သျှမ်းပြည်မြောက်ပိုင်း သီပေါမြို့နယ် ချောင်းဆုံတံတားပေါ်မှ ပြုတ်ကျသွားပြီး ရေနစ်သေဆုံးသွားသော အသက် (၆၀) အရွယ်ရှိ အမျိုးသားတစ်ဦး ယနေ့အချိန်ထိ အလောင်းရှာမတွေ့သေးကြောင်း စုံစမ်းသိရှိရသည်။
သြဂုတ် (၇) ရက်နေ့က မိုးသည်းထန်စွာရွာသွန်းချိန်တွင် ဦးဗျာလေးသည် ဆိုင်ကယ်ဖြင့် သီပေါမြို့မှ တာပုလဲရွာသို့ ပြန်သွားချိန် ညနေ (၃)နာရီ အချိန်တွင် ချောင်းဆုံတံတားပေါ်မှ ပြုတ်ကျသွားပြီး ပျောက်ဆုံးသွားသည့် အသက် (၆၀) အရွယ်ရှိ ဦးဗျာလေးကို ယနေ့ (၃)ရက်မြောက်နေ့ထိ ရှာမတွေ့သေးကြောင်း သီပေါမြို့ နယ်စည်းမခြား ပရဟိတအသင်း မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ သူနေတဲ့ရွာက တာပုလဲရွာကို ဆိုင်ကယ်နဲ့ပြန်သွားတာ ချောင်းဆုံတံတားပေါ်ကနေ ချော်ကျပြီး ပြုတ်ကျသွားတာ။ သူ့အလောင်းရှာတာ ဒီနေ့နဲ့ဆို (၃) ရက်ရှိပြီ။ အလောင်းကရှာလို့မတွေ့သေးဘူး“ ဟု ၎င်းအမျိုးသားတစ်ဦးက ပြောသည်။
အဆိုပါ ဦးဗျာလေး ပြုတ်ကျသွားသော ချောင်းသည် မိုးရေကြောင့် ရေစီးသန်သော ချောင်းတစ်ခုဖြစ်ပြီး ဦးဗျာလေး အလောင်းသည် ရေစီးနှင့်မျောပါသွားနိုင်ကြောင်း ၎င်းက ထပ်လောင်းပြောသည်။
“အဲ့ချောင်းက ရေစီးသန်တယ်။ အခုမိုးရေကြောင့် ရေကလည်း အဆမတန်ကို ရေစီးသန်တာ၊ တချို့က မျောသွားတယ်တွေ့လို့ ကျနော်တို့လည်း ထပ်ရှာနေသေးတယ်” ဟု ၎င်းကဆိုသည်။
အဆိုပါ မိုးတွင်းအချိန်တွင် ရပ်ဝေးသို့ အသွားအလာ ပြုလုပ်သောသူများ၊ ဆိုင်ကယ်ဖြင့် မသွားလာရန် မဖြစ်မနေသွားရသူများလည်း ဆိုင်ကယ်ကို သတိထားပြီး မောင်းပေးရန် လိုအပ်ကြောင်းလည်း ပရဟိတ အဖွဲ့က ပြောဆိုလိုက်သည်။
ယခုရက်ပိုင်း မိုးသည်းထန်စွာ ရွာသွန်းမှုကြောင့် သျှမ်းပြည်မြို့များတွင် ရေကြီးရေလျှံမှုများကြုံရပြီး စပါးခင်းများလည်း ရေမြုပ်သည့်အထိ ကြုံတွေ့နေရသည်။
Leave a Comments