ပုံးအင်းဒေသ ရေကြီးမှုကို ပြည်သူကိုယ်တိုင် ဖြေရှင်းနေရ

0

သျှမ်းပြည်တောင်ပိုင်း တောင်ကြီးခရိုင် ပုံးအင်းဒေသတွင် ရေကြီးမှုကြောင့် လယ်စပါး ၊ နေအိမ်တွေ ရေထဲမြှုပ်သွားရပြီး ပြည်သူများ ခက်ခဲမှုများကို ကိုယ်တိုင်ဖြေရှင်းနေကြရကြောင်း စုံစမ်းသိရသည်။

ပုံးအင်းဒေသ

ယခင်နှစ်တွင် ရေကြီးမှုအတွက်ကြောင့် ဆုံးရှုံးမှုကို စာရင်းကောက်ပေးသူရှိပြီး ယခုနှစ်တွင် အုပ်ချုပ်ရေးမှုက အလုပ်မလုပ်သောကြောင့် ပြည်သူကိုယ်တိုင်က စာရင်းကောက်ပြီး သက်ဆိုင်ရာအုပ်ချုပ်ရေးမှု ဥက္ကဌထံ တင်ပြကြရကြောင်း ပုံးအင်းဒေသ ဆိုင်လဲကျေးရွာအုပ်စု မှ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ ကျနော်တို့ ကိုယ်တိုင်ဆင်းကောက်နေရတယ်။ ပြီးတော့ ကျနော်တို့ ပုံးအင်းက သက်ဆိုင်ရာ မြို့နယ် ဥက္ကဌတွေကို တင်ပြပေးရတာ။ မြို့ ဥက္ကဌကနေပြီးတော့ မြို့နယ်ကို တင်ပြပေးတာ။ အခုက ကျနော်တို့ ကိုယ်တိုင်ကောက်နေရတာ။ အရင်နှစ်တွေတော့ စာရင်းတွေလိုက်လာကောက်ပေးတဲ့ သူတွေရှိတယ်။ ဒီနှစ်က ကျနော်တို့ ကိုယ်တိုင်က ဆင်းလုပ်ရတယ်။ ထောက်ပံ့ကြေးတွေလည်း မရတော့ဘူး” ဟု ၎င်းအမျိုးသားက ဆိုသည်။

ပုံးအင်းဒေသသည် တောင်ကြီးမြို့နယ်၊ ဆီဆိုင်မြို့နယ်၊ ဟိုပုံးမြို့နယ် စသည့် (၃) မြို့နယ်ဖြင့်ဖွဲ့စည်းထားပြီး လက်ရှိမှာ ဒေသအလိုက် ပြည်သူများက စာရင်းကောက်ရပြီး သက်ဆိုင်ရာ မြို့နယ် အုပ်ချုပ်ရေးမှူးထံ စာရင်း ပို့ထားပေးရသည်။

ယခုလအတွင်း ရေကြီးမှုဖြစ်ပြီးနောက်ပိုင်း ပုံးအင်းဒေသတွင် မြေစာရင်းကောက်သည့် အဖွဲ့စည်းက တစ်ကြိမ်ရောက် ရှိလာပြီး ထိုသို့ရောက်ရှိလာမှုသည် ကျေးရွာအုပ်ချုပ်ရေးမှူး နှင့်တွေ့ဆုံပြီး လယ်ယာတွင်းမဆင်းကြည့်ဘဲ ပြန်သွားခဲ့ကြောင်း ပုံးအင်းဒေသခံများ ပြောပြချက်အရသိရသည်။

“လာကူညီပေးတာမရှိဘူး။ အစိုးရကလည်း ကူညီပေးတာမျိုးမရှိဘူး။ လာကြည့်ပြီးတော့ ပြန်သွားတာပဲရှိတယ်။ ကူညီပေးတဲ့အဖွဲ့စည်းတွေ ရှိလာအောင်လည်း ကိုယ်တိုင်ပဲ ပြုလုပ်နေရတယ်။ ကျနော်တို့ ဒီပုံးအင်းဒေသကို ရေမြှုပ်တဲ့အိမ်စာရင်း၊ စပါးတွေကို စာရင်းလိုက်ကောက်ပေးနေတာ ၁၇ ရက် ရှိနေပြီ။ မကောက်ရသေးတဲ့ ကျေးရွာတွေလည်းရှိတယ်” ဟု ကိုယ်တိုင်စာရင်းဆင်းကောက်ပေးနေသည့် သူက ပြောသည်။

ပြီးခဲ့သည့် ၂၀၂၀ ခုနှစ်အထိ ပုံးအင်းဒေသသည် ရေကြီးမှုကြောင့် ပျက်ဆီးဆုံးရှုံးမှုများကို သက်ဆိုင်ရာ အစိုးရ မှ လယ်ယာတစ်ဧကလျှင် ထောက်ပံ့ကြေး ၂ သိန်းခွဲ ကူညီထောက်ပံ့ပေးမှုရှိသော်လည်း အာဏာသိမ်းပြီးနောက် ယခုနှစ်အထိ ထောက်ပံ့ကြေးငွေမရရှိ ကြောင်း သိရသည်။

“ အရင်နှစ်နဲ့ ဒီနှစ် မရသေးဘူး။ ၂၀၂၀ ခုနှစ် အစောပိုင်းတုန်းက ရတယ်။ လယ်ယာတစ်ဧကကို ၂ သိန်းခွဲရတယ်။ အခုတော့ ဘယ်အစိုးရမှ ကျနော်တို့ကို လာထောက်ပံ့ ကူညီပေးတာမရှိဘူး။ တစ်ချို့လယ်ယာ စပါးတွေက ရေမြှုပ်ပြီး ပျက်စီးသွားတယ်” ဟု ပုံးအင်းဒေသမှ နောင်စင့်ကျေးရွာ ဒေသခံ တစ်ဦးက ပြောသည်။

အလားတူ ဟမ်းဆီးကျေးရွာ အုပ်ချုပ်ရေးမှူးက “ ကျနော်တို့လည်း သက်ဆိုင်ရာ နေရာဒေသတွေကို စာရင်းကောက်နေပါတယ်။ ပြီးတော့ကျနော်တို့က မြို့နယ်တွေကို စာရင်းတင်ပေးရတာ။ ဒီနှစ်ထိတော့ အစိုးရကနေ လာပြီးတော့ ထောက်ပံ့ကြေး ပေးနေတာမျိုး မရှိသေးဘူး” ဟု ပြောသည်။

ထိုသို့ စာရင်းများကို ကောက်ယူပြီး တောင်ကြီးမြို့နယ်က ကျေးရွာအုပ်စုများသည် ဟမ်းဆီးကျေးရွာအုပ်စု အုပ်ချုပ်ရေးမှူးထံတင်ပြရကြောင်း၊ ဆီဆိုင်မြို့နယ်တွင်းရှိ ကျေးရွာများသည် ဝမ်းပုံကျေးရွာ အုပ်ချုပ်ရေးမှူးထံ တင်ပြရသည်။

ပုံအင်းဒေသသည် ရေ (၆) လ ကုန်း (၆) လ နေထိုင်ရသည့်ဒေသဖြစ်သည်။
လက်ရှိမှာ အာဏာယူထားသည့် အစိုးရကို ကူညီထောက်ပံ့ပေးရန်အတွက် ပြည်သူများက မျှော်လင့်နေကြောင်းသိရသည်။

Leave a Comments