သျှမ်းပြည်တောင်ပိုင်း ရွာငံမြို့နယ် တဲလုကျေးရွာ အနီးတွင် မီးရှို့ခံထားရသည့် အမျိုးသား ရုပ်အလောင်း သုံးလောင်း တွေ့ရကြောင်း သတင်းသိရသည်။
ယမန်နေ့ (သြဂုတ် ၁၇) ရက် ညနေပိုင်းတွင် တဲ့လုကျေးရွာ နှင့် တောင်ဦးကျေးရွာကြားမှ တောစပ် တစ်နေရာတွင် မီးရှို့ခံထားရသည့် အမျိုးသား ရုပ်အလောင်း ၃ လောင်း တွေ့ရှိခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ရုပ်အလောင်းတွေကိုတော့ မနေ့ကတွေ့တာပါ။ ပြီးခဲ့တဲ့ သြဂုတ် ၁၆ ရက်မှာ တဲ့လုရွာထဲကို စစ်ကြောင်းဝင်လာပြီး၊ ရွာသားအချို့ကို ခေါ်စစ်တာတွေ လုပ်ခဲ့တယ်၊ ညအချိန်မှာ သေနတ်သံ ၇ ချက်လောက် ကြားရတယ်၊ စကစတွေ ပြန်ထွက်သွားတဲ့ ၁၇ ရက်မှာတော့ ရွာပြင်တောစပ်နား မီးရှို့ထားတဲ့ ရုပ်အလောင်းတွေကို ရွာသားတွေက တွေ့တာ။ ဘယ်သူတွေလဲ ဆိုတာတော့ မသိရဘူး” ဟု အထက်ပါ အမျိုးသားက ပြောသည်။
အဆိုပါ မီးရှို့ခံထားရသည့် ရုပ်အလောင်းများသည် ခါးအောက်ပိုင်းသာ ကျန်နေပြီး မျက်နှာသွင်ပြင် ဖော်ပြရန် ခက်ခဲကြောင်းနှင့် ကျန်ရုပ်ကြွင်းများကို အနီးအနားရှိ ဒေသခံများမှ မီးသင်္ဂြိုလ်ပေးလိုက်ရကြောင်းလည်း ၎င်းက ဆက်လက်ပြောသည်။
အင်အား ၃၀ ကျော်ရှိသည့် စစ်ကောင်စီတပ်သားများသည် တဲ့လုကျေးရွာအတွင်း နေရာယူ စစ်ဆေးမှုများ လုပ်သည့်အပြင် တချို့တပ်သားများက ရွာပြင်ဘက်လယ်ကွင်းများနှင့် လမ်းဘေးပတ်ဝန်းကျင်တွင်လည်း ကင်းပုန်းသဖွယ် အုပ်စုလိုက် နေရာယူထားကြောင်း သိရသည်။
“သူတို့တပ်ရင်းအမှတ်တော့ မသိရဘူး၊ တချို့က အရပ်ဝတ်နဲ့ဖြစ်ကြတယ်၊ လက်ရှိတော့ မီးရှို့ခံထားရတဲ့ ရွာသားတွေက ဘယ်သူတွေလဲ ဘယ်ကလဲဆိုတာတွေကို စုံစမ်းနေကြတုန်းပဲ” ဟု တဲ့လုကျေးရွာအနီးမှ ဒေသခံအမျိုးသားလူငယ်တစ်ဦး က ဆက်လက်ပြောဆိုထားသည်။
ပြီးခဲ့သည့် ဧပြီလ မှ ရွာငံမြို့နယ် တောင်ဦးရွာနေ အသက်သုံးဆယ်အရွယ်ကိုကင်းမွှေးနှင့် အသက် ၁၉ နှစ် အရွယ် ကိုစောထူးတို့ ညီအစ်ကိုနှစ်ယောက်ကို စစ်ကောင်စီတပ်ဖွဲ့ ဖမ်းဆီးသွားခဲ့ပြီး ယမန်နေ့ထိ အဆက်အသွယ် မရခဲ့ကြောင်းလည်း ဒေသခံများ ပြောပြချက်အရ သိရသည်။
စစ်အာဏာသိမ်းမှု မဖြစ်ပွားခင်အထိ စစ်တပ်အခြေစိုက် လှုပ်ရှားမှုမရှိသည့် ရွာငံမြို့နယ် လက်ရှိအချိန်တွင် PDF များ ရှိနေသည့် စွပ်စွဲချက်များဖြင့် စစ်ကောင်စီတပ်တို့၏ ထိုးစစ်ဆင် တိုက်ခိုက်ခြင်း၊ ရွာသားများကို ဖမ်းဆီးနှိပ်စက် စစ်ဆေးခြင်းများသည် တစ်နေ့ထက်တစ်နေ့လူ့အခွင့်အရေး ချိုးဖောက်မှုများဖြစ်နေကြောင်း သိရသည်။
Leave a Comments