သျှမ်းပြည်အရှေ့ပိုင်း ကျိုင်းတုံမြို့ အမှတ် ၄ ရပ်ကွက်တွင် ယနေ့ (သြဂုတ် ၄) ရက် နံနက် ၁ နာရီကျော်တွင် လျှပ်စစ်အိုးတည်ရာမှ မီးလောင်မှုဖြစ်ပွားပြီး အမျိုးသားတစ်ဦး မီးထဲသေဆုံးခဲ့ရကြောင်း သတင်းသိရသည်။
ထို မီးလောင်သွားသည့် နေအိမ်သည် နှစ်ထပ်တိုက်အိမ်ဖြစ်ပြီး ပျက်စီးဆုံးရှုံးသွားသည့် တန်ဖိုးကိုတော့ မသိရှိရသေးပေ။
“မနက် ၁ နာရီကျော်မှာ မီးစလောင်ခဲ့တာပါ၊ အစက အိမ်နီးချင်းတွေ ဝိုင်းပြီး မီးငြိမ်းခဲ့ပေမယ့် မီးညွန့်က အရမ်း ကြီးတော့ မနိုင်ဘူး၊ မီးသတ်ကားတွေရောက်လာမှ တော်တော်ငြိမ်းယူလိုက်ရတယ်၊ တစ်အိမ်လုံးပြာကျသွားတယ်၊ အမျိုးသားတစ်ဦးလည်း မီးထဲသေသွားခဲ့တယ်” ဟု ဒေသခံအမျိုးသားက ပြောသည်။
အဆိုပါ မီးလောင်မှုသည် ရေနွေးအိုးတည်ထားသည့် လျှပ်စစ်ဝါယာရှော့ခ်ဖြစ်ရာမှ မီးလောင်ကျွမ်းခြင်းဖြစ်ကြောင်း အထက်ပါ အမျိုးသားက ဆက်လက်ပြောဆိုထားသည်။
“ရေနွေးအိုးတည်ထားလို့ ဝါယာရှော့ခ် ဖြစ်ပြီး မီးလောင်တာတဲ့၊ မီးညွန့်လည်း အရမ်းကြီးလို့ ဘာအိမ်တွင်း ပစ္စည်းမှ မယူလိုက်ရဘူး၊ တစ်အိမ်လုံး ပြာကျသွားတယ်” ဟု ၎င်းက ပြောသည်။
လက်ရှိတွင် မီးလောင်မှုကြောင့် သေဆုံးသွားသည့် အမျိုးသားကို ရင်ခွဲရုံသို့ ပို့ဆောင်ထားကြောင်း သတင်းသိရသည်။
ပြီးခဲ့သည့် ဇူလိုင်လ ၂၆ ရက်နေ့တွင်လည်း ကျိုင်းတုံမြို့ အမှတ် ၄ ရပ်ကွက် ဒေသခံအမျိုးသားတစ်ဦးသည် လျှပ်စစ်ဝါယာရှော့ခ်ဖြစ်ပြီး သေဆုံးသွားသည့်ဖြစ်စဥ်လည်း ရှိခဲ့သည်။
