သျှမ်းပြည်မြောက်ပိုင်း မူဆယ်မြို့ ပြည်ထောင်စု လမ်းမကြီးပေါ်ရှိ ဆေးခန်းတွင် အလုပ်လုပ်နေသည့် (CDM) ဆရာမ (၂) ဦးကို စစ်ကောင်စီတပ်ဖွဲ့များက အရပ်ဝတ်ဖြင့် လာရောက်ဖမ်းဆီးခဲ့ကြောင်း စုံစမ်းသိရှိရသည်။
ယမန်နေ့ (သြဂုတ် ၄) ရက် ညနေပိုင်း ၅ နာရီဝန်းကျင်တွင် စစ်ကောင်စီ တပ်ဖွဲ့မှ အင်အား (၁၀) ဦးကျော်သည် အရပ်ဝတ်ဖြင့် ပြည်ထောင်စုလမ်းမကြီးပေါ်တွင် ဖွင့်လှစ်ထားသည့်ဆေးခန်းတွင် အလုပ်လုပ်နေသည့် (CDM) ဆရာမ (၂) ဦးကို ဖမ်းဆီးစစ်ဆေးမှုပြုလုပ်ခဲ့ကြောင်း မူဆယ်မြို့ ဒေသခံ (CDM) လုပ်ထားသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ညနေပိုင်း (၄-၅) နာရီအချိန်တုန်းက စကစတွေ ရုတ်တရက် ဝင်လာပြီး ဆရာမ (၂ ) ယောက်ကို လာဖမ်းသွားတယ်။ အရပ်ဝတ် နဲ့ လာဖမ်းတာ၊ တချို့လည်း သျှမ်းဘောင်းဘီ ဝတ်ပြီးလာကြတယ်” ဟု ၎င်း အမျိုးသားတစ်ဦးက ပြောသည်။
အဆိုပါ ဖမ်းဆီးထားသော (CDM) ဆရာမ ( ၂ ) ဦးကို ဖမ်းဆီးခဲ့ပြီးသည့်နောက် ပြန်လည်လွှတ်ပေးရန်အတွက် ဝန်ခံကတိစာ လက်မှတ်ထိုးခဲ့ရပြီး ၎င်းဆရာမ (၂) ဦးကို ယမန့်နေ့ညတွင် ပြန်လွှတ်လာပေးခဲ့ကြောင်း သိရသည်။
“သူတို့ ဖမ်းဆီးပြီးတော့မှ ပြန်လွှတ်ပေးချင်ရင် ဝန်ခံ ကတိထိုးရတယ်လို့ ပြောတယ်။ သူတို့က ဘာအကြောင်း ဝန်ခံကတိ ထိုးခိုင်းလည်းတော့ သေချာမသိရဘူး“ ဟု ၎င်းကထပ်လောင်းပြောသည်။
ယခင်တွင် CDM ဝန်ထမ်းများကို ဖမ်းဆီးပါက ရပ်ကွက်အုပ်ချုပ်ရေးမှူးများထံ အကြောင်းကြားခဲ့ပြီး လာရောက်ဖမ်းဆီးခဲ့ရာ ယခုနောက်ပိုင်းတွင် ရုတ်တရက်ဝင်ရောက်ဖမ်းဆီးမှု ပြုလုပ်လာခဲ့ကြသည်။
“အရင်က သူတို့ဖမ်းမယ်ဆိုရင် ရပ်ကွက်ရွာသူကြီးကို အကြောင်းကြားရတယ်၊ အခုက သူတို့အရပ်ဝတ်နဲ့ပဲ လာဖမ်းတယ်။ အခုမူဆယ်မြို့မှာ (CDM) လုပ်တဲ့သူတွေလည်း ထွက်ပြေးနေရတယ်။ တချို့တွေတော့ လုံခြုံရေးအတွက် စိတ်ပူနေတယ်“ ဟု ၎င်း ဒေသခံတစ်ဦးက ပြောသည်။
သြဂုတ် (၁) ရက်တွင် မီးပွိုင့်အနီး ဗုံးပေါက်ကွဲမှု ဖြစ်ပွားခဲ့ပြီး ပြည်သူ (၂) ဦး သေဆုံးခဲ့ကာ ပြည်သူ့စစ်အပါအဝင် ယာဉ်ထိန်းရဲ (၅) ဦး ထိခိုက်ဒဏ်ရာရရှိခဲ့ကာ ၊ ဩဂုတ် ၂ ရက်တွင်လည်း ပြည်သူ့စစ် ၂ ဦး ထပ်မံပစ်ခတ်ခံရသည်။
