သျှမ်းပြည်တောင်ပိုင်း ရွာငံမြို့နယ်အတွင်း လှုပ်ရှားနေသည့် အာဏာသိမ်း စစ်ကောင်စီတပ်သားများသည် အရပ်ဝတ်များဖြင့်သာ သွားလာလှုပ်ရှားနေလျက်ရှိကြောင်း သတင်းသိရသည်။

ပြီးခဲ့သည့် ဇူလိုင်လ နောင်ပိုင်းမှ စတင်ကာ ရွာငံမြို့နယ်ရှိ နာဘန်းကြီးကျေးရွာအုပ်စုအတွင်းတွင် စစ်ကောင်စီ တပ်သားတို့သည် ဒေသခံရွာသားများအသွင်ယူကာ အရပ်ဝတ်ဖြင့် PDF အကြောင်း၊ PDF ချိတ်ဆက်သူများကို လိုက်လံစုံစမ်းနေကြောင်း သတင်းသိရသည်။

“မသိရင်တော့ တကယ့်ဒေသခံတွေလိုပါပဲ၊ ဘောလုံးဘောင်းဘီနဲ့ စွပ်ကျယ်တွေပဲ ဝတ်ပြီး ရိုးရိုးဦးထုပ်တွေဆောင်းကြတော့ သူတို့ယာခြံသွားတော့ မလိုလို ထင်ရတယ်၊ ရွာသားတွေနဲ့ တွေ့မိရင် PDF အကြောင်းတွေ မေးတာ၊ သူတို့ဘာသာလည်း တောနှင်းရှာတယ်” ဟု နာဘန်းကြီးကျေးရွာအုပ်စုမှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် နာဘန်းကြီးကျေးရွာတွင် စခန်းချ နေသည့် စစ်ကောင်စီတပ်သားတို့သည် စစ်တပ်သတင်းပေးမှ ရရှိသည့် အချက်အလက်များအတိုင်း ဒေသခံများကို လိုက်လံဖမ်းဆီးရာ သြဂုတ် ၁ ရက်တွင် ဈေးသည်အမျိုးသမီးနှစ်ဦး အပါအဝင် နွားကွေ့ကျေးရွာမှ ဒေသခံ အမျိုးသားနှစ်ဦး ဖမ်းဆီးခံရကြောင်းလည်း သတင်းသိရသည်။

“စစ်တပ်သတင်းပေးတွေ ပြောတဲ့အတိုင်းလိုက်ဖမ်းနေတော့ အပြစ်မရှိတဲ့ ဒေသခံပြည်သူတွေ ဖမ်းဆီးခံနေရတာ တော်တော်များနေပြီဗျ၊ နွားကွေ့ရွာ နှစ်ဦး ဖမ်းဆီးခံရတယ်၊ ပြီးတော့ ဈေးသည် အမျိုးသမီးနှစ်ဦးလည်း PDF ကိုထောက်ပံ့ပေးလို့ဆိုပြီး ဖမ်းခံရတယ်လို့ သတင်းရတယ်” ဟု အထက်ပါ ပုဂ္ဂိုလ်က ပြောသည်။

စစ်ကောင်စီတပ်သားများ သောင်းကျန်းမှုကြောင့် ရွာငံမြို့နယ်အတွင်းတွင် ရွာလုံးကျွတ် ထွက်ပြေးရသည့် ကျေးရွာများရှိနေသည်။

ထို့အပြင် လူသားချင်းစာနာထောက်ထားမှုအနေဖြင့် စားနပ် ရိက္ခာနှင့် အဝတ်အစားများလာရောက်ကူညီသည့် ပရဟိတအဖွဲ့အစည်းများကိုလည်း စစ်ကောင်စီတပ်သားများက သေနတ်ပြ တားမြစ်ပိတ်ပင်ခြင်းများလည်း ရှိနေကြောင်း သိရသည်။

စစ်တပ်မှ နိုင်ငံတော်အာဏာသိမ်းပြီးနောက်ပိုင်းတွင် သျှမ်းပြည်အပါအဝင် တစ်နိုင်ငံလုံးက တရားဥပဒေ စိုးမိုးမှုများလည်း ကင်းမဲ့နေပြီး ဒေသခံပြည်သူများက လုံခြုံရေးကင်းမဲ့သလို စိုးရိမ်စိတ်ဖြင့် နေထိုင်ကြရကြောင်း ဝေဖန်ပြောဆိုနေကြသည်။

ရွာငံမြို့နယ်အတွင်း စစ်ကောင်စီမှ ဖျက်ဆီးမွေနှောက် လုယက်မှု ပြုသည့် နေအိမ် ၆ လုံးရှိနေပြီး မီးရှို့ဖျက်စီးခံလိုက်ရသည့် ပြည်သူ့နေအိမ်ပေါင်း ၇ လုံး ရှိနေကြောင်းလည်း ရှမ်းလူ့အခွင့်အရေး မဏ္ဌိုင် SHRF မှ မေလ ၁၁ ရက်စွဲဖြင့် ထုတ်ပြန်ပြောဆိုထားသည်။