သျှမ်းပြည်မြောက်ပိုင်း ကွတ်ခိုင်မြို့နယ် နမ့်ဖတ်ကာအတွင်းတွင် အမျိုးသမီးများကိုယ်တိုင် ဦးဆောင်ပြီး မူးယစ်ဆေးဝါး နှိမ်နင်းမှုများ ပြုလုပ်နေကြောင်း သတင်းသိရသည်။
စစ်အာဏာသိမ်းပြီးနောက်ပိုင်း ဒေသအတွင်း မူးယစ်ဆေးဝါး ယခင်ထက် ပိုမိုပေါများလာသော်လည်း သက်ဆိုင်ရာ တာဝန်ရှိသူများက တာဝန်ယူ နှိမ်နင်းခြင်းမရှိသည့်အတွက် ဒေသခံပြည်သူများ စုပေါင်းကာ မူးယစ်ဆေးဝါးကို နှိမ်နင်းခြင်းဖြစ်ကြောင်း ပါဝင်လှုပ်ရှားသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ကျမတို့ ဒေသ (နမ့်ဖတ်ကာ)မှာ မူးယစ်ဆေးဝါးကို လွတ်လပ်စွာ လုပ်လာကြတော့ အိမ်ထောင်ရေးတွေ၊ စီးပွားရေးတွေ ပျက်စီးရတာလည်း များနေပြီ၊ အမျိုးသမီးတွေဆိုလည်း အိမ်ထောင်ကွဲရတဲ့အထိ ဖြစ်ကြတယ်၊ အရာ အားလုံးကျဆင်းတယ်၊ ဒါကြောင့် ကျမတို့ စုပေါင်းပြီး မူးယစ်ဆေးဝါးကို နှိမ်နင်းရတာဖြစ်တယ်” ဟု ၎င်း အမျိုးသမီးက ပြောသည်။
နမ့်ဖတ်ကာ အတွင်း မူးယစ်ဆေး နှိမ်နင်းမှုတွင် ပါဝင်သည့်အမျိုးသမီးများသည် မူးယစ်ဆေးတရားခံများ လိုက်လံ ဖမ်းဆီးရာတွင် လိုက်ပါဆောင်ရွက်သည့်အပြင် ဖမ်းမိသည့် မူးယစ်တရားခံများ ပြုပြင်ပြောင်းလဲရေး ကဏ္ဍမှာလည်း ပါဝင်ကူညီကြောင်း အထက်ပါ အမျိုးသမီးက ဆက်ပြောသည်။
“ဖမ်းမိတဲ့ ရောင်းသူ/ သုံးသူတွေကို မိဘထံအပ်ပြီး ပြုပြင်ပြောင်းလဲဖို့ ပြောဆိုတာရှိသလို ကျေးရွာအုပ်ချုပ်ရေး ထံ အပ်တာလည်း ရှိတယ်၊ တချို့ တရားခံတွေဆိုလည်း ဆေးဖြတ်ရေးစင်တာပို့တာတို့ အဲ့လိုပြုပြင်ပြောင်းလဲရေး အတွက် ကူညီပေးတာရှိတယ်” ဟု မူးယစ်ဆေးဝါးနှိမ်နင်းရေးတွင်ပါဝင်သည့် ကချင်အမျိုးသမီးက ဆိုသည်။
ပြီးခဲ့သည့် သြဂုတ်လ ၃ ရက်နေ့မှ စတင်ပြီး အမျိုးသမီးများ ပါဝင်သည့် မူးယစ်ဆေးနှိမ်နင်းသည့် တက်ကြွလှုပ်ရှားသူများမှ မူးယစ်ဆေးနှိမ်နင်းရေးလုပ်ဆောင်ချက်များကြောင့် ဒေသအတွင်း မူးယစ်ဆေးရောင်းချ အသုံးပြုမှုများလည်း လျှော့လာကြောင်း နမ့်ဖတ်ကာမှ အမည်မဖော်လိုသူ ဒေသခံ မိခင်တစ်ဦးက ပြောသည်။
“အရင်က လမ်းပေါ်မှာ တွေ့လေ့ရှိတဲ့ ရုပ်ပျက်ဆင်းပျက် ဆေးသုံးနေတဲ့ပုံတွေ မတွေ့ရတော့ဘူး၊ ဒါက သူတို့ကြောင့် လျှော့ကျလာတယ်ပြောရမှာပေါ့၊ ပြီးတော့ တက်ကြွလှုပ်ရှားတဲ့ လူငယ်တွေလည်း ရက်ခြား တခေါက် အလှည့်ကျနဲ့ မြို့ပတ်တော့ ရောင်းသူရော ဆေးချသူရော ကျသွားတယ်” ဟု ၎င်းက ပြောသည်။
လက်ရှိ ကွတ်ခိုင်မြို့နယ်အတွင်းတွင် ပြည်သူများမှ ဖွဲ့စည်းထားသည့် မူးယစ်ဆေးနှိမ်နင်းရေးအဖွဲ့အပြင် တအာင်း (ပလောင်) အမျိုးသား တပ်မတော် TNLA တပ်ဖွဲ့တို့က မူးယစ်ဆေးဝါးရောင်းဝယ်သုံးစွဲသူတွေကို လိုက်လံ ဖမ်းဆီးနှိမ်နင်းမှု ရှိနေခဲ့ကြောင်း သတင်းသိရသည်။
စစ်တပ်မှ နိုင်ငံတော်အာဏာသိမ်းပြီးနောက်ပိုင်းတွင် ကွတ်ခိုင်မြို့နယ်အတွင်း၌ မူးယစ်ဆေးဝါး ပိုမိုများပြားလာပြီး ပစ္စည်းခိုးယူခံရမှုလည်း များပြားလာသည့်အတွက် တရားဥပဒေစိုးမိုးမှု ကင်းမဲ့ပြီး လုံခြုံရေးကင်းမဲ့ သလို ခံစားရကြောင်း ဒေသခံများက ဝေဖန်ပြောဆိုနေကြသည်။
