မိုင်းပန်မြို့ လမ်း၊တံတားများပျက်စီး ကား၊ဆိုင်ကယ် သွားလာမရ

0

သျှမ်းပြည်တောင်ပိုင်း မိုင်းပန် – မိုင်းတုံ ကားလမ်းမကြီးပေါ် ရေကြီးရေလျှံဖြစ်ပွားနေပြီး တံတားများ ပျက်စီးနေသဖြင့် ကားနှင့်ဆိုင်ကယ် များသွားလာ၍ မရကြောင်း စုံစမ်းသိရှိရသည်။

ပြီးခဲ့သည့် သြဂုတ် ၁၃ ရက် နံနက်ပိုင်းတွင် မိုင်းပန်မြို့- မိုင်းတုံမြို့ ကားလမ်းမကြီးပေါ်တွင် ရေကြီးရေလျှံမှုဖြစ်ပြီး တံတားတစ်ခုပျက်စီးနေခြင်းကြောင့် ယနေ့ချိန်ထိ ကားနှင့်ဆိုင်ကယ်များသွားလာ၍ မရသေးကြောင်း မိုင်းပန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မိုင်းပန်မြို့ နဲ့ မိုင်းတုံကြား ဓာတ်ဆီဆိုင်အနီးက တံတားတစ်ခုပျက်သွားတယ်။ လမ်းပေါ်ရေလျှံတာတော့ အများကြီးပဲ တံတားကတော့ တစ်ခုပဲပျက်တယ်။ ကန်မောက်လျံ၊ နားလော၊ လွယ်နွဲ့ကျေးရွာက လမ်းတွေ ရေမြုပ်သွားတယ်။ အခုထိ မိုင်းပန်နဲ့မိုင်းတုံ ကားလမ်းတစ်လျှောက် သွားလာလို့မရေသးဘူး“ ဟု ၎င်းကဆိုသည်။

မိုင်းပန် – မိုင်းတုံ ကားလမ်းမကြီး ပျက်စီး

မိုင်းပန်မြို့ ဝမ်မိုင်ရပ်ကွက် တစ်ခုလုံး ရေကြီးရေလျှံမှုကို ကြုံတွေ့နေရပြီး၊ မြို့အရှေ့ဘက် ဖယ်လုံကျေးရွာ တွင် အိမ်ခြေ (၉၅) လုံး နှင့် လွယ်နွဲ့ကျေးရွာရှိ အိမ်ခြေများ ရေကြီးရေလျှံမှုဖြစ်ပွားပြီး နေအိမ်နှင့် စိုက်ခင်းအများအပြား ပျက်စီးဆုံးရှုံးနေကြောင်း ၎င်းက ထပ်လောင်းပြောသည်။

ထို့အပြင် မိုင်းပန်မြို့ ပတ်လည်ရှိ ပဲပုတ်ခင်းများ နှင့် စပါးခင်း ၆၀ ရာခိုင်နှုန်းထိ ပျက်စီးမှုရှိနေပြီး လက်ရှိအချိန်ထိ စိုက်ခင်းထဲများတွင် ရေများရှိနေသေးကြောင်း မိုင်းပန်မြို့ တောင်ယာလုပ်ကိုင်သူ အမျိုးသားတစ်ဦးက ပြောသည်။

“အခု ရေလွှမ်းမိုးဒဏ်ကြောင့် ပဲပုတ်စိုက်ခင်းနဲ့ စပါးစိုက်ခင်းတွေ တော်တော်များ ပျက်စီးတယ်။ ကျနော်တို့ တခါမှ ရေမရောက်ဖူးတဲ့ ခြံတွေမှာတော့ ရေတွေအခုထိရှိနေသေးတယ် “ ဟု ၎င်းအမျိုးသားတစ်ဦးက ပြောသည်။

မိုင်းပန်မြို့သည် အဆမတန် ရေးကြီးရေလျှံဖြစ်ပွားမှုကို ပထမဆုံးအကြိမ်ဖြင့် ကြုံတွေ့နေရပြီး စပါးခင်းများလည်း ဧက (၁၀၀၀) ကျော် ရေနစ်မြှုပ်သွားကြောင်း သိရသည်။

Leave a Comments