မူဆယ်မြို့ ဗိုလ်ကျားနက် တပ်ဖွဲ့သစ်မှ ည ၈ နာရီ အိမ်ပြင်မထွက်ရန် ထုတ်ပြန်

0

သျှမ်းပြည်မြောက်ပိုင်း မူဆယ်မြို့တွင် ဗိုလ်ကျားနက် လက်နက်ကိုင် တပ်ဖွဲ့အသစ်ပေါ်ပေါက်လာခဲ့ပြီး ပြည်သူများကို ည ၈ နာရီမှစပြီး အိမ်ပြင်မထွက်ရန် ထုတ်ပြန်ကြေညာခဲ့ကြောင်း စုံစမ်းသိရှိရသည်။

အဆိုပါ လက်နက်ကိုင်တပ်ဖွဲ့သစ်သည် မူဆယ်မြို့တွင် လှုပ်ရှားပြီး ပြည်သူများကို ည ၈ နာရီမှစပြီး အိမ်ပြင်မထွက်ရန် အတွက် ယနေ့ (သြဂုတ် ၄) ရက် နံနက်ပိုင်းတွင် ထုတ်ပြန်ကြေညာလာကြောင်း မူဆယ်မြို့ ဒေသခံအမျိုးသားတစ်ဦးက ပြောသည်။

“အရင်က ထွက်လာတာတော့ မတွေ့ဖူးဘူး။ ဒီနေ့မနက်မှ ထွက်ပေါ်လာတာတွေ့တယ်။ သူတို့ အသစ်ထင်တယ်။ လူငယ်တွေ ဖွဲ့စည်းထားတာလားမသိဘူး” ဟု ၎င်းက ဆိုသည်။

အလားတူ အဆိုပါ ဗိုလ်ကျားနက် တပ်ဖွဲ့ကို ဖွဲ့စည်းခဲ့ရာတွင် အချိန်တစ်ခုထိ ကြာမြင့်ခဲ့ပြီဖြစ်ကြောင်း၊ လက်ရှိတွင် စစ်ကောင်စီကို တော်လှန်ရန် နှင့် ပြည်သူများသိရှိစေရန်အတွက် ထုတ်ပြန်ခဲ့ကြောင်းသိရသည်။

“ကျနော်တို့အဖွဲ့က ဖွဲ့စည်းခဲ့တာ ၉ လ ကြာပြီ။ အခုမှ ထုတ်ပြန်ခဲ့တာက ပြည်သူတွေကို အသိပေးဖို့ ထုတ်ပြန်ခဲ့တာပါ။ ပြီးတော့ မူဆယ်မှာ ဒီအဖွဲ့စည်းရှိတယ်ဆိုတာ လူအများသိလာစေဖို့ပါ” ဟု ဗိုလ်ကျားနက်တပ်ဖွဲ့ဝင် တစ်ဦးက သျှမ်းသံတော်ဆင့် ကို ပြောသည်။

ထိုထုတ်ပြန်ချက်တွင် ပြည်သူများအနေဖြင့် ည ၈ နာရီအပြင်မထွက်ရန် နှင့် စစ်ကောင်စီတပ်ဖွဲ့များနှင့် အနီးကပ်မနေထိုင်ရန် အတွက် အသိပေးကြေညာထုတ်ပြန်ခဲ့သည်။

ထိုသို့ အချိန်ကန့်သတ်ခဲ့သည့် အတွက်ကြောင့် ည ကျူရှင် တက်သည့် ကလေးများ နှင့် စီးပွားရှာသည့် သူများအတွက် ခက်ခဲမှုရှိကြောင်းသိရသည်။

“ သူတို့က အချိန်ကန့်သတ်လိုက်တယ်။ ည ၈ နာရီဆိုတော့ အရမ်းစောလွန်တယ်။ ကလေးတွေ ညကျူရှင်သွားကြိုတဲ့အခါတွေမှာလည်း စိုးရိမ်နေရပြီး။ ပြီးတော့ ညပိုင်းမှာ ဆိုင်ဖွင့် တဲ့သူတွေလည်း စီးပွားရေးထိခိုက်တာပေါ့ ။ နေ့စားတွေအတွက်လည်း ညအပြင်မှာ ဝယ်စားသွားလာဖို့ခက်ခဲလာတယ်လေ” ဟု မူဆယ်မြို့ အသက် ၃၅ အရွယ်ရှိ အမျိုးသားက ပြောသည်။

အလားတူ ပြီးခဲ့သည့် ဩဂုတ် ၁ ရက် ညအချိန်တွင် ဖြစ်ပွားခဲ့သည့် ပစ်ခတ်မှုသည်လည်း ဗိုလ်ကျားနက် လက်နက်ကိုင်တပ်ဖွဲ့ ဖြစ်ကြောင်း သိရသည်။

“ အဲ့့နေ့ညက ပစ်ခတ်မှုတွေ၊ ဗုံးထောင်ခဲ့တာလည်း ကျနော်တို့ တပ်ဖွဲ့ကနေ ပြုလုပ်ခဲ့တာပါ” ဟု ဗိုလ်ကျားနက် တပ်ဖွဲ့က ပြောသည်။

မူဆယ်မြို့သည် တိုင်းရင်းသားလက်နက်ကိုင် နှင့် ပြည်သူ့စစ်၊ စစ်ကောင်စီတပ်တို့ သွားလာလှုပ်ရှားသည့် ဒေသဖြစ်ပြီး လက်နက်ကိုင် အဖွဲ့စည်းအများအပြားရှိသည့် ဒေသဖြစ်သည်။
မူဆယ်မြို့တွင် ဇူလိုင်လအတွင်း ဗုံး ၄ ကြိမ်ပေါက်ကွဲမှုဖြစ်ပွားခဲ့သည်။

Leave a Comments