သျှမ်းပြည်တောင်ပိုင်း တောင်ကြီးမြို့ရှိ ယာဉ်ထိန်းရဲများသည် ပြည်သူထံ နည်းမျိုးစုံ ခေါင်းစဥ် တပ်ပြီး ပိုက်ဆံအတင်းအဓမ္မ ကောက်ခံနေကြောင်း စုံစမ်းသိရှိရသည်။
တောင်ကြီးမြို့ အေးသာယာ ထုံးဖိုဂိတ်နှင့် ( ပ ) ကွေ့ တွင်ရှိသော ယာဉ်ထိန်းရဲများက ဆိုင်ကယ် ဦးထုပ်မဆောင်းသူများ ၊ ဆိုင်ကယ် နံပါတ်ပြား မတပ်သူများကို ပိုက်ဆံကောက်ခံနေသည့်အပြင် နည်းမျိုးစုံဖြင့် အတင်းအဓမ္မ လုပ်ယူပြီး ယခုကာလတွင် နှာခေါင်းစည်း (Mask) မပါသည့် သူများထံ ပိုက်ဆံကောက်ခံနေကြောင်း တောင်ကြီးဒေသခံ အမျိုးသား တစ်ဦးထံမှ သိရသည်။
“ Mask မပါတဲ့ ကိစ္စက ဒီ အေးသာယာ ထုံးဖိုဂိတ် နဲ့ အဲ့ဒီ (ပ) ကွေ့မှာပေါ့၊ အဲ့နားက သူတို့ရစ်ချင်သလို ရစ်နေတာ၊ mask မပါလို့ ၊ မှတ်ပုံတင် မပါလို့ ၊ကာကွယ်ဆေးထိုး လက်မှတ် မပါလို့ ရစ်နေတာ၊ အဓိက လူငယ်ကိုပိုပြီး ရစ်တယ်။ သူတို့ကို ဆုံးမ မယ့်သူမရှိတော့ လုပ်ချင်သလိုလုပ်နေတယ်“ ဟု ၎င်းအမျိုးသားတစ်ဦးက ပြောသည်။
ဆိုင်ကယ် ဦးထုပ်မပါလျှင် မြန်မာငွေ (၃၀,၀၀၀) ကျပ်၊ ဆိုင်ကယ် နံပါတ်ပြား (ရှေ့၊နောက်) မပါလျှင် (၂၀,၀၀၀) ကျပ်၊ ဆိုင်ကယ်ဘတ်မှန် နှင့် Mask မပါရှိသူများကိုလည်း ရသမျှနည်းမျိုးစုံဖြင့် (၁၀,၀၀၀) ကျော် အထက် ကောက်ခံနေကြောင်း ၎င်းက ဆက်ပြောသည်။
အဆိုပါ တောင်ကြီးမြို့ နှင့် အေးသာယာမြို့ ယာဉ်ထိန်းရဲများက ယာဉ်စည်းကမ်း နှင့် ပတ်သတ်၍ ကိုယ်ကျိုးအတွက် လုပ်စားနေခြင်းမျိုး ဖြစ်ကြောင်းလည်း တောင်ကြီး ဒေသခံအမျိုးသမီးတစ်ဦးက ပြောသည်။
“ဦးထုပ်ဆောင်းတာ စည်းကမ်းစနစ်တကျတော့ တစ်ခု ဖြစ်သွားတာကောင်းတယ်။ အခုသူတို့က လုပ်စားနေတာပဲ၊ တကယ် လုပ်မယ်ဆိုရင်လည်း ဆက်တိုက်မလုပ်နဲ့၊ တပြေးညီ တစ်ချိန်ပဲလုပ်ပေါ့ကွာ၊ တရားဝင် တိတိကျကျ နဲ့ ဒဏ်ငွေဆောင်ခိုင်းပေါ့၊ အခုက သူတို့ အိတ်ထဲထည့်တဲ့ ပုံစံမျိုးလုပ်နေတယ်။ လုပ်စားချက်ကို ထွန်နေတယ်“ ဟု ၎င်းအမျိုးသမီး တစ်ဦးက ဆိုသည်။
ပြီးခဲ့သည့် သြဂုတ် (၂) ရက်တွင်လည်း သျှမ်းပြည်တောင်ပိုင်း တောင်ကြီးမြို့နယ်ထဲတွင် လူစုဝေးခြင်း၊ လူ ၅ ဦး ထက်ပိုပြီး လူမစုရခြင်း၊ ည ၁၂ နာရီ မှ မနက် ၄ နာရီထိ အပြင်မထွက်ရ ပုဒ်မ ၁၄၄ ကို ထပ်မံထုတ်ပြန် ကြေညာခဲ့သည်။
Leave a Comments