သျှမ်းပြည်တောင်ပိုင်း ရွာငံမြို့နယ်အတွင်းတွင် ပြည်သူ့ကာကွယ်ရေးတပ်ဖွဲ့ PDF များ အခြေချလှုပ်ရှားမှုများ မရှိသော်လည်း အာဏာသိမ်း စစ်ကောင်စီတပ်ဖွဲ့မှ စစ်အင်အားဖြည့်တင်းမှုများ ဆက်လက်ရှိနေကြောင်း သတင်းသိရသည်။
ယမန်နေ့ (သြဂုတ် ၁၄) ရက်တွင် စစ်သားအင်အား အပြည့်ပါသည့် စစ်ကား ၆ စီးသည် ရွာငံမြို့နယ်ရှိ တဲ့လုကျေးရွာသို့ ရောက်ရှိလာကြောင်း ဒေသခံအမျိုးသားလူငယ်တစ်ဦးက သျှမ်းသံတော်ဆင့်ကို ပြောသည်။
“PDF တွေလည်း ဒီဒေသထဲကနေ ဆုတ်ခွာလိုက်ပြီဆိုတာ ထုတ်ပြန်ကြေညာထားပေမဲ့ စကစတွေက အခုထိကို စစ်အင်အားဖြည့်တာတွေ စခန်းချနေရာယူတာတွေ လုပ်နေတုန်းပဲ၊ ရွာသားတွေကလည်း စစ်သားတွေကို မြင်ရင် ကြောက်ကြတယ်လေ၊ သူတို့ဖမ်းဆီးနှိပ်စက်တာခံရမှာစိုးလို့ တချို့ကကြိုတင် ထွက်ပြေးတိမ်းရှောင်ရတယ်”ဟု တဲ့လုကျေးရွာခံ အမျိုးသားတစ်ဦးက ပြောသည်။
ထို့အပြင် ပြီးခဲ့သည့် ဇူလိုင်လအတွင်းမှ ယနေ့အချိန်အထိ ရွာငံမြို့နယ် အလယ်ချောင်ကျေးရွာ၊ မြင်းကျဒိုးကျေး ရွာ၊ မင်းတိုင်ပင်သစ်တောရုံး နှင့် နန်းခုံရွာ တို့တွင် စစ်ကောင်စီတပ်ဖွဲ့ ဝင်များ စခန်းချတပ်စွဲ နေရာယူထားလျက် ရှိကြောင်းလည်း သတင်းသိရသည်။
ပြီးခဲ့သည့် သြဂုတ်လ ၁၂ ရက်တွင်လည်း ရွာငံမြို့နယ် နှင့် သာစည်မြို့နယ် နယ်နမိတ်ခြင်းဆက်စပ်နေသည့် ကျောက်ပချုပ်ကျေးရွာမှ အရပ်သားပြည်သူနေအိမ် စုစုပေါင်း ၉ လုံးခန့် မီးရှို့ ဖျက်ဆီး ခံရသည့်အပြင် ရွာတွင်းရှိ အမျိုးသမီးများကိုလည်း စစ်ကောင်စီတပ်သားများက ရိုက်နှက်စစ်ဆေးကြောင်းလည်း အမည်မဖော်လိုသူ ဒေသခံ အမျိုးသားလူငယ်က ပြောသည်။
“ပြီးခဲ့တဲ့ ဇူလိုင်လ ၂၉ ရက်မှာ ကျောက်ပချုပ်ရွာက နေအိမ် ၃ လုံး၊ သြဂုတ် ၁၀ ရက်နေ့တွင် ၆ လုံးစုစုပေါင်း အရပ်သားပြည်သူနေအိမ် ၉ လုံးကို စကစတွေက ရိုက်ခွဲတာ မီးရှို့ဖျက်စီးတာလုပ်ခဲ့တယ်၊ ပြီးတော့ ၁၂ ရက်နေ့မှာ အမျိုးသမီး ၃ ယောက်လား ၅ ယောက်လားမသေချာဘူး၊ ရိုက်နှက်စစ်ဆေးခဲ့သေးတယ်” ဟု ၎င်းက ပြောသည်။
၂၀၂၂ ခုနှစ် ဖေဖော်ဝါရီ မှ ဧပြီလ အထိ စစ်ကောင်စီမှ ပြည်သူ ၁၀ ဦးကို ရက်စက်စွာ သတ်ဖြတ်ခြင်းများ ပြုလုပ်သည့်အပြင် ပြည်သူ (၇) ဦးကို ဖမ်းဆီးခဲ့ပြီး နေအိမ် (၈) လုံးကို မီးရှို့ဖျက်ဆီးခဲ့ကြောင်း ရှမ်းလူ့အခွင့်အရေးမဏ္ဍိုင် SHRF ကလည်း ထုတ်ပြန်ချက်မှာ ရေးသားထားသည်။
Leave a Comments