်းဆက်သွယ်ရေးကလည်း ခက်ခဲတယ်။ ဆေးဝါးသယ်ယူမှုကလည်း ပိတ်ပင်တာခံရတယ်။ အစပိုင်းတော့ စစ်ရှောင်တွေက ရိုးရာနည်း ငှက်ပျောပင်အခေါက်နဲ့ ဆန်ရောပြုတ်ပြီး သောက်ကြသေးတယ်။ မသက်သာမှ ဆေးဆိုင်မှာ ဆေးဝယ်သောက်ရတယ်။ လူကြီးပိုင်းကတော့ ပိုပြီး သေဆုံးမှုတွေ များနေတယ်။”ဟု စစ်ရှောင်ကူညီနေသူ အမျိုးသမီးက သျှမ်းသံတော်ဆင့်ကို ပြောသည်။
စစ်ဘေးရှောင်အများစုသည် ဝင်ငွေမရှိကြောင်း၊ ဆေးဝါးဝယ်ယူရန် ခက်ခဲသည့်အတွက် ဝမ်းပျက်ဝမ်းလျောအတွက် အများစု ကိုယ့်နည်းကိုယ်ဟန်သာ ဖြေရှင်းနေရသည်။
ယခုလက်ရှိတွင် ပင်လောင်းစစ်ဘေးရှောင်မှာ သုံးသောင်းဝန်းကျင် ရှိပြီး ထီယွန်ဘုန်းကြီးကျောင်း၊ ဝါးလီးဘုန်းကြီးကျောင်း နှင့် တောတောင်ထဲတွင် စစ်ရှောင်နေကြရသည်။
၂၀၂၄ ခုနှစ်အတွင်း စားနပ်ရိက္ခာနှင့် ဆေးဝါး အခက်ခဲအမျိုးမျိုးကြောင့် စစ်ဘေးရှောင်များ စစ်ရှောင်နေစဉ် ကာလအတွင်း မသေသင့်ဘဲ သေဆုံးရသူ ၁၀ ရာခိုင်နှုန်းရှိသည်ဟု ပအိုဝ်းလူငယ်အစည်းအရုံးက ပြောသည်။
ထို့အပြင် စစ်တပ်အာဏာသိမ်းပြီးနောက်ပိုင်း နိုင်ငံ၏ စီးပွားရေး၊ လူမှုရေး ၊နိုင်ငံရေး ချွတ်ခြုံကျလာမှုကြောင့် သျှမ်းပြည်တောင်ပိုင်း စစ်ဘေးရှောင်များအတွက် ရေရှည်ထောက်ပံ့မှုများ ခက်ခဲသည့် အခြေအနေရောက်ရှိနေကြောင်း ပအိုဝ်းလူငယ်အစည်းရုံး PYO က ထုတ်ပြန်ချက်တွင် ဖော်ပြထားသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments