သျှမ်းပြည်အရှေ့ပိုင်း တာချီလိတ်မြို့ မယ်ခေါင်ရပ်ကွက် ယနေ့ (ဩဂုတ် ၂၂) ရက် နံနက် ၃ နာရီခွဲဝန်းကျင်တွင် ကုန်စုံဆိုင်တစ်ခု၌ ဓာတ်ဆီခိုးခံရကြောင်း စုံစမ်းသိရသည်။
“ကျမ တို့ ဝန်းထဲကိုဝင်လာတာ (၅) မိနစ်ပဲကြာတယ်။ တစ်ယောက်ထဲလာတာ။ ခြံဝန်းကိုသော့ခတ်ထားတယ်။ သူခုန်လာပြီးတော့ ဓာတ်ဆီပုံးတစ်ပုံးလာခိုးသွားတာ။ ကျမအသံကြားလို့ ထကြည့်လိုက်တော့ မိသွားတာ” ဟု ကုန်စုံဆိုင်ရှင် က သျှမ်းသံတော်ဆင့်ကို ပြောသည်။
ထိုသူခိုးသည် အိမ်နီးချင်း ဖြစ်ပြီး၊ ၎င်းအမျိုးသမီးသည် အစိုးရဝန်ထမ်းလုပ်ကိုင်နေသူဖြစ်ကြောင်း ကုန်စုံဆိုင်ရှင် အမျိုးသမီးက ပြောသည်။
“ အဲ့သူခိုးရဲ့ မိန်းမ က အစိုးရဝန်ထမ်းဖြစ်တယ်။ သူ့ညီလေးက ပြည်သူ့စစ်ထဲကတဲ့။ သူတို့က ကျမတို့ အိမ်နဲ့ အရမ်း မဝေးဘူး။ သူက အရမ်းတောင်းပန်တယ်လေ။ ပြီးတော့ ဓာတ်ဆီလည်းပြန်ရတော့ ကျမတို့ဘက်က အရေးယူတာတော့ မရှိဘူး။ ရပ်ကွက်အုပ်ချုပ်ရေးမှူးကိုပဲ အပ်လိုက်တယ်” ဟု ၎င်း ဆိုင်ရှင်က ပြောသည်။
လက်ရှိတွင် မြန်မာနိုင်ငံတစ်ဝှမ်း ဓာတ်ဆီဈေး၊ ကုန်စျေးနှုန်းမြင့်တက်နေချိန်တွင် သျှမ်းပြည်အတွင်း သူခိုးများပြားလာပြီး လုံခြုံမှုမရှိကြောင်း ပြည်သူများသည် ကိုယ့်နည်းကိုယ့်ဟန်ဖြင့် ဖြေရှင်းနေရကြောင်း တာချီလိတ်မြို့ ဒေသခံ အမျိုးသားတစ်ဦးက သျှမ်းသံတော်ဆင့် ကိုပြောသည်။
“ စိတ်ပူတာပေါ့။ လုံခြုံမှုလည်းမရှိဘူး။ ကိုယ့်ကိုယ်ပဲ လုံခြုံရေးတွေယူနေရတယ်။ သူခိုးတွေရှိလာလည်း ရဲကိုသွားတိုင်တော့ မဖမ်းပေးနိုင်ဘူး။ ဖမ်းတော့လည်း ကြာရင် ပြန်လွှတ်ပေးတာပဲ။ လုံခြုံရေးပေးထားတယ်ဆိုတာ နာမည်ပဲရှိတော့တယ်” ဟု ၎င်းက ပြောသည်။
စစ်တပ်က အာဏာသိမ်းလာပြီး ၁ နှစ်ကျော်ကာလအတွင်း သျှမ်းပြည်အတွင်းတွင် သူခိုး၊ မူးယစ်ဆေးဝါးသုံးစွဲသူ၊ လောင်းကစားများ ယခင်ထက်ပိုများပြားလာကြောင်းသိရသည်။
