သျှမ်းပြည်မြောက်ပိုင်း တန့်ယန်းမြို့ ကိုယ်ဝန်ဆောင် အမျိုးသမီး တစ်ဦးကို အမည်မသိလက်နက်ကိုင်တပ်ဖွဲ့မှ ဓားထောက်ပြီး ဓားပြတိုက်သွားကြောင်း စုံစမ်းသိရသည်။

ယမန်နေ့ သြဂုတ်လ ၁၆ ရက်နေ့ မနက် ၁၁ နာရီဝန်းကျင်တွင် တန့်ယန်းမြို့ အမှတ် ရပ်ကွက် ၂ ဘက်သို့ ကားမောင်းလာသည့် ကိုယ်ဝန်သည် အမျိုးသမီးကို အမည်မသိလက်နက်ကိုင် ၂ ဦးက ဓားကိုင်ဆောင်လာပြီး ဓားထောက်ကာ ဓားပြတိုက်သွားကြောင်း ဓားပြတိုက်ခံရသူ၏ ဆွေမျိုးတော်စပ်သူတစ်ဦးက သျှမ်းသံတော်ဆင့် ကိုပြောသည်။

“အမျိုးသမီးက ကိုယ်ဝန်နဲ့ဆိုတော့ ဆေးခန်းသွားနေချိန်မှာ ရပ်ကွက် ၂ ဘက်ရောက်တဲ့ အခါမှာတော့ ဆိုင်ကယ် စီးလာတဲ့ အမျိုးသားလူငယ် နှစ်ယောက်က ကားရှေ့ပိတ်ရပ်တားပြီး သူ့ကိုကားပေါ်ကဆင်းခိုင်းတယ်၊ နောက်တော့ ဓား ထောက်ခြိမ်းခြောက်တဲ့အပြင် သူတို့ကားပေါ်တက်ခါနီး ခြေထောက်နဲ့ပါ ကန်လိုက်လို့ သူကလမ်းဘေးကို လဲကျသွားတယ်” ဟု နီးစပ်သူ အမျိုးသားက ပြောသည်။

အဆိုပါ ခိုးယူလုယက်သူတို့သည် click အမျိုးအစား ဆိုင်ကယ်အဖြူရောင်စီး အမျိုးသားလူငယ် နှစ်ယောက်အပြင် Mark II အဖြူရောင်ကားတစ်စီးနှင့်လည်း အတူရောက်လာကြောင်း သိရသည်။

ယင်းကဲ့သို့ ဓားထောက် လုယက်မှု နှင့် ပတ်သက်ပြီး ဒေသခံပြည်သူများသည် စိုးရိမ်မှုများ မြင့်တက်နေပြီး အပြင်ထွက် သွားလာရန်လည်း စိုးရိမ်ထိတ်လန့်နေကြကြောင်းကို တန့်ယန်းမြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အခုလို နေ့ခင်းအချိန်မှာ ကားနဲ့သွားတာတောင် လုယက်ခံရတယ်၊ ကိုယ်ဝန်သည် အမျိုးသမီးကိုပါ ဓားပြတိုက် တဲ့အပြင် ကိုယ်ထိလက်ရောက် အန္တရာယ်ပြုခံရတယ်ဆိုတော့ ဆိုင်ကယ် သွားရင် ပိုပြီးတော့ စိုးရိမ်ရတယ်၊ ကလေးတွေ ကျောင်းကြို၊ ပို့ဖို့ အပြင်ထွက်ဖို့ မလုံခြုံသလို ခံစားရလို့ စိုးရိမ်ရတယ်၊ ဘယ်အဖွဲ့အစည်းကမှလည်း ဒေသလုံခြုံရေး ပြည်သူ့ကာကွယ်ရေးအတွက် မလုပ်ပေးကြဘူး” ဟု ၎င်းအမျိုးသမီးက ဆိုသည်။

တန့်ယန်းမြို့အတွင်းတွင် ပြီးခဲ့သည့် ဧပြီလ ၂၉ ရက်တွင်လည်း လက်နက်ပြ ခြိမ်းခြောက် လုယက်ခံရမှု တစ်ခု ဖြစ်ပွားခဲ့ပြီး ဒေသအတွင်း မူးယစ်ဆေးဝါးပေါများလာမှုနှင့် တရားဥပဒေစိုးမိုးမှုကင်းမဲ့ခြင်း၊ စစ်ကောင်စီမှ လုံခြုံရေး တာဝန်ယူမှုကင်းမဲ့ခြင်း တို့ကြောင့် ဒေသခံပြည်သူများမှ စိုးရိမ်စိတ်မြင့်တက်နေကြောင်း တန့်ယန်းဒေသခံများက ပြောသည် ။

စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် တန့်ယန်းမြို့နယ်အတွင်း၌ ယခုကဲ့သို့ သူခိုးဓားပြများ ပေါများလာသည့် အပြင် ဌာနေပြည်သူ့စစ်များက တပ်သားသစ်စုဆောင်းမှုများကို အတင်းလုပ်ဆောင်ခြင်းများ ရှိနေပြီး ဒေသအတွင်း သွားလာလှုပ်ရှားသည့် တိုင်းရင်းသားလက်နက်ကိုင်များ၏ ဒဏ်များကိုလည်း တိမ်းရှောင်နေရကြောင်း သိရသည်။