သျှမ်းပြည်မြောက်ပိုင်း လားရှိုးမြို့ မှ သီပေါမြို့သို့ သွားသည့် ကားလမ်းမကြီးရှိ စက်သုံးဆီရောင်းဝယ်ရေးဆိုင် (ပန့်ဆီဆိုင်) (၁၅) ဆိုင်ခန့် ပိတ်ထားပြီး လားရှိုးမြို့နယ်အတွင်းရှိ ပန့် ဆီဆိုင် တစ်ဆိုင်သာ ဖွင့်လှစ်ကြောင်း စုံစမ်းသိရှိရသည်။
ယမန်နေ့ သြဂုတ် (၁၂) ရက်က လားရှိုးမြို့နယ်တွင်းရှိ အသောက ပန့်ဆီဆိုင် တစ်ဆိုင်သာ ဖွင့်လှစ်ထားပြီး ဆီများ လာရောက်ထည့်သူ များပြားနေကြောင်း သိရှိရသည်။
“လားရှိုး အထွက် သီပေါမြို့နယ် သွားတဲ့လမ်းမှာဆိုရင် ပန့်ဆီဆိုင် (၁၅) ဆိုင်လောက်ရှိတယ်။ အကုန်လုံး ပိတ်ထားကုန်ပြီ။ တစ်ဆိုင်ပဲ ဖွင့်ထားတော့တယ်။ ပန့် ဆီဆိုင် က ဆိုင်ရှင်တွေ ပြောတာကတော့ ဆီတွေ ကုန်သွားတယ်လို့ ပြောတယ်” ဟု လားရှိုးမြို့ဒေသခံ စက်သုံးဆီ သွားရောက်ဖြည့်သည့် အမျိုးသား တစ်ဦး က သျှမ်းသံတော်ဆင့် ကိုပြောသည်။
ထို တစ်ဆိုင်သာ ဖွင့်ထားသည့် ပန့်ဆီဆိုင်သည်လည်း သတ်မှတ်ချက်ဖြင့် ရောင်းချနေသဖြင့် ကား တစ်စီးလျှင် (၂) သောင်း မှ (၃) သောင်း ကျပ်သာ ထည့်ပေးပြီး ဆိုင်ကယ် တစ်စီးလျှင် (၅၀၀၀) ကျပ်သာ ထည့်ပေးကြောင်း သိရှိရသည်။
” တန်းသွားစီပြီး သွားဖြည့်ကြတဲ့သူတွေ အများကြီးပဲ။ မနေ့ ည (၆) နာရီလောက် တန်းသွားစီပြီး ထည့်တဲ့သူတွေ မရလိုက်တော့ဘူး။ အဲ့ အသောက ဆိုင်လည်း ဆီတွေ ကုန်သွားပြီလို့ ပြောတယ်။ လားရှိုးမှာ စက်သုံးဆီ ပျက်သွားရင် ဘယ်လို လုပ်မလဲတော့ မသိဘူး” ဟု အဆိုပါ ပုဂ္ဂိုလ် က ထပ်လောင်းပြောသည်။
စက်သုံးဆီ ပြတ်လပ်မှုသည် သျှမ်းပြည်မြောက်ပိုင်း သာမက သျှမ်းပြည်တောင်ပိုင်း တောင်ကြီးမြို့နယ်များလည်း စက်သုံးဆီ ပြတ်လပ်မှု ကြုံတွေ့နေရသည်။
Leave a Comments